ބޮއިކޮޓާ ގުޅިގެން 1 މިލިޔަން ޑޮލަރަށްވުރެ ބޮޑު ގެއްލުންވެ މެލޭޝިޔާގެ މެކްޑޮނަލްޑްސް ކޯޓަށް!

ހައްދުފަހަނައަޅާފައިވާ އިސްރާއީލްގެ ޔަހޫދީން ފަލަސްޠީނުގެ މުސްލިމުންނާއި ދެކޮޅަށް ހިންގަމުންދާ ގަތުލު ޢާއްމާއި ގުޅިގެން، ޔަހޫދީންގެ ވިޔަފާރިތަކާއި މާލީ އެހީތެރިކަން ފޯރުކޮށްދޭ ވިޔަފާރިތައް ބޮއިކޮޓް ކުރަމަށް ގޮވާލާ ހިންގަމުންދާ ހަރަކާތްތަކާއި ގުޅިގެން މެލޭޝިޔާގައި ހިންގާ މެކްޑޮނަލްޑްސަށް މާލީ ގޮތުން ބޮޑެތި ގެއްލުންތަކެއް ލިބިފައިވާ ކަމަށް ބުނެ އޭގެ ބަދަލު ހޯދަން ކޯޓަށް ހުށަހަޅައިފިއެވެ.

ބައިނަލްއަޤުވާމީ ފާސްޓްފުޑް ޗެއިނެއް ކަމުގައިވާ މެކްޑޮނަލްޑްސް އަކީވެސް، ޔަހޫދީންނަަށް މާލީ އެހީތެރިކަން ފޯރުކޮށްދޭ ވިޔަފާރިއެއްގެ ކަމަށް ބުނެ، މުޅި ދުނިޔޭގައިވެސް ވަނީ މެކްޑޮނަލްޑްސް ބޯއިކޮޓް ކުރަން ގޮވާލާ އަޑުތައް ގަދަވެފައެވެ.

އެގޮތުން މެލޭޝިޔާ ގައިވެސް އެ އަޑުތައް ގަދަވެ، އެ ގައުމުގައި ހުންނަ މެކްޑޮނަލްޑްސް އަށް 1.31 މިލިޔަން އެމެރިކާ ޑޮލަރުގެ ގެއްލުމެއް ވެފައިވާ ކަމަށް މެލޭޝިޔާގައި އެ ވިޔަފާރި ކުރާ ގްރްބަންގް އަލަފް ރެސްޓޯރެންޓްސް ނަމަކަށް ކިޔާ ކުންފުނިން ވަނީ ބުނެފައެވެ.

އެހެންކަމުން، ޔަހޫދީންނާ ގުޅުންހުރި ވިޔަފާރިތައް ބޮއިކޮޓް ކުރަން ގޮވައިލާ މެލޭޝިޔާގެ މަދަނީ ޖަމުޢިއްޔާއެއް ކަމަށްވާ ބޮއިކޮޓް، ޑައިވެސްޓްމެންޓް އެންޑް ސެންކްޝަންސް (ބީޑީއެސް) އާ ދެކޮޅަށް ދަޢުވާ ކުރަން ކޯޓަށް ހުށަހަޅާފައިވާ ކަމަށް މެކްޑޮނަލްޑްސް މެލޭޝިޔާއިން ބުނެފައި ވެއެވެ.

އެގޮތުން ކޯޓަށް ހުށަހަޅާފައިވާ މައްސަލައިގައި ބުނެފައި ވަނީ، އެ ކުންފުންޏަށް ލިބެމުންދާ ގެއްލުންތަކުގެ އަސްލަކީ، ބީޑީއެސް ޖަމާޢަތުން ސޯޝަލް މީޑިޔާގައި ޝާއިޢު ކުރަމުންދާ ޕޯސްޓުތައް ކަމަށާ، އެ ޕޯސްޓުތަކުގައި، މެކްޑޮނަލްޑްސަކީ ޔަހޫދީންނާ ގުޅުން އޮންނަ، އަދި އެމީހުންނަށް ފަންޑު ކުރާ ނުވަތަ މާލީ ގޮތުން އެހީތެރިވާ، ކުންފުންޏެއް ކަމަށް ތުހުމަތު ކުރަމުންދާ ކަމަށެވެ.

އެ ޕޯސްޓުތަކާއި ގުޅިފެން މެކްޑޮނަލްޑްސް ކުންފުނިން ވިޔަފާރިކުރާ މީހުންގެ ޢަދަދު ބޮޑުތަނުން މަދުވެ، ވިޔަފާރީގެ ފައިދާ ދަށްވެ، މުވައްޒަފުންގެ ޢަދަދު މަދުކުރަން މަޖުބޫރުވެ، ބައެއް ރެސްޓޯރެންޓުތައް ބަންދު ކުރަންޖެހި، ރެސްޓޯރެންޓުތައް ހުޅުވާފައި ހުންނަ ވަގުތު މަދުކުރަން ޖެހިފައިވާ ކަމަށްވެސް މައްސަލާގައި ފާހަގަކޮށްފައިވެއެވެ.

އެހެންކަމުން، އޭގެ ބަދަލުގެ ގޮތުގައި ބީޑިއެސް އަތުން 1 މިލިއަން އަތުލަން މެކްޑޮނަލްޑްސް މެލޭޝިއާ އިން ވަނީ ދަޢުވާ ކޮށްފައެވެ.

މި މައްސަލަ އާއި ގުޅިގެން ބީޑިއެސް އިން ބޭރުގެ މީޑިއާ ތަކަށް މަޢުލޫމާތު ދެމުން ވަނީ، މެކްޑޮނަލްޑްސް މެލޭޝިޔާގެ އަގު ވައްޓައިލަން އެ ޖަމާޢަތުން މަސައްކަތް ކުރަމުންދާ ކަމަށް ބުނެ ކުރާ ތުހުމަތު ދޮގުކޮށްފައެވެ.

އަދި، އެ ޖަމިއްޔާގެ މަޤުޞަދަކީ ޔަހޫދީންގެ ވިޔަފާރިތަކަށް އޮތް ތާޢީދު ކުޑަކޮށް، ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޢުދުވާން ހުއްޓުވަން ބާރު އެޅުން ކަމަށްވެސް ބުނެފައިވެއެވެ.

މިއާއެކު އެ ޖަމިއްޔާއިން ވަނީ މި މައްސަލައިގައި ކޯޓުން ނިންމާ ގޮތަކަށް އިޙުތިރާމު ކުރާނެ ކަމަށް ބުނެފައެވެ.

ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 22,000އަށް އަރާފައެވެ.