ތަޢުލީމީ ސަނަދުތަކާ ގުޅިގެން ސުވާލުތައް އަމާޒުވުމާއެކު، ލަންކާގެ މަޖިލީހުގެ ރައީސް އިސްތިއުފާ ދެއްވައިފި

ލަންކާގެ މަޖިލީހުގެ ރައީސް އަސޯކާ ރަންވަލާގެ ތައުލީމީ ސަނަދު ތަކާއި ގުޅޭގޮތުން ބޮޑެތި ސުވާލުތަކެއް އުފެދިފައިވަނިކޮށް މަގާމުން އިސްތިއުފާ ދެއްވައިފިއެވެ.

ރަންވަލާ އިސްތިއުފާ ދެއްވާފައިވަނީ އޭނާ ޖަޕާނުގެ ވަސެދާ ޔުނިވަރސިޓީން ޑޮކްޓަރޭޓެއް އަދި މޮރަޓުވާ ޔުނިވަރސިޓީން ކެމިކަލް އިންޖިނިއަރިންގ ޑިގްރީއެއް ހާސިލުކުރައްވާފައިވާ ކަމަށް ދައްކުވައިދޭ ލިޔެކިޔުންތައް ނެތްކަމަށް ބުނެ އުފެދުނު ސުވާލުތަކާ ގުޅިގެންނެވެ.

މަގާމުން އިސްތިއުފާ ދެއްވިކަން އިއުލާން ކުރައްވަައި ރަންވަލާ ވިދާޅުވީ އޭނާ އެއްވެސް ދޮގު މަޢުލޫމާތެއް ދެއްވާފައި ނުވާ ކަމަށާއި، ނަމަވެސް މިވަގުތު ބައެއް ލިޔެކިޔުންތައް ނެތުމުގެ ސަބަބުން ތަޢުލީމީ ސަނަދުތައް ސާބިތުކޮށްދިނުމަށް ދަތިވާ ކަމަށެވެ.

"އަޅުގަނޑު ޑޮކްޓަރޭޓް ހާސިލުކުރި ޖަޕާނުގެ ވަސެދާ ޔުނިވަރސިޓީއާ ގުޅުންހުރި ރިސަރޗް އިންސްޓިޓިއުޓްތަކުން ތަޢުލީމީ ލިޔެކިޔުންތައް ހުށަހަޅަން ގަސްދުކުރަން،" އޭނާ ވިދާޅުވިއެވެ.

ނަމަވެސް، މިހާރުގެ ހާލަތަށް ރިޢާޔަތްކޮށް، އަދި ރައްޔިތުން ސަރުކާރަށް ކުރާ އިތުބާރު ގެއްލެން ބޭނުން ނުވާތީ އިސްތިއުފާ ދެއްވާ ކަމަށް ރަންވަލާ ވިދާޅުވިއެވެ.

މި މައްސަލަ ހޫނު ވެގެން ދިޔައީ އިދިކޮޅު ޕާޓީ ސަމަގި ޖަނަ ބަލަވެގަޔާއިން (އެސްޖޭބީ) ރަންވަލާއާ ދެކޮޅަށް އިތުބާރު ނެތްކަމުގެ ވޯޓެއް ހުށަހެޅުމާ ގުޅިގެންނެވެ. މި ހުށަހެޅުމުގައި ރަންވަލާ ޑޮކްޓަރޭޓަކާއި ކެމިކަލް އިންޖިނިއަރިންގ ޑިގްރީއެއް ހާސިލުކުރައްވާފައިވާ ކަމަށް ވިދާޅުވެ ރައްޔިތުންނަށް އޮޅުވާލާފައިވާ ކަމަށް ތުހުމަތުކޮށްފައިވެއެވެ.

ކުރީގައި ރަންވަލާގެ ތަޢުލީމީ ސަނަދުތަކުގެ މަޢުލޫމާތު އޭނާގެ ލިންކްޑްއިން ޕްރޮފައިލްގައި އަދި ޕާލިމެންޓުގެ ރަސްމީ ވެބްސައިޓުގައި ހިމަނާފައިވެއެވެ. އޭގައި އޭނާ ވަސެދާ ޔުނިވަރސިޓީން ބަޔޯކެމިސްޓްރީގެ ޕީއެޗްޑީއެއް އަދި މޮރަޓުވާ ޔުނިވަރސިޓީން ކެމިކަލް އިންޖިނިއަރިންގ ޑިގްރީއެއް ހާސިލުކުރައްވާފައިވާ ކަމަށް ބަޔާންކޮށްފައިވެއެވެ.

ނަމަވެސް، މި މަޢުލޫމާތުތަކުގެ ޞައްޙަކަމާމެދު ސުވާލު އުފެދި، އާންމުންގެ ފާޑުކިޔުންތައް އިތުރުވުމާ ގުޅިގެން، އޭނާގެ ޕްރޮފައިލް އަޕްޑޭޓްކޮށް، "ޑރ." މަޤާމު ނަން އުނިކޮށް، ހަމައެކަނި "އަސޯކާ ރަންވަލާ އެމްޕީ" ގެ ގޮތުގައި ބަދަލުކޮށްފައިވެއެވެ.

ފެކްޓް ޗެކިންގ ޖަމްޢިއްޔާއެއް ކަމަށްވާ ފެކްޓްކްރެސެންޑޯއިން ސުވާލު އުފެއްދުމާ ގުޅިގެން، ރަންވަލާ ވަނީ އޭނާ މޮރަޓުވާ ޔުނިވަރސިޓީން ޑިގްރީއެއް ހާސިލުކުރައްވާފައި ނުވާކަން އެއްބަސްވެ ވަޑައިގެންފައެވެ. މިއީ އޭނާ ކުރިން ދެއްވާފައިވާ މަޢުލޫމާތާ ފުށުއަރާ ކަމެކެވެ.