ރައީސްގެ ދަތުރުފުޅާ ދިމާކޮށް ލަންކާގައި އުޅޭ ބައެއް ދިވެހީންނަށް ބިރުދެއްކި ކަމަށް ބުނާ ވާހަކައަކީ ދޮގެއް: ތަރުޖަމާން
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ލަންކާ ކުރެއްވި ދަތުރުފުޅާ ދިމާކޮށް އެ ގައުމުގައި އުޅޭ ބައެއް ދިވެހީންނަށް ލަންކާގެ ފުލުހުން މެދުވެރިކޮށް ބިރުދެއްކި ކަމަށް ބުނާ ވާހަކައަކީ ދޮގެއް ކަމުގައި ސަރުކާރުގެ ތަރުޖަމާން މުޙައްމަދު ހުސައިން ޝަރީފް ވިދާޅުވެއްޖެ އެވެ.
ތަރުޖަމާން މިހެން ވިދާޅުވީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރީންގެ ބައްދަލްވުމުގަ އެވެ. މުންދު ވިދާޅުވީ އެފަދަ އެއްވެސް ކަމެއް ސަރުކާރުން ނުކުރާ ކަމުގެ ޔަގީންކަން ދޭ ކަމަށެވެ.
ރައީސް, ދިވެހީންނާއި ބައްދަލުކުރުމަށް ބޭއްވި ބައްދަލްވުމަށް ނުދާން އިންޒާރުދީ ބައެއް ދިވެހީން ދިރިއުޅޭ ގެތަކަށް ލަންކާ ފުލުހުން ފޮނުވައިގެން ބިރު ދެއްކި ކަމަށް ބުނެ ބަޔަކު ދަނީ ވާހަކަ ފަތުރަމުންނެވެ. ނަމަވެސް މުންދު ވަނީ އެފަދަ އެއްވެސް ކަމެއް ސަރުކާރުން ނުކުރާ ކަމުގެ ފުރިހަމަ ޔަގީންކަން ދީފަ އެވެ.
"ރައީސުލްޖުމްހޫރިއްޔާ އެދިވަޑައިގަންނަވައިގެން ރަސްމީ ހައިސިއްޔަތަަކުން އެއްވެސް ބޭފުޅަކު ވަޑައިގަންނަވަން ހުރަސް އަޅުއްވަން އެއްވެސް މަސައްކަތެއް ނުކުރޭ,"
މުންދު ވިދާޅުވީ އެފަދަ ކަމެއް ހިނގާދިޔަ ކަމަށް ބުނާ ވާހަކަތަކެއްގެ މައުލޫމާތު ލިބުނު ކަމަށެވެ. އަދި އެކަމާއި ގުޅިގެން ސަފީރާއި ސުވާލު ކުރެއްވި ކަމަށެވެ. އެއީ ދޮގެއް ކަމުގައި ސަފީރު ވިދާޅުވި ކަމަށް މުންދު ވިދާޅުވި އެވެ. މުންދު ވަނީ ދިވެހިރައްޔިތަކާއި ބައްދަލުކުރައްވަން ރައީސް ދެކޮޅު ހައްދަވަން ޖެހޭ ސަބަބެއް ނެތް ކަމަށް ވިދާޅުވެފަ އެވެ.
މި ފަހަރުގެ ދަތުރުފުޅުގެ ތެރެއިން ވެސް ތިންގަޑިއިރު ރައީސް ހޭދަކުރެއްވި ދިވެހިންނާއި ވަކިވަކީން ބައްދަލު ކުރެއްވުމަށް ކަމަށާ އެ ބައްދަލްވުމުގައި 60 އާއިލާއާ ބައްދަލު ކުރެއްވި ކަމަށް ވިދާޅުވި އެވެ.
"ދުވަހަކު ވެސް އަޅުގަނޑު ނުދެކެން އެހެން ކަންްކުރެއްވި ވެރިއެއް," މުންދު ވިދާޅުވި އެވެ.
ރައްޔިތުންނާއި ބައްދަލުކުރެއްވުމަކީ ރައީސް އަބަދުވެސް އިސްކަން ދެއްވާ ކަމެއް ކަމަށާ މިދޔަ ދުވަސްތަކުގައި އެކަން ވަރަށް ސާފުކޮށް ފެނިފައިވާ ކަމަށް ވެސް ތަރުޖަމާން ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
