ފައްޔާޒު އޭސީސީއަށް ހާޒިރުކުރަނީ، ވިދާޅުވީ އިންސާފުވެރި ނުވާނެ ކަމަށް

އޭސީސީގެ ތަހުގީގަކަށް ހާޒިރުވުމަށް އެމްޑީޕީގެ ޗެއާޕާސަން އަދި ކުރީގެ އިކޮމިކް މިނިސްޓަރު ފައްޔާޒު އިސްމާއީލަށް އަންގާަ ޗިޓް ފޮނުވައިފި އެވެ.

އޭސީސީން ބަލަނީ ކުންފުންޏަކަށް އެކަށީގެންނުވާ ބަދަލެއް ދިނުމުގައި މަގާމުގެ ހައިސިއްޔަތު ނަހަމަގޮތުގައި ބޭނުންކުރުމުގެ ތުހުމަތާއި ގުޅިގެން ހިންގާ ތަހުގީގަށެވެ. އެއީ ސްވިފްޓް އިންޖިނިއަރިންއަށް ބަދަލު ދިން މައްސަލައެވެ. އެ ކުންފުންޏަކަށް އެކަށީގެންނުވާ ބަދަލެއް ދީފައިވަނީ ފައްޔާޒުގެ ނުފޫޒުގައި ކަަމަށް ތުހުމަތު ކޮށްފައިވެ އެވެ.

އެކަމާއި ގުޅިގެން ފައްޔާޒް ވިދާޅުވީ އޭސީސީގެ ތަހުގީގަށް ހާޒިރުވާން ޗިޓެއް މިއަދު ލިބިއްޖެ ކަމަށެވެ. އަދި ތުހުމަތު ދޮގު ކުރައްވާ ވިދާޅުވީ ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް ދައުލަތަށް ގެއްލުން ލިބޭ ގޮތަށް އަމަލުކޮށްފައި ނޯންނާނެ ކަމަށެވެ.

ފައްޔާޒް ވިދާޅުވީ އިންސާފުވެރި ތަހުގީގެއް އޭސީސީން ކުރާނެ އަދި ކުރެވޭނެ ކަމަށް މިއަދު ގަބޫލު ނުކުރާ ކަމަށެވެ.

"ފާއިތުވި ދެ އަހަރަކީ [ރައީސް] މުއިއްޒު ސަރުކާރުން ދައުލަތުގެ ފާރަވެރިވުމުގެ ނިޒާމު އެއްކޮށް ފުނޑާލި ދެ އަހަރު. ވަޒީފާގެ ޔަގީންކަން ހޯދުމަށް ޒިންމާދާރު މަގާމުތަކުގައި ތިބި މީހުން މުއިއްޒު އަންގަވާހާ ގޮތަކަށް ކަންކަން ކުރަމުން އަންނަކަން ދިވެހިންނަށް ވަރަށް ސާފު. ސިޔާސީ ނުފޫޒުގައި ޖެހި ވަކި އަތަކަށް ޖެހިގެން ތަހުގީގު ހިންގާ މީހުންނާ ގާނޫނު އަރާ ހަމަކުރާނެ," ފައްްޔާޒް ވިދާޅުވި އެވެ.

އަދި ވިދާޅުވީ ރައީސް މުއިއްޒު ކަހަލަ ޚުދުމުހުތާރު، އަނިޔާވެރި ބޭފުޅަކު ވެރިކަމާ ހަވާލުވުމުން މިހާރުމާބޮޑަށްވެސް ސާފުވެގެން ދަނީ ގާނޫނުއަސާސީއަށް ބަދަލުތަކެއް ގެންނަން ޖެހިފައިވާ ކަން ކަަމަށެވެ. މިނިވަން މުއައްސަސާތައް ހަގީގަތުގައިވެސް މިނިވަންކުރަން ޖެހިފައިވުމުގެ މުހިންމުކަން ކަމުގަ އެވެ.

"މުޅި ދައުލަތް ބޭނުންކޮށްގެން ބިރު ދައްކައި ފަހަތަށް ޖެއްސުމަށް މަސައްކަތް ކުރި ނަމަވެސް އަދި އަޅުގަނޑުމެން އެންމެން ޖަލަށްލީނަމަވެސް ޑިމޮކްރަޓިކް ރާއްޖެއެއް ބިނާކޮށް ރައްޔިތުންނަށް އަސާސީހައްގުތައް އަނެއްކާވެސް ކަށަވަރުކޮށްދޭން ކުރާންޖެހޭ މަސައްކަތް ކުރުމުގައި ރައްޔިތުން ފަހަތަކަށް ނުޖެއްސޭނެ," ފައްޔާޒް ވިދާޅުވި އެވެ.