ހޯރްމުޒް ކަނޑުއޮޅި ބަންދުކޮށްފައި އޮތަސް އީރާން ހަނގުރާމަ ހުއްޓާލުމަށް ޓްރަމްޕް ވިސްނަނީ

ހޯރްމުޒް ކަނޑުއޮޅި އެއްކޮށް ނުހުޅުވުނު ކަމުގައި ވިޔަސް އެމެރިކާއިން އީރާނާ ދެކޮޅަށް ކުރަމުންދާ އަސްކަރީ ހަރަކާތްތައް، ނިންމާލުމަށް ރައީސް ޑޮނަލްޑް ޓްރަމްޕް ޝައުގުވެރިކަން ފާޅުކުރައްވާފައިވާ ކަމަށް ރިޕޯޓްތައް ބުނެފިއެވެ.

ވޯލް ސްޓްރީޓް ޖާނަލްއިން އެމެރިކާގެ އޮފިޝަލުންނާ ހަވާލާދީ ބުނެފައިވާ ގޮތުގައި، ޓްރަމްޕް މިހާރު ގެންގުޅުއްވަނީ ހަނގުރާމައިގެ މުއްދަތު ކުރުކުރުމުގެ ވިސްނުމެކެވެ.

މީޑިއާތަކުން ރިޕޯޓްކުރާ ގޮތުން، ބާރުގެ ބޭނުންކޮށްގެން ހޯރްމުޒް ކަނޑުއޮޅި ހުޅުވަން މަސައްކަތް ކޮށްފިނަމަ، ޓްރަމްޕް ބޭނުންފުޅުވާ 4 ހަފްތާއާއި 6 ހަފްތާއާ ދެމެދުގެ ތާވަލަށްވުރެ ހަނގުރާމަ ދިގުލައިގެންދާނެއެވެ. އެހެންކަމުން، އެމެރިކާގެ އަސްކަރީ ވެރިންނާއެކު ދާދި ފަހުން ބޭއްވި ބައްދަލުވުންތަކުގައި، ކަނޑުއޮޅި ހުޅުވުމަށްވުރެ ބޮޑަށް އެހެން އަމާޒުތަކަކަށް އިސްކަންދިނުމަށް މަޝްވަރާކޮށްފައިވާކަމަށް ހަބަރު ލިބެއެވެ.

މީޑިއާގެ ރިޕޯޓްތައް ބުނާގޮތުގައި އެމެރިކާގެ މިހާރުގެ މައިގަނޑު އަސްކަރީ އަމާޒަކީ އީރާނުގެ ކަނޑުގެ ސިފައިންގެ ގާބިލްކަން ކުޑަކުރުމާއި، އެ ގައުމުގެ މިސައިލް ރައްކާކޮށްފައިވާ ތަންތަނަށް ހަމަލާދީ ބާރުކަނޑުވާލުމެވެ. މި މަގްސަދުތައް ހާސިލްވުމުން، ހަނގުރާމައިގެ އޮޕަރޭޝަންތައް ނިންމާލުމަށްފަހު، ކަނޑުއޮޅި ހުޅުވުމުގެ މައްސަލައިގައި ޑިޕްލޮމެޓިކް މަގުން އީރާނަށް ޕްރެޝަރު ކުރުމަށް ޓްރަމްޕް ގަސްދުކުރައްވާ ކަމަށް މީޑިއާތަކުން ބުނެއެވެ.

މި ރޭވުމުގެ ދަށުން، ހަނގުރާމަ ހުއްޓާލުމަށްފަހު ބައިނަލްއަގުވާމީ ވިޔަފާރީގެ މަގުތައް ހުޅުވުމަށް ބާރުއެޅުމުގެ ޒިންމާ ޔޫރަޕްގެ ގައުމުތަކާއި ގަލްފުގެ އިއްތިހާދީ ގައުމުތަކާ ހަވާލުކުރުމަށް އެމެރިކާއިން ބޭނުންވެއެވެ. މިއީ އެމެރިކާގެ ސިފައިން ދިގު މުއްދަތަކަށް އެ ސަރަހައްދުގައި ތިބެންޖެހޭ ހާލަތްތަކުން ބަރީއަވުމަށް އެޅޭ ފިޔަވަޅެއްގެ ގޮތުގައި ބެލެވެއެވެ.

ހޯރްމުޒް ކަނޑުއޮޅިއަކީ ދުނިޔޭގެ ތެލުގެ 40 އިންސައްތަ އަށްވުރެ ބޮޑު އިންސައްތައެއް ދަތުރުކުރާ މައި މަގަށް ވީއިރު، މި ކަނޑުއޮޅި ބަންދުވުމަކީ ދުނިޔޭގެ އިގްތިސާދަށް ބޮޑު ނުރައްކަލެކެވެ. ނަމަވެސް، ޓްރަމްޕްގެ މި ވިސްނުމަކީ އަސްކަރީ ހަމަލާތައް ދިގުލައިގެން ދިޔަ ނުދިނުމަށްޓަކައި ގެންގުޅުއްވާ އުކުޅެއް ކަމަށް މާހިރުން ފާހަގަކުރެއެވެ.