ރާއްޖޭގައި މަރުވާ މީހުންގެ 84 އިންސައްތަ ހިއްސާކުރަނީ ހިތާއި ލޭހޮޅިތަކާ ގުޅުންހުރި ބަލިތަކުގައި

ރާއްޖޭގައި މަރުވާ މީހުންގެ ބޮޑު އިންސައްތައަކީ ހިތާއި ލޭހޮޅިތަކާ ގުޅުންހުރި ބަލިތަކުގައި މަރުވާ މީޙުންކަމަށް ހެލްތު ޕްރޮޓެކްޝަން އޭޖެންސީ، އެޗްޕީއޭއިްނ ބުނެފިއެވެ.

މިއަދު ފާހަގަކުރަމުންދާ ދުނިޔޭގެ ހިތުގެ ދުވަހާ ގުޅިގެން އެޗްޕީއޭއިން ނެރުނު ބަޔާނެއްގައި ބުނެފައިވަނީ، ހިތާއި ލޭހޮޅިތަކުގެ ބައްޔަކީ ގައިންގަޔަށް ނާރާ ބަލިތަކުގެ ތެރެއިން ދުނިޔޭގައި އެންމެ ގިނައިން މީހުން މަރުވާ އެއްބަލި ކަމަށެވެ. ރާއްޖޭގައި ވެސް ގައިންގަޔަށް ނާރާ ބަލިތައް ނިސްބަތުން ގިނަވާކަން ފާހަގަކުރަމުން އެޗްޕީއޭއިން ބުނީ ރާއްޖޭގައި މަރުވާ މީހުންގެ %84 އަކީ މިފަދަ ބަލިތައް ތަޙައްމަލު ކުރާ މީހުން ކަމަށެވެ. ގައިންގަޔަށް ނާރާ ބަލިތަކުގެ ހިރާސްތައް ދެނެގަތުމުށް ހެދުނު "ނޮން ކޮމިއުނިކަބްލް ޑިޒީޒް ރިސްކް ފެކްޓަރ ސަރވޭ 2020 -2021" ދައްކާ ގޮތުގައި ރާއްޖޭގައި 15 އަހަރާއި 65 އަހަރާ ދެމެދުގެ %4.7 މީހުންނަކީ ހިތުގެ ބަލި، ސްޓްރޯކް އަދި އެންޖީނާ ފަދަ ބަލިތައް ޖެހިފައިވާ މީހުން ކަމަށް މި ބަޔާނުގައި ވަނީ ފާހަގަކޮށްފައެވެ.

ތަފާސްހިސާބުތައް ދައްކާ ގޮތުން ގައިންގަޔަށް ނާރާ ބަލިތަކުގައި މަރުވާ މީހުންގެ ތެރެއިން 36 އިންސައްތަ މީހުންގެ ފުރާނަ ގެއްލެނީ ސީދާ ހިތުގެ ބަލިތަކުގެ ސަބަބުންނެވެ. ސިއްހީ ވުޒާރާގެ 2020 ވަނަ އަހަރުގެ ތަފާސްހިސާބުތައް ބުނާ ގޮތުގައި އެ އަހަރު 18 އަހަރުން މަތީގެ މީހުންގެ ތެރެއިން އެންމެ ގިނަ ބަޔަކު މި ދުނިޔެ ދޫކުރީ ހިތާއި ލޭހޮޅިތަކުގެ ބަލިތަކުގައެވެ. ޖުމުލަ މަރުގެ 50 އިންސައްތައަކީ މި ބާވަތުގެ ބަލިތަކެވެ. ހޮސްޕިޓަލުގައި އެނދުމަތިކޮށްގެން އެ އަހަރު އެންމެ ގިނައިން ފަރުވާ ދީފައިވަނީ ވެސް ހިތުގެ ބަލީގެ މީހުންނަށް ކަމަށް ތަފާސްހިސާބުތަކުން ދައްކައެވެ.

ހިތުގެ ބައްޔަކީ ހަމައެކަނި ދޮށީ ޢުމުރުގެ މީހުންނަށް ކުރިމަތިވާ ކަމެއް ނޫންކަން 2020 ގެ ހިސާބުތަކުން ސާފުވެއެވެ. ހިތުގެ މައްސަލަތަކުގައި އެނދުމަތިކުރި މީހުންގެ ތެރޭގައި 25 އަހަރާއި 34 އަހަރާ ދެމެދުގެ ޒުވާނުން ވެސް ހިމެނޭ ކަމަށް އެ ހިސާބުތައް ދައްކައެވެ. މި ނުރައްކާ ބައްޓަންވާން ފެށެނީ ހާޓްއެޓޭކެއް ޖެހުމުގެ މާ ކުރިންނެވެ. ރާއްޖޭގައި 2020 އިން 2021 އަށް ހިންގި ސްޓެޕްސް ސާވޭއިން ދައްކާ ގޮތުގައި އާބާދީގެ 23.9 އިންސައްތައަކީ ލޭ މައްޗަށްދާ މީހުންނެވެ. އެހެން ނަމަވެސް، އޭގެ ތެރެއިން ފަރުވާ ހޯދަމުން ދިޔައީ އެންމެ 16.3 އިންސައްތަ މީހުންނެވެ. ލޭ މައްޗަށް ދިއުމަކީ އެއްވެސް ޢަލާމާތެއް ނުފެނި ހިތާއި ސިކުނޑީގެ ނާރުތަކަށް ގެއްލުންދޭ ކަމެއް ކަމަށް ޑަބްލިއުއެޗްއޯއިން ފާހަގަކޮށްފައިވެއެވެ.