ޒަކާތުގެ ގޮތުގައި މިދިޔަ އަހަރު 107 މިލިއަނަށް ވުރެ ގިނަ ރުފިޔާ

ނިމިގެންދިޔަ 2025 ވަނަ އަހަރު ޒަކާތުގެ ގޮތުގައި 107 މިލިއަަނަށް ވުރެ ގިނަ ރުފިޔާ ލިބިފައިވާކަމަށް މޯލްޑިވްސް އިންލަންޑް ރެވެނިއު އޮތޯރިޓީގެ ތަފާސްހިސާބުތަކުން ދައްކައިފިއެވެ.

ދައުލަތުގެ ޓެކްސް އިދާރާ، މީރާ އިން ނެރެފައިވާ މިދިޔަ އަހަރުގެ ތަފާސްހިސާބުތަކަށް ބަލާއިރު، 2025 ވަނަ އަހަރުގެ ޑިސެންބަރު މަހުގެ ނިޔަލަށް ޒަކާތުގެ ގޮތުގައި 107،205،043 ރުފިޔާ ލިބިފައިވެއެވެ. 2024 ވަނަ އަހަރު ޒަކާތުގެ ގޮތުގައި ލިބިފައިވަނީ 102،281،507 ރުފިޔާއެވެ. އެހެންކަމުން 2025 ވަނަ އަހަރު ޒަކާތުގެ ގޮތުގައި ލިބިފައިވާ ފައިސާއަކީ 4.81 އިންސައްތަ އިތުރުވުމެކެވެ.

މިދިޔަ އަހަރު ޒަކާތުގެ ގޮތުގައި އެންމެ ގިނައިން ފައިސާ ލިބިފައިވަނީ ރަމަޟާން މަހުގެ ތެރޭގައެވެ. އެއީ މާޗުމަހުއެވެ. އެމަހު ޒަކާތުގެ ގޮތުގައި 23,593,141 ރުފިޔާ ލިބިިފައެވެ.

ޒަކާތުގެ ނިޒާމް ހަރުދާނާކުރުމަށްސަރުކާރުން ވަނީ މުހިންމު ފިޔަވަޅުތަކެއް އަޅާފައެވެ. އެގޮތުން މިނިސްޓްރީ އޮފް އިސްލާމިކް އެފެއާޒްގެ ދަށުން ހިންގަމުން އައި މޯލްޑިވްސް ޒަކާތު ހައުސް އުވާލައި ހުސްވި ޑިސެންބަރުމަހުގެ 6 ވަނަ ދުވަހު ޒަކާތު އައު ބިލެއް ތަސްދީގު ކުރައްވައި އެ ގާނޫނުގެ ދަށުން، މިނިސްޓްރީ އޮފް އިސްލާމިކް އެފެއާޒްގެ ދަށުން ހިނގަމުންދާ އިދާރާއެއްގެ ގޮތުގައި، މޯލްޑިވްސް ޒަކާތު ހައުސްގެ ނަމުގައި ވަނީ ހާއްސަ އިދާރާއެއް ގާއިމުކޮށްފައެވެ.

ޒަކާތު ބިލުގެ މަގުސަދަކީ އިސްލާމްދީނުގައި ޒަކާތް ޝަރުއުކުރައްވާފައިވާ މަގުސަދުތައް ހާސިލުކުރެވޭނެ ގޮތެއްގެމަތިން ދިވެހިރާއްޖޭގައި ޒަކާތް ދެއްކުމާއި ބަލައިގަތުމާއި، ޒަކާތުގެ ގޮތުގައި ލިބޭ މުދަލާއި ފައިސާ ބެހުމުގެ ކަންކަން ހިންގައި ބެލެހެއްޓުން ހަރުދަނާ ގޮތެއްގައި އިންތިޒާމުކޮށް ތަރުތީބު ކުރުމަށްޓަކައި، ދިވެހިރާއްޖޭގެ ޒަކާތުގެ ނިޒާމުގެ ގާނޫނީ އޮނިގަނޑު ބަޔާންކޮށް، ޒަކާތާގުޅޭ ހަމަތަކާއި އުސޫލުތައް ކަނޑައެޅުމެވެ. މި ގާނުނަށް މިއަހަރުގެ ތެރޭގައި އަމަލުކުރަން ފަށާނެއެވެ.