ބައެއް ވިޔަފާރިވެރިން ޑޮލަރު މާރުކުރަން ފޫކަހަނީ، ޓެކްސްއަށް ހަދާ މަކަރު އެނގިދާނެތީ: ޒަރިޔަންދު

މަރުކަޒީ ބޭންކުގެ ގަވާއިދުގައި ބަޔާންކޮށްފައިވާގޮތަށް ބައެއް ވިޔަފާރިވެރިން ޑޮލަރު މާރުކުރަން ފޫކަހަނީ, ޓެކްސްއަށް ހަދާ މަކަރު އެނގިދާނެތީކަމަށް ކުރީގެ ޓެންޑާ ބޯޑުގެ މެމްބަރުކަން ކުރެއްވި އިސްމާއީލް ޒަރިޔަންދު ވިދާޅުވެއްޖެއެވެ.

ޑޮލަރު މާރުކުރުމާ ގުޅޭގޮތުން މަރުކަޒީ ބޭންކުން މިފަހުން ހެދި ގަވާއިދު މުރާޖައާ ކުރަންޖެހޭކަމަށް ބުނެ، ރާއްޖޭގެ އެންމެ ބޮޑެތި ވިޔަފާރިވެރިންގެ ތެރޭގައި ހިމެނޭ، ޗަމްޕާ އަދި ޔުނިވާސަލް އިން ވަނީ ޑޮލަރު މާރުކުރުމާ ދެކޮޅަށް ބަޔާންނެރެފައެވެ. އެ ފަރާތްތަކުން ނެރުނު ބަޔާންތަކުގައި ފާހަގަކޮށްފައިވަނީ މަރުކަޒީ ބޭންކުން އަންގާފައިވާގޮތަށް ޑޮލަރު މާރުކުރެވެން ނެތްކަމެވެ.

މިކަމާ ގުޅިގެން ކްލަބް ހައުސްގައި ވާހަކަދައްކަވަމުން ޒަރިޔަންދު ވިދާޅުވީ، ޑޮލަރު މާރުކުރުމާ ދެކޮޅު ވިޔަފާރިތަކުން އެކަން ކުރަން އުޅެނީ އެމީހުން ހުށަހަޅަންޖެހޭ ބަޔާންތަކުން ދައުލަތަށް ކަމެއް އެނގިދާނެތީކަމަށެވެ. މިގޮތުން ބޮޑެތި އެ ވިޔަފާރިވެރިން ޑޮލަރުމާރުކުރަން ފޫކަހަނީ،  ޑޮލަރު މާރުކުރަން ހުށަހަޅަންޖެހޭ ބަޔާންތަކުން އެބައިމީހުން ޓެކްސްއަށް މަކަރުހަދަން ގެންގުޅޭ އުކުޅުތައް އެނގިދާނެތީކަން ޒަރިޔަންދުގެ ވާހަކައިގަ ފާހަގަކުރެއްވިއެވެ.

ޒަރިޔަންދު ވިދާޅުވީ މިސާލެއްގެ ގޮތުގައި ނަގާނަމަ، ޔުނިވާސަލް ގްރޫޕުން 500 ޑޮލަރު މާރުކުރަން ފަސްޖެހެންވީ ސަބަބެއް ނެތްކަމަށާއި، އެކުންފުނިން އެކަނިވެސް މުއައްޒަފުންނަށް މުސާރަ ދިނުމަށާއި، ސަޕްލަޔަރުންނަށް ފައިސާ ދެއްކުމަށް ބޮޑެތި އަދަދުތަކުން ޑޮލަރު މާރުކުރާނޭކަމަށެވެ.

ތެއޮ ގަންނަންވެސް ޑޮލަރު މާރުކުރާނެ އެހާގިނައިން. އެހެންވީމާ އެއީކީ ލޮޖިކަލީވެސް ގަބޫލުކުރަން އެހާ ފަސޭހަވާހަކައެއްނޫން.

ޒަރިޔަންދު ވިދާޅުވިއެވެ

ޒަރިޔަންދު ވިދާޅުވީ ކޮންމެ މަހެއްގައި އެ އަންނަ ފަތުރުވެރިއެއްގެ ބޮލަކަށް ޖެހޭ ނިސްބަތުން 500 ޑޮލަރު މާރުކުރަން ދެކޮޅުހަދަންޖެހޭ ސަބަބެއް ނުވިސްނޭ ކަމަށާއި، އެކަމަށް ތިންމަހެއްހާ ދުވަހުގެ މުއްދަތެއް ލިބިގެންދާކަމަށެވެ. އެހެންކަމުން 500 ޑޮލަރު މާރުކުރަންޖެހުމަކީ ކަންބޮޑުވާންޖެހޭވަރުގެ ކަމެއް ނޫންކަމަށާއި، މިބާވަތުގެ ކަންކަމުގައި ބޮޑެތި ވިޔަފާރިވެރިންގެ ތެރެއިން ބައެއް މީހުންގެ ކަންކަން ހުންނަ އުސޫލު ދިވެހިންނަށް އޮޅިފައި ނުވާކަމަށް ޒަރިޔަންދު ފާހަގަކުރެއްވިއެވެ.

ރާއްޖޭގައި ބޭރުފައިސާ ލިބުމުގެ މައްސަލައަކީ ޒަމާނުއްސުރެ އޮތް ޤައުމީ ބޮޑު މައްސަލައެކެވެ. ބޭންކްތަކަށް ޑޮލަރު ނުލިބޭ ވާހަކައަކީ ބޭންކުތަކުންވެސް ފާހަގަކުރާ ބޮޑު މައްސަލައެކެވެ.

ރާއްޖޭގައި ބޭރުފައިސާގެ ގަވާއިދަށް ބަލާއިރު، މިހާތަނަށް އަމަލުކުރަމުން އައިސްފައިވަނީ 1987 ހިސާބުގައި ވުޖޫދަށް ގެނެސްފައިވާ ގަވާއިދަކުންނެވެ.

މަރުކަޒީ ބޭންކުން ވަނީ މިހިނގާ އޮކްޓޯބަރުމަހުގެ އެއްވަނަ ދުވަހުން ފެށިގެން ބޭރުފައިސާ ގަނެ ވިއްކުމުގެ އުސޫލަށް ބޮޑު ބަދަލެއް ގެނެސްފައެވެ. ބޭރުފައިސާ ގަނެވިއްކުމުގެ ގަވާއިދަށް ގެނައި ބަދަލާއެކު، ޓޫރިޒަމް ވިޔަފާރިތަކަށް ލިބޭ ބޭރުފައިސާގެ އާމްދަނީގެ ވަކި އިންސައްތައެއް ބީއެމްއެލް މެދުވެރިކޮށް މާރުކުރުން ލާޒިމް ވެއެވެ. ގިނަ ރައްޔިތުން ގަބޫލުކުރާގޮތުގައި މަރުކަޒީ ބޭންކުން މި ގެނައި ބަދަލާއެކު ބޭންކުތަކަށް ޑޮލަރު ލިބޭނޭމަގު ޔަގީންވެގެންދާނެއެވެ.