އިސްރާއީލުން އަނެއްކާވެސް ފަލަސްތީނުގެ 3 މީހަކު ޝަހީދުކޮށްލައިފި

އިސްރާއީލުން ދިން ހަމަލާއެއްގާ ފަލަސްތީނުގެ 3 މީހަކު ޝަހީދުވެ، އެތައް ބަޔަކު ޒަޚަމްވެއްޖެއެވެ.

މި ހަމަލާތަށް ދީފައިވަނީ އިއްޔެގެ ވަގުތެއްގައެވެ. މިއީވެސް ހަމަލާ ހުއްޓާލުމުގެ އެއްބަސްވުމެއް ގާއިމުކޮށްފައި އޮތް ދަނޑިވަޅެއްގައި ދިން ހަމަލާއެކެވެ.

ރޮއިޓާސްއިން ޣައްޒާގެ ސިއްހަތާ ބެހޭ ވުޒާރާއާ ހަވާލާދީ ރިޕޯޓުކޮށްފައިވާ ގޮތުގައި، ގާޒާގެ އުތުރުގައިވާ ތުއްފާހު އަވަށުގެ އިރުމަތީ ފަރާތަށް އިސްރާއީލު ސިފައިން ބަޑިޖެހުމުގެ ސަބަބުން ދެ މީހަކު ޝަހީދުވިއެވެ. އަދި ދެކުނުގެ ސިޓީއެއް ކަމަށްވާ ޚާން ޔޫނިސްގައި ހިނގި އެހެން ހާދިސާއެއްގައި ތިންވަނަ މީހަކު ޝަހީދުވެފައިވާ ކަމަށްވެސް އެ ރިޕޯޓުގައިވެއެވެ. މީގެ އިތުރުން، ޣައްޒާގެ އެކި ސަރަހައްދުތަކުގައި ހިނގި މިފަދަ ހަމަލާތަކުގައި މަދުވެގެން ހަ މީހަކު ޒަޚަމްވެފައިވާ ކަމަށް ސިއްހީ އޮފިޝަލުން ބުނެއެވެ.

އިސްރާއީލުގެ އަސްކަރިއްޔާއިން ބުނެފައިވަނީ އެމީހުންގެ ސިފައިން ހަމަލާދިނީ ބޯޑަރު ސަރަހައްދުގައި އޮތް "ސަލާމަތީ ނުރައްކަލަކާ" ގުޅިގެން ކަމަށެވެ. އަދި ފަލަސްތީނުން ހާމަކުރި ބައެއް ތަފުސީލުތަކާ މެދު އެމީހުން ވަނީ ސުވާލުވެސް އުފައްދާފައެވެ. ނަމަވެސް، ހިނގި ހުރިހާ ހާދިސާތަކަކަށް ބަސްބުނުމަށް އިސްރާއީލުން އިންކާރު ކޮށްފައެވެ.

މި ހަމަލާތައް ދީފައިވަނީ މަސްތަކަކަށް ދެމިގެންދިޔަ ހަނގުރާމަ ހުއްޓުވައި، ޣައްޒާއަށް އިންސާނީ އެހީ ފޯރުކޮށްދިނުމަށްޓަކައި، ހަމަލާ ހުއްޓާލުމުގެ އެއްބަސްވުން ދެމެހެއްޓުމަށް މަސައްކަތް ކުރަމުންދާ ދަނޑިވަޅެއްގައެވެ.

އިސްރާއީލުން ވަނީ ފާއިތުވި ހަފުތާތަކުގައިވެސް މިފަދަ ހަމަލާތައް ޣައްޒާއަށް އަމާޒުކޮށްފައެވެ. މީގެ ސަބަބުން ފަލަސްތީނުގެ އާންމު ރައްޔިތުންނާއި، ނޫސްވެރިންނާއި އަދި ކުޑަކުދިން ހިމެނޭހެން ގިނަ ބަޔަކު ޝަހީދުވެ ޒަޚަމްވެފައިވެއެވެ. މިއީ ހަމަލާ ހުއްޓާލުމުގެ އެއްބަސްވުމަށް އޮތް ބޮޑު ގޮންޖެހުމަކަށް ވާއިރު، މަސްލަހަތު އިތުރަށް ގޯސްވެދާނެތީ އެހީދޭ ޖަމިއްޔާތަކާއި ޑިޕްލޮމެޓުން ދަނީ ކަންބޮޑުވުން ފާޅުކުރަމުންނެވެ.

އދ. އާއި ބައިނަލްއަގުވާމީ އެކި އިދާރާތަކުން ވަނީ ހުރިހާ ފަރާތްތަކަކުންވެސް ކެތްތެރިކަން އިސްކޮށް، ހަމަލާ ހުއްޓާލުމުގެ އެއްބަސްވުމަށް އިހުތިރާމު ކުރުމަށާއި އާންމު ރައްޔިތުން ރައްކާތެރިކުރުމަށް ގޮވާލާފައެވެ. އަދި މިފަދަ ހަމަލާތައް ތަކުރާރުވަމުންދާ ނަމަ، މިހާރުވެސް ހުއްޓިފައިވާ ސިޔާސީ އަދި އިންސާނީ އެހީގެ މަސައްކަތްތަކަށް ބޮޑެތި ހުރަސްތަކެއް ކުރިމަތިވެދާނެ ކަމުގެ އިންޒާރުވެސް ވަނީ ދީފައެވެ.