ޣައްޒާއަށް އެހީގެ ތަކެތި ބަހަމުންދިޔަ ސަރަހައްދަކަށް އިޒްރޭލުން ދިންހަމަލާއެއްގައި 30 މީހުން ޝަހީދުވެއްޖެ

އިޒްރޭލުން ޣައްޒާގެ ދެކުނުފަރާތުގައި އޮތް، އެހީގެ ތަކެތި ބަހާ ސަރަހައްދަކަށް އަމާޒުކޮށް ބޮމުގެ ހަމަލާއެއް ދީފިއެވެ.

ޣައްޒާގެ ހެލްތް މިނިސްޓްރީން ބުނެފައިވާގޮތުގައި، މިހަމަލާގައި ވަނީ 30 މީހުން ޝަހީދުވެފައެވެ. އަދި 120 އަށް ވުރެ ގިނަ މީހުން ވަނީ ޒަހަމްވެފައެވެ. މިހަމަލާއާއި ގުޅިގެން އިޒްރޭލުން އަދި ވަކިއެއްޗެއް ބުނެފައި ނުވި ނަމަވެސް އިޒްރޭލުން ދަނީ އެއްވެސް އިންޒާރެއް ދިނުމެއްނެތި ޣައްޒާގެ އެކިހިސާބުތަކަށް ބޮންއަޅާ ސުންނާފަތިކުރަމުންނެވެ.

އެހެންނަމަވެސް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އެންމެފަހުން ނޫސްވެރިންނާ ބައްދަލުކޮށް ބުނެފައިވަނީ އިޒްރޭލުން ޣައްޒާއަށް ދޭ ހަމަލާތަށް ހުއްޓާލާނީ ހަމާސްއިން އަމާންދީ ޣައްޒާއިން ފޭބުމުން ކަމަށާއި އެނޫން އިތުރު ގޮތަކަށް ހަމަލާތަށް ހުއްޓާލެވެން ނެތަކަމަށެވެ.

ފާހަގަކޮށްލަންޖެހޭ ގޮތުގައި، އިޒްރޭލުން ދަނީ ފަލަސްޠީނުގެ ރައްޔިތުންނަށް ފިއްތުންތަށް ކުރިމަތިކުރަމުންނެވެ. އެގޮތުން ޣައްޒާގެ ބޯޑަރުތަށް ބަންދުކޮށް، އެހީގެ ޓްރަކުތަށް ޢައްޒާގެތެރެއަށް ވަނަނުދީ، ފަަލަސްޠީނުގެ ރައްޔިތުން ބަނޑަށްޖައްސަމުންނެވެ.

އަދިހަމައެހެންމެ، އާންމުދަތުރުފަތުރު ކުރުމާއި، ވަޒީފާ އަދާކުރުމާއި، ތައުލީމު ހާސިލްކުރުމާއި، ފަލަސްޠީނުގެ އެހެން އަވަށްތަކުގައި ދިރިއުޅޭ އާއިލާ މީހުންކައިރިއަށް ޒިޔާރަތް ކުރުންމާއި، ޑޮކްޓަރަށް ދެއްކުންފަދަ ކަންކަމަކީ ފަލަސްތީން ރައްޔިތުން މަޙްރޫމްވެފައިވާ ކަންކަމެވެ. ސާފުބޯފެނާ ކަރަންޓާއި އިންޓަނެޓްފަދަ އަސާސީ ޚިދުމަތް ހޯދުމަށްވެސް އިޒްރޭލުން ވަނީ އެތަކެއް ދަތިތަކެއް ކުރިމަތިކުރުވާފައެވެ.

ޣައްޒާގައި އިންސާނީ ކާރިސާއެއްގެ ހާލަތު ކުރިމަތިވެފައިވާކަމަށް އދ އާއި އެހެނިހެން އިންސާނީ ހައްގުތަކަށް މަސައްކަތްކުރާ ޖަމިއްޔާ ޖަމާއަތްތަކުންވެސް ވަނީ ބުނެފައެވެ. ޣައްޒާގެ ހާލަތު އިތުރަށް ގޯސްވުމަށް މެދުވެރިވި ސަބަބަކީ، އިޒްރޭލުން ޢައްޒާއަށް ސާފު ބޯފެނާއި، ކާބޯތަކެއްޗާއި، ސިއްޙީ ފަރުވާފަދަ އިންސާނީ ހައްގުތަކުން ފަލަސްޠީނުގެ ރައްޔިތުން މަހްރޫމް ކުރަމުން ދާތީއެވެ. އެހީގެ ޓްރަކްތައް އައްޒާއަށް ވަނުމަށް ކިއު ހަދާލާފައި އޮތްނަމަވެސް އިޒްރޭލް ސިފައިންގެ ހުއްދަ ލިބިގެން ނޫނީ ޓްރަކްތަކަކަށް ޣައްޒާގެ ތެރެއަކަށް ނުވަދެވެއެވެ.