ސުމޫދު ފްލޮޓިއްލާއިން: އިޒްރޭލުން ކޮންމެ ވަގުތަކު ވެސް ޙަމަލާދީފާނެ

ނިރުބަވެރި ޔަހޫދީ ދައުލަތް އިޒްރޭލުން ޣައްޒާގައި ހިންގަމުންދާ ޤަތުލް ޢާންމު ހުއްޓުވައި، ޣައްޒާގެ ރައްޔިތުންނަށް ބޭނުންވާ އިންސާނީ އެހީތެރިކަން ފޯރުކޮށްދިނުމަށް ޣައްޒާއަށް ދަތުރުކުރަމުންދިޔަ ގްލޯބަލް ސުމޫދު ފްލޮޓިލާގެ ދެ އުޅަނދާ އިސްރާއީލުގެ އަސްކަރީ އުޅަނދުތަކުން ކުރިމަތިލައިފިއެވެ.

އެ އުޅަނދުތަކާއި އިޒްރޭލުގެ އަސްކަރީ އުޅަނދުތަކުން ކުރިމަތިލައިފައިވަނީ މިއަދުގެ ހެނދުނުގެ ވަގުތެއްގައެވެ. އެގޮތުން އަސްކަރީ އެ އުޅަނދުތަކުން ވަނީ ސުމޫދް ފްލޮޓިއްލާގެ ބޯޓުގެ މުވާސަލާތީ ނިޒާމުތަކަށް ހުރަސްއަޅައި، ނުރައްކާތެރި ޢަމަލުތަކެއް ހިންގައިފިއެވެ. އެގޮތުން އިޒްރޭލުން ހުރަސްއަޅައި ބިރުދައްކައިފައިވަނީ އަލްމާ އަދި ސިރިއަސް ނަމަކަށް ކިޔާ ދެ އުޅަނދަކަށެވެ.

ފާހަގަކުރެވޭ ގޮތުގައި ޔެލޯ ޒޯނު ފަހަނައަޅައި ފަލަސްތީނުގެ ސަރަޙައްދުތަކަށް އެ ބޯޓުތައް ވަނުމަށް މިހާރު ކައިރިވެފައިވާއިރު، މިވަގުތު ފްލޮޓިލާ ވަނީ ޣައްޒާއާއި ގާތްގަޑަކަށް 121 ނޯޓިކަލް މޭލު ދުރުގައެވެ. މިހާރު ވެސް އިޒްރޭލުގެ އަސްކަރީ ބޯޓުތަކުން ލައިޓުތައް ނިއްވައިގެން އެ ބޯޓުތަކާއި ކައިރިން ދަތުރުކޮށްފައިވާއިރު، ސުމޫދު ބޯޓުތަކާއި ކައިރިން އިޒްރޭލުގެ އަސްކަރީ ޑްރޯނުތައް ހަރަކާތްތެރިވާ ކަމަށް ވެސް ފްލޮޓިއްލާގެ ބައިވެރިން ދަނީ ބުނަމުންނެވެ.

އަދި އެއާއެކު ފްލޮޓިއްލާގެ ބޯޓުތަކުގެ އިންޓަނެޓް އަދި ރޭޑިއޯ ސިގްނަލްތަކަށް ދަތިކުރުން އިތުރުކުރަމުންދާއިރު، ކުރިޔަށް އޮތް ވަގުތުކޮޅުގެ ތެރޭގައި ކޮންމެ ވަގުތެއްގައި ވެސް ނިރުބަވެރި ދައުލަތުން އެ ބޯޓުތަކަށް ޙަމަލާދީފާނެ ކަމަށް ވެސް ފްލޮޓިއްލާގެ ބައިވެރިން ދަނީ ބުނަމުންނެވެ.

އެގޮތުން ފްލޮޓިއްލާގެ ބޯޓުތަކާއި ގާތްގަޑަކަށް 80 ކިލޯމީޓަރު ދުރުގައި އިޒްރޭލުގެ ނޭވީގެ އުޅަނދުތައް މިހާރު ވެސް ހަރަކާތްތެރިވަމުންދާކަމަށް އެ ބައިވެރިންވަނީ ބުނެފައެވެ.

ފާހަގަކުރެވޭ ގޮތުގައި އިޒްރޭލުން މިވަގުތު ފްލޮޓިއްލާގެ ބޯޓުތަކަށް ޙަމަލާދިން ނަމަވެސް، އެ ބޯޓުތަކުގެ ރައްކާތެރިކަން ކަށަވަރުކޮށްދިނުމަށް އެ ބޯޓުތަކާއި އެކީ ދަތުރުކުރަނީ ސްޕެއިންގެ މަނަވަރެއް އެކަންޏެވެ. ސުމޫގެ ބޯޓުތައް މީގެ ދެ ދުވަސްކުރިން ޔެލޯ ލައިން ހުރަސްކުރިފަހުން އޭރު އެ ބޯޓުތަކާއި އެކީ ދަތުރުކުރަމުން އައި އިޓަލީގެ މަނަވަރު ވަނީ އަނބުރާ ގޮސްފައެވެ.

ގްލޯބަލް ސުމޫދު ފްލޮޓިލާ ޣައްޒާއަށް ދަތުރުކުރަނީ އިޒްރޭލުން ޣައްޒާގެ މައްޗަށް އަޅާފައިވާ ބްލޮކޭޑަށް ގޮންޖެހުމުގެ ގޮތުންނެވެ. މީގެ ކުރިންވެސް ޣައްޒާއަށް ދަތުރުކުރި ފްލޮޓިލާތައް މެޑިޓަރޭނިއަން ކަނޑުގެ މިފަދަ ސަރަހައްދުތަކުގައި އިސްރާއީލުން ވަނީ ހުއްޓުވާފައެވެ.