ކަޝްމީރުގައި އަނެއްކާވެސް ހަނގުރާމަވެރިންތަކެއް މަރާލައިފި

ހަނގުރާމަވެރިންކަމަށް އިންޑިއާއިން ތުހުމަތުކުރާ 3 މީހަކު އިންޑިއާ ސިފައިން ބަޑިޖަހާ މަރާލައިފިއެވެ.

ޖައްމު އަދި ކަޝްމީރުގެ ޕުލްވަމާގައި އިންޑިއާއިން މަރާލާފައިވަނީ ޖައިޝޭ މުހައްމަދު ކިޔާ ހަނގުރާމަވެރި ޖަމާއަތަށް ނިސްބަތްވާ ހަނގުރާމަވެރިންތަކެއްކަމަށް އިންޑިއާއިން ބުނެއެވެ. މިއަދު ހިންގި އޮޕަރޭޝަން އަދި އެއްކޮށް ނުނިމޭކަމަށާއި، އެއަށްވުރެ ގިނަ ހަނގުރާމަވެރިން ތިބެދާނެކަމަށް ބެލެވޭކަމަށް މެންދުރުފަހު އިންޑިއާ އޮފިޝަލުން މީޑިއާއަށް މައުލޫމާތު ދީފައިވެއެވެ.

މި އޮޕަރޭޝަން ހިންގާފައިވަނީ ޖާސޫސީ އިދާރާއަކުން ލިބުނު މައުލޫމާތަށް ބިނާކޮށް އިންޑިއާގެ އަސްކަރިއްޔާއާއި، ޖައްމު އަދި ކަޝްމީރުގެ ފުލުހުންނާއި ސެންޓްރަލް ރިޒަރވް ޕޮލިސް ފޯސް ގުޅިގެންނެވެ.

މި އޮޕަރޭޝަންގައި މަރާލި 3 މީހުންނަކީވެސް ޕާކިސްތާނުގެ ޖައިޝޭ މުހައްމަދަށް ނިސްބަތްވާ، އިންޑިއާ މީހުންނެވެ.

އަންގާރަ ދުވަހުވެސް އިންޑިއާގެ ސަލާމަތީ ބާރުތަކުން ހިންގި އޮޕަރޭޝަނެއްގައި ޝޮޕިއާންގައި ލަޝްކަރޭ ތައިބާއަށް ނިސްބަތްވާ ހަނގުރާމަވެރިންގެ 3 މީހަކު މަރާލާފައިވާކަމަށް އިންޑިއާއިން ބުނެއެވެ.