އޮސްޓްރޭލިއާގެ 500 އަށްވުރެ ގިނަ ފިއުލް ސްޓޭޝަނުން ތެޔޮ ހުސްވެއްޖެ

އޮސްޓްރޭލިއާއަށް ކުރިމަތިވެފައިވާ ތެލުގެ ދަތިކަން އިތުރަށް ގޯސްވެ، އެ ގައުމުގެ އެކި ސަރަހައްދުތަކުގައި ހުރި 500 އަށްވުރެ ގިނަ ފިއުލް ސްޓޭޝަންތަކުން ތެޔޮ ހުސްވެއްޖެ ކަމަށް ރަސްމީ ތަފާސްހިސާބުތަކުން ދައްކައިފިއެވެ.

މި ހާލަތާއި ގުޅޭ އެންމެ ފަހުގެ ރިޕޯޓްތަކަށް ބަލާއިރު، ޖުމްލަ 187 ސަރވިސް ސްޓޭޝަނަކުން ޑީސަލް ވަނީ މުޅިން ހުސްވެފައެވެ. ޑީސަލަކީ މުދާ އުފުލާ ބޮޑެތި އުޅަނދުތަކާއި ސިނާއީ މަސައްކަތްތަކަށް ކޮންމެހެން ބޭނުންތެރި ބާވަތަކަށް ވާތީ، މީގެ ސަބަބުން އިގްތިސާދީ ގޮތުން ނޭދެވޭ އަސަރުތަކެއް ކުރަމުންދާކަން ފާހަގަކުރެވެއެވެ.

ތެލުގެ ދަތިކަން އެންމެ ބޮޑުވި ތަންތަނުގެ ތެރޭގައި ހިމެނޭ 32 ސަރވިސް ސްޓޭޝަނަކުން މިހާރު ވަނީ ހުރިހާ ބާވަތެއްގެ ތެޔޮ މުޅިން ހުސްވެފައެވެ. މީގެ ތެރޭގައި ޕެޓްރޯލާއި ޑީސަލްގެ އިތުރުން އެހެނިހެން ފިއުލްގެ ބާވަތްތައް ވެސް ހިމެނޭއިރު، އެ ތަންތަނުން ހިދުމަތް ދިނުން މިހާރު ވަނީ ވަގުތީ ގޮތުން މެދުކަނޑާލާފައެވެ.

މި މައްސަލަ ދިމާވުމާއެކު އޮސްޓްރޭލިއާގެ ގިނަ ސަރަހައްދުތަކެއްގައި ކިއުތައް ދަމާލާފައިވާއިރު، ސަރުކާރުން ދަނީ މި ހާލަތު ކޮންޓްރޯލް ކުރުމަށް މަސައްކަތް ކުރަމުންނެވެ. ތެލުގެ ސަޕްލައި މެދުކެނޑިފައިވަނީ މެދުއިރުމަތީގައި ހިނގަމުންދާ ހަނގުރާމައާއި ގުޅިގެން ތެޔޮ އުފުލާ ބޯޓުތަކަށް ހޯރްމޫޒް ކަނޑުއޮޅި ހުރަސް ނުކުރެވިގެންނެވެ. އެގޮތުން އޮސްޓްރޭލިއާގެ 90 އިންސައްތަ ތެޔޮ އެތެރެ ކުރަނީ މެދުއިރުމަތީ ގައުމުތަކުންނެވެ.

ކަމާބެހޭ މާހިރުން ވިދާޅުވާ ގޮތުގައި މި ދަތިކަން ހައްލުކުރުމަށްޓަކައި އިތުރު ސަޕްލައި ލިބެންދެން ވަގުތު ނަގާނެއެވެ. މިހާރު ތެޔޮ ހުސްވެފައިވާ ސްޓޭޝަންތަކަށް އަލުން ތެޔޮ ފޯރުކޮށްދިނުމުގެ މަސައްކަތް އިސްކަންދީގެން ކުރިއަށްދާއިރު، އާންމުންނަށް ބޭނުންވާ ޒަރޫރީ ހިދުމަތްތައް މެދުނުކެނޑި ކުރިއަށް ގެންދިއުމަށް ހާއްސަ ފިޔަވަޅުތަކެއް އޮސްޓްރޭލިއާގެ ސަރުކާރުން ދަނީ އަޅަމުންނެވެ.