ހޮރުމޯޒް ކަނޑުއޮޅިން އެމެރިކާ އާ ގުޅުން އޮންނަ ތެއޮ ޓޭންކަރަކަށް އީރާނުން ހަމަލާދީފި
ލިޔުންތެރިޔާ
އަބްދުﷲ ހުސައިން
ހޮރުމޯޒް ކަނޑުއޮޅިން ދަތުރުކުރަމުންދިޔަ ތެއޮ ޓޭންކަރަކަށް އީރާނުން ހަމަލާދީފިކަމަށް އަލްޖަޒީރާއިން ރިޕޯޓްކޮށްފިއެވެ.
އަލްޖަޒީރާއިން ބުނީ ހަމަލާދީފައިވަނީ އެމެރިކާ އާ ގުޅުން އޮންނަ "އެތީ ނޯވާ" ކިޔާ ތެއޮ އުފުލާ ޓޭންކަރަކަށެވެ. އެ ތެއޮ ޓޭންކަރަށް ހަމަލާދިންކަން އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ޔަގީންކޮށްދީފައިވާ ކަމަށްވެސް އަލްޖަޒީރާއިން ބުންޏެވެ.
އައި.އާރު.ޖީ.ސީން ބުނެފައިވަނީ ޓޭންކަރަށް ހަމަލާދިނީ ޑްރޯން މެދުވެރިކޮށް ކަމަށާއި، ހަމަލާދިނުމަށްފަހު ޓޭންކަރުގައި ވަރަށްގަދައަށް އަލިފާން ރޯވިކަމަށެވެ. އައިއާރުޖީސީން ބުނެފައިވަނީ އެ ތެއޮ ޓޭންކަރަކީ އެމެރިކާ އާއި އެޤައުމުގެ ބައިވެރިންގެ އެއްޗެއް ކަމަށެވެ.
ހޮރުމޯޒް ކަނޑުއޮޅިން ދަތުރުކުރި ތެއޮ ޓޭންކަރަކަށް އީރާނުން ހަމަލާދީފައިވާއިރު، އެމެރިކާ އަދި އިސްރާއީލުން އިސްވެ އީރާނަށް ދިން ހަމަލާތަކާ ގުޅިގެން އެޤައުމުން ވަނީ ހޮރުމޯޒް ކަނޑުއޮޅިން ހުރަސްނުކުރުމަށް ބޯޓުތަކަށް އިންޒާރުދީފައެވެ. ހޮރްމޫޒް ކަނޑުއޮޅިއަކީ ދުނިޔޭގައި ވިޔަފާރިކުރާ ތެލުގެ ގާތްގަނޑަކަށް ފަސްބައިކުޅަ އެއްބައި އުފުލާ ކަނޑުއޮޅިއެވެ.
ދުނިޔޭގައި ދުވާލަކު ބޭނުންކުރާ ތެލުގެ 20 އިންސައްތަ ނުވަތަ ގާތްގަނޑަކަށް 20 މިލިއަން ފީފާ ތެޔޮ، ބޭރުކުރަނީ މި ކަނޑުއޮޅި މެދުވެރިކޮށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
