އެމްއާރުއައި، ސިޓީ ސްކޭން އަދި ކެތްލެބްގެ ހިދުމަތް އަތޮޅުތަކުގެ ހޮސްޕިޓަލްތަކުން ދިނުމަށް ކުރަންޖެހޭ މަސައްކަތް ދަނީ ކުރިއަށް: ގީލާ

އަތޮޅުތަކުގެ ހޮސްޕިޓަލްތަކުން ދޭ ޞިއްޙީ ޚިދުމަތްތައް ފުޅާކޮށް ކުރިއެރުވުމަށް ސަރުކާރުން ގެންގުޅޭ ސިޔާސަތުގެ ދަށުން ބޮޑެތި މަސައްކަތްތަކެއް ފަށައި، އެކަމުގައި ބޮޑެތި ކުރިއެރުންތަކެއް ލިބެމުންދާ ކަމަށް ޞިއްޙަތާ ބެހޭ ވަޒީރު ޑރ. ގީލާ ޢަލީ ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ގީލާ ޢަލީ ވިދާޅުވީ، ރައްޔިތުންނަށް އަމިއްލަ ރަށުން ނުވަތަ ސަރަޙައްދުން ފެންވަރު ރަނގަޅު ޞިއްޙީ ޚިދުމަތް ލިބޭނެ މަގު ފަހިކުރުމުގެ ގޮތުން މުހިންމު މަސައްކަތްތަކެއް މިހާރުވެސް ކުރިއަށްދާ ކަމަށެވެ. އެގޮތުން އެމް.އާރު.އައި، ސީޓީ ސްކޭން އަދި ކެތުލެބް ފަދަ ޚާއްޞަ ޚިދުމަތްތައް އަތޮޅުތަކުގައި ޤާއިމުކުރުމަށް ކުރެވެމުންދާ މަސައްކަތްތައް ވަރަށް ބާރަށް އަދި އެދެވޭ ގޮތެއްގައި ކުރިއަށްދާކަން ވަޒީރު ފާހަގަކުރެއްވިއެވެ.

ރޭޑިއޮލޮޖީގެ ދާއިރާއިން ލިބިފައިވާ ކުރިއެރުންތަކަށް އަލިއަޅުއްވާލައްވަމުން ވަޒީރު ވިދާޅުވީ، ހަށިގަނޑުގެ އެތެރޭގެ ގުނަވަންތަކުގެ ފޮޓޯ ނަގައި ބަލިތައް ދެނެގަތުމަށް ދެވޭ ޚިދުމަތްތައް ވަރަށް ބޮޑަށް ފުޅާކުރެވިފައިވާ ކަމަށެވެ. މިގޮތުން ރ. އުނގޫފާރު ރީޖަނަލް ހޮސްޕިޓަލުގައި މިހާރު އެމްއާރުއައިގެ ޚިދުމަތް ފަށާފައިވާއިރު، ގދ. ތިނަދޫ ޑރ. ޢަބްދުއްސަމަދު މެމޯރިއަލް ހޮސްޕިޓަލާއި، ލ. ގަން ރީޖަނަލް ހޮސްޕިޓަލް އަދި ފުވައްމުލަކު ހޮސްޕިޓަލުގައި އެމްއާރުއައިގެ ޚިދުމަތް ފެށުމުގެ މަސައްކަތް ބާރަށް ކުރިއަށްދާ ކަމަށް ވިދާޅުވިއެވެ.

މީގެ އިތުރުން ޞިއްޙީ ދާއިރާއިން އަތޮޅުތަކުގައި ކުރިއަށްދާ މުހިންމު އެހެން މަސައްކަތްތަކުގެ ތަފްޞީލުވެސް ވަޒީރު މިއަދު ވަނީ ހިއްސާކުރައްވާފައެވެ.

ސީޓީ ސްކޭންގެ ޚިދުމަތަށް ބަލާއިރު، ފުވައްމުލަކު ހޮސްޕިޓަލުގައި މި ޚިދުމަތް ފަށާފައިވާއިރު، ހއ. ދިއްދޫ، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ، ލ. ފޮނަދޫ އަދި ތ. ވޭމަންޑޫގައި ސީޓީ ސްކޭންގެ ޚިދުމަތް ޤާއިމުކުރުމުގެ މަސައްކަތް ދަނީ ކުރިއަށް

ވަޒީރު ގީލާ

ބ. އަތޮޅު ހޮސްޕިޓަލާއި ފުވައްމުލަކު ހޮސްޕިޓަލުގައި މެމޯގްރަފީގެ ޚިދުމަތް ޤާއިމުކޮށްފައިވާއިރު 4 ޞިއްޙީ މަރުކަޒެއްގައި އެކްސް-ރޭ ޚިދުމަތް ފަށައި، އިތުރު 16 މަރުކަޒެއްގައި އެ މަސައްކަތް ދަނީ ކުރިއަށެވެ. އަދި 17 ޞިއްޙީ މަރުކަޒެއްގައި އަލްޓްރާ ސައުންޑް ސްކޭން ކުރެވޭނެ އިންތިޒާމު ހަމަޖައްސާފައިވާކަމަށް މިނިސްޓަރު ވިދާޅުވިއެވެ.

ރާއްޖޭގެ ހުރިހާ ރަށެއްގައި ލެބޯޓްރީގެ ހިދުމަތް ޤާއިމުކުރުމުގެ ސިޔާސަތުގެ ދަށުން، 76 ރަށެއްގައި 'ޕޮއިންޓް އޮފް ކެއަރ ޓެސްޓިންގ' އުޞޫލުން ޚިދުމަތް ދެމުންދާއިރު، 22 ރަށެއްގައި ފިޒިކަލް ލެބޯޓްރީ ވަނީ ޤާއިމުކޮށްފައެވެ. އަދި އިތުރު 52 ރަށެއްގައި ފިޒިކަލް ލެބޯޓްރީ ހެދުމުގެ ޢަމަލީ މަސައްކަތް ދަނީ ހިނގަމުންނެވެ.

އިތުރު ކުރެވުނު ބައެއް ހިދުމަތްތައް

- ކުޅުދުއްފުށި ރީޖަނަލް ހޮސްޕިޓަލުގައި އަޑުއިވުމުގެ ޓެސްޓް (އޯޑިއޯމެޓްރީ) ޤާއިމުކޮށްފައިވާއިރު، 11 ރަށެއްގައި އަލަށް ޑައިލިސިސްގެ ޚިދުމަތް ފަށައި، އިތުރު 2 ހޮސްޕިޓަލެއްގައި ޑައިލިސިސް އެނދު އިތުރުކުރުން

- އައްޑޫ އިކުއިޓޯރިއަލް ހޮސްޕިޓަލުގައި ހިތުގެ ބަލިތަކަށް ޚާއްޞަ ކެތުލެބްގެ ޚިދުމަތް ފަށައި، ނ. އަތޮޅު ހޮސްޕިޓަލުގައި އައި.ސީ.ޔޫގެ ޚިދުމަތް ފެށުން

- އައިކެއަރއާ ގުޅިގެން ކުޅުދުއްފުއްޓާއި އައްޑޫގައި އައިނު ހެއްދުމުގެ ޚިދުމަތް ފުޅާކުރުން

- އަތޮޅޫގެ އިތުރު 2 ހޮސްޕިޓަލެއްގައި އަލަށް ޑެންޓަލް ޚިދުމަތް ފަށައި، 12 ހޮސްޕިޓަލެއްގެ ޑެންޓަލް ޗެއަރތައް ގާއިމްކުރުން

- ޑައިވިންގ އެކްސިޑެންޓްތަކަށް ފަރުވާދިނުމަށް އއ. އަތޮޅު، ގއ. އަތޮޅު، ތިނަދޫ، ފުވައްމުލައް އަދި އައްޑޫގައި ހައިޕަރބެރިކް ޗެމްބަރުގެ ޚިދުމަތް ވަނީ ޤާއިމުކުރުން

ވަޒީރު ގީލާ ޢަލީ ވިދާޅުވީ، ސަރުކާރުގެ ސިޔާސަތަކީ މުޅި ރާއްޖޭގެ ޞިއްޙީ ވިއުގަ ވަރުގަދަކޮށް ރައްޔިތުން ފަރުވާއަށްޓަކައި މާލެއަށް ބަރޯސާވާންޖެހޭ މިންވަރު ކުޑަކޮށް އަމިއްލަ ސަރަޙައްދުން ފަސޭހަކަމާއެކު ފުރިހަމަ ޞިއްޙީ ފަރުވާ ލިބިގެންދިއުން ކަމަށެވެ.