އިސްލާމްދީނަށް ފުރައްސާރަކޮށްގެން ސައުދީ ކޯޓުން މަރަން ހުކުމްކުރި ލަންކާ މީހާ ސަލާމަތްކުރަން ރައީސް ނަޝީދު

މާތް ނަބިއްޔާ މުޙައްމަދު ﷺ އާއި އިސްލާމްދީނަށް ފުރައްސާރަކޮށްގެން ސައުދީއަރަބިއްޔާގެ ކޯޓުން މަރަން ހުކުމްކޮށްފައިވާ ސްރީލަންކާގެ އަނޯޖަން ސިވަރާސާ ސަލާމަތްކުރުމަށް ކުރީގެ ރައީސް މުހައްމަދު ނަޝީދުގެ އެއްބާރުލުން ލިބިއްޖެކަމަށް ލަންކާ ސަރުކާރުން ބުނެފައިވާކަމަށް އެޤައުމުގެ މީޑިއާތަކުން ރިޕޯޓްކޮށްފިއެވެ.

ސައުދީގައި ހުރެ ސިވަރާސާ ރަސޫލާ އަށާއި އިސްލާމްދީނަށް ފުރައްސާރަ ކުރި މައްސަލަ ފެށުނީ ސޯޝަލް މީޑިއާގައި ހިނގި ދީނީ ބަހުސެއްގެ ދެބަސްވުމެއްގެ ތެރެއިންނެވެ. މި ބަހުސްގެ ތެރެއިން އޭނާ ވަނީ ސައުދީގެ ޤާނޫނުތަކަށް ގޮންޖަހައި އިސްލާމްދީނާއި އަދި ރަސޫލާއަށް ފުރައްސާރަކޮށްފައެވެ. އެންމެފަހުން މި މައްސަލަ ބޮޑުވެ، މިކަން ބެލުމަށްފަހު ސައުދީގެ އަލް-އަހްސާ ކްރިމިނަލް ކޯޓުން ފުރަތަމަ ހުކުމް އިއްވާފައިވަނީ ފަސް އަހަރަށް ޖަލަށްލައި ތިން މިލިއަން ރިޔާލުން އޭނާ ޖޫރިމަނާ ކުރުމަށެވެ. މިއީ ސައުދީ އަރަބިއްޔާގެ އެންޓި-ސައިބަރ ކްރައިމް ގާނޫނުގެ ދަށުން ދެވޭނެ އެންމެ ބޮޑު އަދަބެވެ.

މި މައްސަލާގައި އޭނާގެ އާއިލާއިން އިސްތިއުނާފަށް ހުށަހެޅުމުން އިސްތިއުނާފް ކޯޓުން ވަނީ، އަދަބު ބޮޑުކޮށް މަރުގެ އަދަބު ދިނުމަށް ނިޔާ އިއްވާފައެވެ.

މި މައްސަލާގައި ސްރީލަންކާ ސަރުކާރުން އެންމެފަހުން ވަނީ ޑިޕްލޮމެޓިކް ގުޅުމުގެ ތެރެއިން ސިވަރާސާއަށް ދީފައިވާ މަރުގެ އަދަބު ލުއިކުރެވޭނެ ގޮތެއް ހޯދުމުގެ މަސައްކަތް ފަށާފައެވެ. ސްރީލަންކާގެ މީޑިއާތަކުން ވަނީ ސިވަރާސާއަށް ދީފައިވާ މަރުގެ އަދަބުން ސަލާމަތްކުރަން ސައުދީއާއެކު ވާހަކަތައް ކުރިއަށްގެންދަން ދިވެހިރާއްޖޭގެ ކުރީގެ ރައީސް މުހައްމަދު ނަޝީދުގެ އެހީތެރިކަން ލިބޭނޭގޮތް ހަމަޖެހިފައިވާކަމަށް ބުނެފައެވެ.

މިކަމާ ގުޅޭގޮތުން ލަންކާ ސަރުކާރުން ނެރުނު ބަޔާނުގައި ވާ ވާހަކަތަކެއްކަން ފާހަގަކުރަމުން ބުނެފައިވަނީ ސިވަރާސާ މުސްލިމް މުޖުތަމަޢާ ދެކޮޅަށް ދެއްކި ވާހަކަތަކުގެ ސީރިއަސްކަން ރައީސް ނަޝީދު ޤަބޫލުފުޅު ކުރައްވާ ކަމަށެވެ. ނަމަވެސް، އިންސާނީ ކަރާމާތަށް އިސްކަންދީ، އެ ޒުވާނާގެ ފުރާނަ ސަލާމަތްކުރުމަށް ކުރެވޭ މަސައްކަތްތަކުގައި އެމަނިކުފާނު އެއްބާރުލުން ދެއްވާނެކަމަށް ވަނީ ވިދާޅުވެފައެވެ.

މިކަމުގައި ހަރަކާތްރިވާ ޤާނޫނީ ވަކީލް ކުމާރަޕެރޫމާ ވިދާޅުވެފައިވަނީ، ރައީސް ނަޝީދާއެކު ބޭއްވުނު ބައްދަލުވުން ވަރަށް ކާމިޔާބު ކަމަށެވެ. އެގޮތުން ކުރިއަށް އޮތް ދުވަސްތަކުގައި ސައުދީ އަރަބިއްޔާއަށް ދަތުރުކުރުމަށްޓަކައި ވާންޖެހޭ ތައްޔާރީތައް މިހާރު ވަމުން އަންނަކަމަށް ކުމާރަޕެރޫމާ ވިދާޅުވެފައިވާކަމަށް ލަންކާގެ މީޑިއާތަކުން ވަނީ ރިޕޯޓްކޮށްފައެވެ.

ސިވަރާސާ މައްސަލަ މުޅި ސްރީލަންކާގެ ސަމާލުކަމަށް އައިސްފައިވާއިރު ލަންކާ ސަރުކާރުން މިކަމުގެ ތެރެއަށް އެންމެފަހުން ވަދެފައިވަނީ އޭނާގެ އާއިލާގެ ފަރާތުން އެކަމަށް އެދުމުންނެވެ.