ޣައްޒާގެ ރައްޔިތުން ބަނޑުހައިހޫނު ކަމުގައި؛ އުންރުވާއިން ޣައްޒާއަށް އެހީ ފޯރުކޮށްދިނުން މެދުކަނޑާލައިފި

އދ ގެ ފަލަސްތީނުގެ ރެފިއުޖީންގެ ހައްގުތަކަށް މަސައްކަތްކުރާ ޖަމިއްޔާއިން، ކަރެމް އަބޫ ޝަލަމް މެދުވެރިކޮށް ޣައްޒާއަށް އެހީ ފޯރުކޮށްދިނުން މެދުކަނޑާލައިފިއެވެ.

މިކަން ހާމަކުރައްވާ އުންރަވާގެ ވެރިޔާ ފިލިޕް ލައްޒާރިނީ އެކްސްގައި ކުރެއްވި ޕޯސްޓެއްގައި ވިދާޅުވީ، އެ ބޯޑަރު ރައްކާތެރި ނޫންކަމަށާއި، މިދިޔަ ނޮވެންބަރު މަހުގެ 16 ވަނަ ދުވަހު، ޣައްޒާއަށް ފޮނުވި އެހީ ޓްރަކްތަކެއް ހަތިޔާރު އެޅި ބަޔަކު އަތުލައިގެންފައިވާކަމަށެވެ.

ޣައްޒާގައި ބަނޑުހައި ހޫނުކަން އިންތިހާއަށް އިތުރުވެފައިވާކަމަށާއި، އެކަމަށްޓަކައި ފިޔަވަޅު އެޅުމަށް ބާރު އަޅުއްވަމުން ލައްޒާރިނީ ވިދާޅުވީ، އިސްރާއީލުން ޣައްޒާގައި ހިންގަމުންދާ އުދުވާނާއި އިސްރާއީލުން ކުރިމަތިކުރުވަމުންދާ ފިއްތުންތަކުގެ ސަބަބުން ގައްޒާއަށް އެހީ ވެއްދުމަކީ އުނދަގޫކަމެއް ކަމަށެވެ.

މިއާއިއެކު،  ލައްޒާރިނީ ވަނީ ޣައްޒާއަށް ދެމުންގެންދާ ލާއިންސާނީ ހަމަލާތަކާއި އިންސާނީ އެހީތެރިކަން ފޯރުކޮށްދޭ މީހުންނަށް އަމާޒުކޮށް ހަމަލާދިނުން ވެސް ހުއްޓާލުމަށް ގޮވާލައްވާފައެވެ.

އުންރުވާއިން ހާމަކުރި ގޮތުގައި، މިއަހަރުގެ އޮކްޓޫބަރު މަހުގެ 6 ވަނަ ދުވަހުން ފެށިގެން ނޮވެމްބަރު މަހުގެ 26 ވަނަ ދުވަހާއި ހަމައަށް 91 ފަހަރު ޣައްޒާއަށް އެހީ ވައްދަން މަސައްކަތްކޮށްފައިވާއިރު، އޭގެ ތެރެއިން 82 ފަހަރު ވަނީ ޔަހޫދީ ފައުޖގެ ސަބަބުން ނާކާމިޔާބީ އާއި ކުރިމަތިލާން ޖެހިފައެވެ.