އެސިސްޓަންޓް ކޯޗަށް ދިން ހަމަލާ ބަލައެއް ނުގަނެވޭނެ، ހަރުކަށި އިބާރާތުން ކުށްވެރިކުރަން: ނިއު

ދިވެހި ޕްރިމިއަރ ލީގުގައި ނިއު ރޭޑިއަންޓް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން ބައްދަލުކުރި މެޗުގައި ހިނގި ހަމަނުޖެހުމާ ގުޅިގެން، މާޒިޔާގެ އެސިސްޓަންޓް ކޯޗު އަހުމަދު ސުޒައިރު، ނިއު ރޭޑިއަންޓްގެ އެސިސްޓަންޓް ކޯޗަށް ދިން ހަމަލާ ނިއުރޭޑިއަންޓުން ހަރުކަށި އިބާރާތުން ކުށްވެރިކޮށްފިއެވެ.

ދިވެހި ޕްރިމިއާ ލީގްގައި ރޭ ކުޅުނު މެޗްގައި ހިނގާދިޔަ ހަމަނުޖެހުމާ ގުޅޭގޮތުން ނިއު ރޭޑިއަންޓުން ނެރުނު ބަޔާނެއްގައި ބުނެފައިވަނީ، މެޗުގެ ތެރޭގައި ދެ ޓީމުގެ މެދުގައި ހިނގި ކުރިމަތިލުމެއްގައި މާޒިޔާގެ އެސިސްޓަންޓް ކޯޗު އަހުމަދު ސުޒައިރު، ނިއު ރޭޑިއަންޓްގެ އެސިސްޓަންޓް ކޯޗު ލޫސިއާނޯ ސީކުއެއިރާ ބާބޯސާގެ މޫނުމަތީގައި ޖަހާފައިވާކަމަށެވެ. މި އަމަލާ ގުޅިގެން މެޗުގެ 77 ވަނަ މިނެޓުގައި ރެފްރީ ވަނީ ސުޒައިރަށް ރަތްކަޑު ދައްކައި ދަނޑުން ފޮނުވާލާފައެވެ.

ކުޅިވަރުގެ މައިދާނުގައި ހިނގާ މިފަދަ އަނިޔާވެރި އަމަލުތަކަކީ އެއްވެސް ގޮތަކަށް ބަލައިގަނެވޭނެ ކަންކަން ނޫންކަން ފާހަގަކުރަމުން، ނިއު ރޭޑިއަންޓުން ބުނީ މިފަދަ ކަންކަމުގެ ސަބަބުން ކުޅިވަރުގެ ރޫހާއި ރައްކާތެރިކަން ގެއްލިގެންދާ ކަމަށެވެ. އެ ކްލަބުން މިހާރު ވަނީ މި މައްސަލަ ރަސްމީކޮށް ޑިސިޕްލިނަރީ ކޮމިޓީއަށް ހުށަހަޅައި، މިކަން ފުރިހަމައަށް ތަހުގީގުކޮށްދިނުމަށް އެދިފައެވެ.

މީގެ އިތުރުން، ދަނޑުމަތީގައި ހަރަކާތްތެރިވާ ހުރިހާ ފަރާތްތަކެއްގެ ރައްކާތެރިކަން ކަށަވަރުކުރުމުގެ ގޮތުން، ކަމާބެހޭ އިދާރާތަކުން އަހުމަދު ސުޒައިރާ މެދު ހަރުދަނާ ފިޔަވަޅުތަކެއް އެޅުމަށް ވެސް ނިއު ރޭޑިއަންޓުން ވަނީ ގޮވާލާފައެވެ.

އަނިޔާވި އެސިސްޓަންޓް ކޯޗު ލޫސިއާނޯއަށް ފުރިހަމަ އެއްބާރުލުން ދެމުންދާނެ ކަމަށާއި، ކްލަބުގެ މުވައްޒަފުންނާއި ސަޕޯޓަރުންގެ ހައްގުތައް ހިމާޔަތްކުރުމުގައި ދެމިތިބޭނެ ކަމުގެ ޔަގީންކަން ވެސް ނިއުރޭޑިއަންޓްގެ ބަޔާނުގައި ވަނީ ބުނެފައެވެ.