ރޮނާލްޑޯ ބުނީ ރިޓަޔާ ކުރާނެ އިރު ކަނޑައަޅާނީ އަމިއްލައަށް ކަމަށް

ރިޓަޔާ ކުރާނެ އިރެއް ކަނޑައެޅުމަކީ ހަމައެކަނި އޭނާގެ ނިންމުމެއް ކަމަށް އުމުރުން 41 އަހަރުގެ ކްރިސްޓިއާނޯ ރޮނާލްޑޯ ބުނެފިއެވެ.

އޭނާ މިފަދައިން ބުނީ، ވޯލްޑް ކަޕް ރައުންޑް އޮފް 16 ގައި ސްޕެއިންއާ ދެކޮޅަށް ކުޅުމުގެ ކުރިން ބޭއްވި ނޫސްވެރިންގެ ބައްދަލުވުމުގައެވެ.

އޭޓީ އެންޑް ޓީ ސްޓޭޑިއަމްގައި ބޭއްވި މި ނޫސްވެރިންގެ ބައްދަލުވުމުގައި ރޮނާލްޑޯ ވަނީ އޭނާއަށް އަމާޒުވާ ފާޑުކިޔުންތަކާއި އުމުރާއި ފޯމާ ބެހޭ ގޮތުން ވާހަކަ ދައްކައިފައެވެ.

"ފާއިތުވެ ދިޔަ 23 އަހަރު ތެރޭގައި ތިޔައިން ބައެއް ނޫސްވެރިން މަސައްކަތް ކުރީ އަހަރެން ނައްތައިލަން. އެކަމަކު އެއީ ބޭކާރު ކަމެއްކަން މިހާރު އެނގޭނެ" ކަމަށް ރޮނާލްޑޯ ބުންޏެވެ.

އަދި 40 އަހަރު ފުރުމަށް ފަހުވެސް އަމާޒުވާ ފާޑުކިޔުންތަކާ މެދު ޝުކުރުވެރިވާ ކަމަށާއި "ފާޑުކިޔުމަކީ ކުރިއެރުމަށް މަގުފަހިވާ ކަމެއް" ކަމަށް ވެސް އޭނާ ބުންޏެވެ.

މިއީ އެންމެ ފަހު ވޯލްޑް ކަޕް ކަމަށް ރޮނާލްޑޯ ކަށަވަރުކޮށްދިން ނަމަވެސް ޕޯޗުގަލް ޓީމުން ވަކިވާނެ ސީދާ ވަގުތެއް ބުނަން އޭނާ ދެކޮޅު ހެދިއެވެ.

"އަހަރެން ރިޓަޔާ ކުރާނީ އަހަރެން ބޭނުންވީމައި ތިޔަ ބޭފުޅުން ބޭނުންވީމައެއް ނޫން. ކުޅުނަސް ބެންޗުގައި ހުއްޓަސް ނުފޫޒު ބަދަލެއް ނުވާނެ" ކަމަށް ރޮނާލްޑޯ ބުންޏެވެ.

ކުރީގެ ހުރި ފެންވަރު މިހާރު ނެތް ކަމަށް ރޮނާލްޑޯ އެއްބަސްވި ނަމަވެސް "އެހާ ގޯސް ކޮށެއް ވެސް ނޫން މި ކުޅެނީ" ކަމަށް ހިނިތުންވެ ހުރެ ބުންޏެވެ.

މި ވޯލްޑް ކަޕްގައި ރޮނާލްޑޯ ވަނީ ތިން ގޯލް ޖަހައިފައެވެ. އެއީ އުޒްބެކިސްތާން އަތުން 5-0 އިން މޮޅުވި މެޗުގައި ދެ ގޯލާއި ކްރޮއޭޝިއާ އަތުން 2-1 އިން މޮޅުވި މެޗުގައި ޕެނެލްޓީއަކުން ޖެހި ގޯލެވެ.

"މާދަމާ ކޮންމެ ނަތީޖާއެއް ނުކުތަސް ކްރިސްޓިއާނޯ ރޮނާލްޑޯ ދާނީ ހިތް ހަމަޖެހިގެން. ސަތޭކަ ޕަސެންޓެއް ނޫން ހާސް ޕަސެންޓް. ދިރިއުޅުމުގައި ވެސް ފުޓުބޯޅައިގައި ވެސް ދެވެން އޮތް ހުރިހާ އެއްޗެއް ދީފިން" އޭނާ ބުންޏެވެ.

ޕޯޗުގަލް އާއި ސްޕެއިން ހޯމަ ދުވަހު ބައްދަލުކުރާ މެޗަކީ ރޮނާލްޑޯގެ ވޯލްޑް ކަޕް ކެރިއަރުގެ ފަހު މެޗަށް ވެދާނެއެވެ. ސްޕެއިން ވަނީ މި މުބާރާތުގައި މިހާތަނަށް ގޯލެއް ނުވައްދައި ކްލީން ޝީޓް ދަމަހައްޓައިފައެވެ.