ކެރެމް ޝަލޮމް ބޯޑަރު ހުރަސްކޮށް، ޣައްޒާއަށް އެހީ ވައްދަން ފަށައިފި

މިސްރާއި ޣައްޒާ އާއި ދެމެދު އޮންނަ ކެރެމް ޝަލޮމް ބޯޑަރު ހުރަސްކޮށް، ޣައްޒާއަށް އެހީ ވައްދަން ފަށައިފިއެވެ.

އުތުރު ސިނާއީގައި ހުންނަ މިސްރުގެ ރެޑް ކްރެސެންޓް ސޮސައިޓީގެ އިސްވެރިޔާ ޚާލިދު ޒައިދު ވިދާޅުވީ ބޯޑަރު ހުރަސްކޮށް، މިއަދު ޣައްޒާއަށް ހަތަރު ފިއުލް ޓްރަކް ހިމެނޭ ގޮތަށް ގާތްގަނޑަކަށް 200 އެހީ ޓްރަކް އެތެރެވާނެ ކަމަށް ބެލެވޭ ކަަމަށެވެ.

މިސްރުގެ އަލް ޤަހެރާ ނިއުސް ޓީވީން ވަނީ އެހީދޭ ޓްރަކްތަކެއް ވަންނަ މަންޒަރު ފެންނަ ވީޑިއޯއެއް ސޯޝަލް މީޑިއާ ސައިޓް އެކްސްގައި ހިއްސާކޮށްފައެވެ.

އެހީ ވެއްދުމަށް އެ ބޯޑަރު ހުޅުވާލާފައިވަނީ މި މަހުގެ 6 ވަނަ ދުވަހު ރަފާހްގައި އޮންނަ އިންސާނީ އެހީތަކާއި ވިޔަފާރީގެ ސާމާނު ޣައްޒާއަށް ވަންނަ މި މައި ބޯޑަރުގެ ކޮންޓްރޯލް ޔަހޫދީ ފައުޖުން ނެގުމާއި ގުޅިގެން ޣައްޒާ އަށް އެހީ ވެއްދުން ތިން ހަފްތާ އަށް މެދުކެނޑުމަށްފަހުއެވެ.

އެކަމާއި ގުޅިގެން އެ ބޯޑަރުގެ ކައިރީގައި ހުރި އެހީގެ ސާމާނުތަކުގެ ތެރެއިން ބައެއް ކާބޯތަކެތި ކުނިވާން ފަށާފައިވާކަމަށް ރޮއިޓާސް އިން ރިޕޯޓް ކުރެއެވެ.

ކަރެމް ޝެލޮމް މަގުން ޣައްޒާއަށް އަލުން އެހީ ވައްދަން ފެށިއިރު، އެއްވެސް ހުރަހެއްނެތި އިންސާނީ އެހީ ޣައްޒާއަށް ފޯރުކޮށްދެވޭނެ މަގު ފަހިކޮށްދިނުމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން އިސްރާއީލުގެ މައްޗަށް އަމުރުކޮށްފައިވާކަން ފާހަގަކޮށްލަން ޖެހެއެވެ.