ބީއެމްއެލް ވީރަން ކޯޕަރޭޓްސް ކާމިޔާބުކަމާއެކު ނިންމާލައިފި

ވީރަން މޯލްޑިވްސް އިން އިސްނަގައިގެން ބޭންކް އޮފް މޯލްޑިވްސް (ބީއެމްއެލް) ގެ އެހީތެރިކަމާ އެކު ކްރޮސްރޯޑްސް މޯލްޑިވްސްގައި މިއަދު ބޭއްވި "ބީއެމްއެލް ވީރަން - ކޯޕަރޭޓްސް" ރިލޭ ރޭސް ކާމިޔާބުކަމާ އެކު ނިންމާލައިފިއެވެ.

މި ރޭހަކީ ރާއްޖޭގައި ހިންގާ ކުންފުނިތަކާއި އިދާރާތަކާއި ޖަމްޢިއްޔާތަކަށް ހުޅުވައިލައިގެން ބޭއްވި ހަރަކާތެކެވެ. ފަސް ދުވުންތެރިންގެ މައްޗަށް އެކުލެވޭ ކޮންމެ ޓީމެއްގައި ވެސް ކޮންމެ މީހަކު ދުވީ އެއް ކިލޯމީޓަރެވެ. ޖުމްލަ 18 ޓީމެއް ބައިވެރިވި މި ހަރަކާތުގައި 11 ފިރިހެން ޓީމާއި ހަތް އަންހެން ޓީމު ވާދަކުރިއެވެ. މުވައްޒަފުންގެ މެދުގައި ދުޅަހެޔޮ ދިރިއުޅުމެއް ބިނާކުރުމާއި ގުޅިގެން މަސައްކަތްކުރުމުގެ ރޫހު އާލާކުރުމަކީ މި ރޭސް ރޭވުމުގެ މައިގަނޑު މަޤުޞަދެވެ.

ރާއްޖޭގެ ތާރީޚުގައި ބޭއްވި ފުރަތަމަ ކޯޕަރޭޓް ރިލޭ ރޭހުގެ އިތުރުން ރޭސް ނިންމަން ހޭދަވާ ވަގުތު ބެލުމަށް ބެޓަންގެ އެތެރޭގައި ޗިޕެއް ހަރުކޮށްގެން ރާއްޖޭގައި ހިންގި ފުރަތަމަ ހަރަކާތަށް ވެސް މި ރޭސް ވެފައިވެއެވެ.

ފިރިހެނުންގެ ބައިން ޗެމްޕިއަންކަން ހޯދީ ޓްރެކް އެންޑް ފީލްޑް އެސޯސިއޭޝަނެވެ. އެ ބައިގެ ފުރަތަމަ ރަނަރއަޕަކީ ރަންއިންމޯޑް އެތުލެޓިކްސް ކަމުގައިވާ އިރު ދެވަނަ ރަނަރއަޕަކީ ބީއެމްއެލް އެވެ. އަންހެނުންގެ ބައިގެ ޗެމްޕިއަންކަން ރަންއިންމޯޑް އެތުލެޓިކްސް ހޯދި އިރު ފުރަތަމަ ރަނަރއަޕަކީ ކްރޮސްރޯޑްސް އައިލެންޑް ސްޕްރިންޓާސް ކަމަށާއި ދެވަނަ ރަނަރއަޕަކީ އޭޑީކޭ ސިނަރޖީ ކަމަށް ވީރަން މޯލްޑިވްސް އިން ހާމަކޮށްފައިވެއެވެ.

ބީއެމްއެލް އިން އަންނަނީ ކުޅިވަރުގެ ރޫހު ދިރުވައި ދުޅަހެޔޮ މުޖުތަމަޢެއް ބިނާކުރުމުގެ ގޮތުން ތަފާތު ޕްރޮގްރާމްތަކަށް މެދުކެނޑުމެއް ނެތި އެހީތެރިކަން ފޯރުކޮށްދެމުންނެވެ.