މިސްކިތްތަކުގެ ބިލްތަކަށް ދައްކަންޖެހޭ ފައިސާގެ ތެރެއިން 50 މިލިއަނަށްވުރެ ގިނަ ރުފިޔާ ދައްކައިފިން: ޝަހީމް

މި ސަރުކާރު ވެރިކަމާ ހަވާލުވިފަހުން މިވީ ދުވަސްތަކުގެ ތެރޭގައި މިސްކިތްތަކުގެ ބިލްތަކަށް ދައްކަންޖެހޭ ފައިސާގެ ތެރެއިން 50 މިލިއަނަށްވުރެ ގިނަ ރުފިޔާ ދައްކާފައި ވާނޭކަމަށް އިސްލާމިކް މިިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ރާއްޖޭގައި ހުރި މިސްކިތްތަކުގެ ބިލްތަކުގެ ތެރެއިން އެންމެ ގިނަ ފައިސާ ދައްކަންޖެހެނީ ކަރަންޓް ބިލްތަކެވެ. ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އިސްލާމިކް މިނިސްޓްރީން ކުރަމުންގެންދާ މަސައްކަތްތަކާއި އަދި ހާސިލްވި ކަންކަމާ ބެހޭ މައުލޫމާތު ހިއްސާކުރައްވަމުން މިނިސްޓަރު ޝަހީމް ވިދާޅުވީ މި ސަރުކާރު ވެރިކަމާ ހަވާލުވުމަށްފަހު މިވީ ދުވަސްތަކުގައި މިސްކިތްތަކުގެ ބިލްތަކަށް އެކަނިވެސް 50.07 މިލިއަން ރުފިޔާ ހޭދަކޮށްފައިވާކަމަށެވެ.

އިސްލާމިކް މިނިސްޓްރީން މިއަހަރުގެ މިހާތަނަށް އިންސާނިއްޔަތަށް ކުރި ހޭދަތަކާ ބެހޭގޮތުން ވާހަކަދައްކަވަމުން ޝަހީމް ވަނީ ޒަކާތު ފަންޑުން ބޯންމެރޯ ހެދުމަށާއި، އަދި ފަލަސްތީނުގައި ހާލުގައި ޖެހިފައިވާ މުސްލިމުންނަށް އެހީވުމަށް ހޭދަކޮށްފައިވާކަމަށެވެ.

މިގޮތުން ޒަކާތު ފަންޑުން ތެލަސީމިއާ ކުދިންގެ ބޯންމެރޯގެ ހެއްދުމަށް ހެލްތު މިނިސްޓްރީއަށް 10 މިލިއަން ރުފިޔާ ހަވާލުކޮށްފައިވާކަން ޝަހީމް ފާހަގަކުރެއްވިއެވެ. މީގެ އިތުރުން ފަލަސްތީނަށް އެހީވުމަށް ގަތަރުގެ ރެޑްކްރޮސް އާ 100،000 ޑޮލަރު ހަވާލުކުރުމުގެ މަސައްކަތްވެސް ކުރަމުން އަންނަކަމަށް މިނިސްޓަރު ވިދާޅުވިއެވެ.

ބޭރުގެ ފަރާތަކަށް ފައިސާ ފޮނުވާއިރު މިހާރު ވަރަށްގިނަ އިޖުރާއަތްތައް ފުރިހަމަ ކުރަންޖެހޭ. ގަތަރުގެ ރެޑްކޮރޮސެންޓާ އެކު އެއްބަސްވުމެއް ޤާއިމްކޮށް އެޓާނީ ޖެނެރަލްގެ ލަފައާއެކު އެ މަސައްކަތް ކުރިއަށްގެންދެވި މިހާރު އެފައިސާ ފޯރުކޮށްދިނުމުގެ ދޮރު ހުޅުވިގެން އެދަނީ

އިސްލާމިކް މިނިސްޓަރު ޝަހީމް ވިދާޅުވިއެވެ

މިނިސްޓަރު ޝަހީމް ވިދާޅުވީ، ޒަކާތު ފަންޑުން އެހީދޭއިރު، އެންމެ އިސްކަންދެނީ އެފައިސާ އެންމެ ހައްގުކަންބޮޑު ފަރާތާ ހަވާލުކުރުމަށް ކަމަށާއި އެކަންކަން ކުރިއަށްދާނީ އެކަމަށް އޮންނަ އުސޫލުތަކުގެ ތެރެއިން ކަމަށެވެ.

މިނިސްޓަރު ވިދާޅުވީ ހުއްޓިފައި ހުރި މިސްކިތްތައް އިމާރާތްކުރުމުގެ މަސައްކަތްތަކާއި، އަލަށް ބިނާކުރަންޖެހޭ މިސްކިތްތައް އެޅުމުގެ މަސައްކަތް ހެޔޮއެދޭ ފަރާތްތަކުގެ އެހީތެރިކަމާއެކު ކުރިއަށްދާކަމަށެވެ. މި ސަރުކާރު ހަވާލުވުމަށްފަހު މިހާރުވެސް 9 މިސްކިތެއް ބިނާކުރުމުގެ ހުއްދަ ވަނީ ދީފައެވެ.

މިގޮތުން މިހާރުވެސް ހުޅުމާލެ ފޭސް ދޭއްގައި މިސްކިތަކާއި ފޭސް ތިނެއްގައި މިސްކިތެއް ބިނާކުރުމުގެ މަސައްކަތް ކުރިއަށްދާކަމަށް މިނިސްޓަރު ޝަހީމް ވިދާޅުވިއެވެ. މީގެ އިތުރުން އަތޮޅުތެރޭގެ ބައެއް ރަށްތަކުގައިވެސް މިސްކިތްތަކުެގ އިތުރުން އިސްލާމިކް ސެންޓަރުތައް ބިނާކުރުމުގެ މަސައްކަތް ކުރިއަށްދާކަމަށް ޝަހީމް ވަނީ ވިދާޅުވެފައެވެ.