އިންޑިއާއިން ޕާކިސްތާނަށް މިސައިލް ހަމަލާ ދީ، ކުޑަކުއްޖަކު ހިމެނޭހެން 8 މީހުން ޝަހީދުކޮށްލައިފި

އިންޑިއާއިން ޕާކިސްތާނުގެ ކޮންޓްރޯލްގައިވާ ކަޝްމީރުގެ ސަރަޙައްދުތަކަށް ދިން މިސައިލް ހަމަލާތަކެއްގައި މަދުވެގެން 8 މީހުން ޝަހީދުކޮށްލައި، އެތައް ބަޔަކު ޒަޚަމްވެއްޖެއެވެ. ރޭ ދިން މި ހަމަލާ ތަކުގައި ކުޑަކުއްޖަކުވެސް ޝަހީދުވެފައިވާ ކަމަށް ޕާކިސްތާނުގެ މީޑިއާ ރިޕޯޓްތައް ބުނެއެވެ.

މި ހަމަލާ ދީފައިވަނީ ފާއިތުވި މަހު އިންޑިއާގެ ބާރުގެ ދަށުގައިވާ ކަޝްމީރުގައި ތިބި ފަތުރުވެރިންނަށް ދިން ހަމަލާއާ ގުޅިގެން އިންޑިއާގެ 26 މީހަކު މަރުވެ، ދެޤައުމުގެ ދެމެދު އުފެދިފައިވާ ހަމަނުޖެހުންތަކުގެ ތެރެއިންނެވެ. އިންޑިއާއިން ބުނާ ގޮތުގައި އެ 26 މީހުން މަރުވި ހަމަލާ ރާވާފައިވަނީ ޕާކިސްތާނުގައި ތިބޭ ހަރުކަށި ޖަމާޢަތްތަކުންނެވެ.

ޕާކިސްތާނަށް ދެވުނު ހަމަލާ ކުށްވެރިކޮށް އެގައުމުގެ ބޮޑުވަޒީރު ޝަހްބާޒް ޝަރީފް ވަނީ އިންޑިއާގެ މި "ފިނޑި" ޢަމަލުތަކަށް ޖަވާބު ދޭނެ ކަމަށް ވިދާޅުވެފައެވެ.

"އިންޑިއާއިން މިދިން ހަމަލާއަށް ވަރުގަދަ ރައްދެއް ދިނުމުގެ ޙައްޤު ޕާކިސްތާނަށް އެބައޮތް. އަދި ރަނގަޅު ރައްދެއް ދެމުން މިހާރުވެސް މި ދަނީ،" ޝެހެބާޒް ޝަރީފް ޓީވީ މެދުވެރިކޮށް އާއްމު ކުރެއްވި ވީޑިއޯއެއްގައި ވިދާޅުވިއެވެ.

އިންޑިއާގެ ދިފާޢީ މިނިސްޓްރީން ބުނާ ގޮތުގައި މި ހަމަލާ އަމާޒުކޮށްފައިވަނީ "އިންޑިއާއަށް އަމާޒުކޮށްގެން ޓެރަރިސްޓް ހަމަލާތައް ރާވާ" 9 ތަނަކަށެވެ.

އަދި މިއީ "އަމާޒު ހިފައިގެން، މިންވަރު ކަނޑައަޅައިގެން، އިތުރަށް ކަންކަން ގޯސްވިޔަ ނުދިނުމަށް" ދިން ހަމަލާއެއް ކަމަށެވެ.

އިންޑިއާއިން އިތުރަށް ބުނާ ގޮތުގައި ޕާކިސްތާނުގެ އެއްވެސް މިލިޓަރީ މަރުކަޒަކަށް ހަމަލާތައް އަމާޒުކޮށްފައެއް ނުވާނެއެވެ. އަދި އިންޑިއާއިން ވަނީ "ވަރަށް ބޮޑަށް ރައްކާތެރި ކަމުގެ ފިޔަވަޅު އަޅާފައި" ކަމަށްވެސް ބުނެފައިވެއެވެ.

ޕާކިސްތާނުގެ މިލިޓަރީ ތަރުޖަމާނު ލެފްޓިނަންޓް ޖެނެރަލް އަޙްމަދު ޝަރީފް ވިދާޅުވި ގޮތުގައި މި ހަމަލާ އަމާޒުކޮށްފައިވަނީ 6 ތަނަކަށެވެ. އޭގެ ތެރޭގައި ޕާކިސްތާނުގެ ބާރުގެ ދަށުގައިވާ ކަޝްމީރާއި ޕަންޖާބު ސޫބާގެ ސަރަޙައްދުތައް ހިމެނެއެވެ.

އަދި ބަހާވަލްޕޫރުގައި ހުރި މިސްކިތަކަށް އެއް މިސައިލް ޖެހި، ކުޑަކުއްޖަކު ޝަހީދުވެ، އިތުރު ދެ މީހަކަށް އަނިޔާވެފައިވާއިރު މުރީދްކޭ އާއި ކޮޓްލީ ކައިރީގެ ސަރަޙައްދުތަކަށްވެސް ހަމަލާ ދީފައިވެއެވެ.

ޕާކިސްތާނުގެ ދައުލަތުގެ މީޑިއާއިން ރިޕޯޓުކުރި ގޮތުގައި، މި ހަމަލާއަށް ޖަވާބު ދިނުމުގެ ގޮތުން ޕާކިސްތާނުގެ އެއަރ ފޯސްއިން ވަނީ އިންޑިއާގެ ދެ ޖެޓް މަތިންދާބޯޓު ވައްޓާލާފައެވެ. ނަމަވެސް މިކަމާ ގުޅޭ އިތުރު ތަފްސީލެއް ހާމަކޮށްފައެއް ނުވެއެވެ.

ޕާކިސްތާނުގެ ބާރުގެ ދަށުގައިވާ ކަޝްމީރުގެ ވެރިރަށް މުޒައްފަރާބާދުގެ ރައްޔިތުން ބުނާ ގޮތުގައި، ގޮވުމުގެ އަޑުތަކާއެކު ރަށުގައި ބިރުވެރިކަން އުފެދުނެވެ. އަދި ކަރަންޓު ކަނޑާލުމާ ގުޅިގެން މުޅި ސަރަޙައްދު އަނދިރިވެގެން ދިޔައެވެ. މި ސަރަޙައްދުގެ ހޮސްޕިޓަލްތައް ވަނީ ކުއްލި ޙާލަތަށް ތައްޔާރުކޮށްފައެވެ.

ޕާކިސްތާނުގެ ފޮރިން މިނިސްޓްރީން ވަނީ މި ހަމަލާތަކުން އާންމު ރައްޔިތުންނާއި ވައިގެ ދަތުރުފަތުރަށް ނުރައްކާވެދާނެ ކަމަށް އިންޒާރުދީފައެވެ. "މި ފިނޑި ޢަމަލުތަކުން ނިއުކްލިއަރ ހަތިޔާރު އޮތް ދެ ޤައުމު ބޮޑު ހަނގުރާމައަކާ ހަމައަށް ގެންގޮސްފި،" މިނިސްޓްރީގެ ބަޔާނުގައި ބުނެފައިވެއެވެ.

މި ހާދިސާއާ ގުޅިގެން ޕާކިސްތާނުގެ ބޮޑުވަޒީރު ޝަހްބާޒް ޝަރީފް ވަނީ ޤައުމީ ސަލާމަތީ ކޮމިޓީގެ ބައްދަލުވުމެއް ބާއްވައި، ޙާލަތު ވަޒަންކުރައްވާފައެވެ.

އދ. އިންވެސް ވަނީ މި ހާދިސާއާ ގުޅިގެން ކަންބޮޑުވުން ފާޅުކޮށްފައެވެ. އަދި "އިންޑިއާއާއި ޕާކިސްތާނުގެ ދެމެދުގައި ހިނގާ ހަނގުރާމަ ދުނިޔެއަށް ތަޙައްމަލެއް ނުކުރެވޭނެ،" ކަމަށް އދ. އިން ނެރުނު ބަޔާނުގައި ބުނެފައިވެއެވެ.

މިއީ 2019 ވަނަ އަހަރުގެ ފެބްރުއަރީ މަހު ޕުލްވާމާ-ބާލާކޯޓް ހާދިސާއަށް ފަހު ދެ ޤައުމުގެ ދެމެދުގައި ހިނގި އެންމެ ނުރައްކާތެރި ހަމަލާއެވެ. އަދި މި ހާދިސާއާ ގުޅިގެން ދެ ޤައުމުގެ ދެެ ދެމެދުގައި އޮތް ދުޝްމަމަނުކަން އިތުރަށް ގޯސްވެދާނެ ކަމުގެ ބިރު އުފެދިފައިވެއެވެ.