މެސީ ގައުމީ ޓީމަށް ކާމިޔާބުކޮށްދިން 112 ވަނަ ލަނޑާއެކު ބޮލީވިއާ އަތުން އާޖެންޓީނާއަށް ތަފާތުބޮޑު މޮޅެއް

ވޯލްޑްކަޕް ކޮލިފައިން ދެކޮނު އެމެރިކާ ސަރަހައްދުގައި މިއަދު ހެނދުނު އާޖެންޓީނާ އާއި ބޮލީވިއާ ވާދަކުރި މެޗު ފަސޭހަކަމާއެކު 6-0 ގެ ތަފާތުބޮޑު ނަތީޖާއަކުން އާޖެންޓީނާ ކާމިޔާބުކޮށްފިއެވެ.

ކޮލިފައިންގައި އާޖެންޓީނާ އެންމެ ފަހުން ކުޅުނު މެޗުގައި ވެނަޒުއޭލާއި ވާދަކޮށް 1-1 ގެ ނަތީޖާއަކުން އެއްވަރުވެފައިވާއިރު، ބޮލީވިއާ އެންމެ ފަހުން ކުޅުނު މެޗުގައި، އެޓީމުން ވަނީ 2-1 ގެ ނަތީޖާއަކުން ޗިލީ ބަލިކޮށްފައެވެ. އަދި މިދެޓީމު އެންމެ ފަހުން ކުޅުނު މެޗު 3-0 ގެ ނަތީޖާއަކުން ކާމިޔާބުކުރީ އާޖެންޓީނާ އެވެ.

މިމެޗުގައި އާޖެންޓީނާގެ ކެޕްޓަން ލިޔޮނަލް މެސީ ތިން ލަނޑު ކާމިޔާބުކޮށް ހެޓްރިކް ހެދިއިރު އެޓީމުގެ ލައުޓާރޯ މާޓިނޭޒް، ޖޫލިއަން އަލްވަރޭޒް އަދި ތިއާގޯ އަލަމޭޑާ މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި މެސީ ކާމިޔާބުކުރި ތިން ލަނޑާއެކު ގައުމީ ޓީމަށް ކުޅުނު 189 މެޗުގައި އޭނާ ކާމިޔާބުކުރި ލަނޑުގެ އަދަދު ވަނީ 112 އަށް އަރާފައެވެ.

މިނަތީޖާއެކު ކޮލިފައިންގައި ކުޅުނު 10 މެޗުން އާޖެންޓީނާއަށް 22 ޕޮއިންޓް ލިބިފައިވާއިރު، އެޓީމު މިވަގުތު އޮތީ ޕޮއިންޓް ޓޭބަލްގެ އެއްވަނައިގައެވެ. އަދި މިމެޗުން ބަލިވި ބޮލީވިއާއަށް ކުޅުނު 10 މެޗުން 12 ޕޮއިންޓް ލިބިފައިވާއިރު އެޓީމު މިވަގުތު އޮތީ މިސަރަހައްދުގެ ހަތް ވަނައިގައެވެ.