ދުނިޔޭގެ ބާޒާރުގައި ތެލުގެ އަގު ފަހެއް އިންސައްތަ މައްޗައް

ދުނިޔޭގެ ބާޒާރުގައި ތެލުގެ އަގު 5% އަށް އުފުލިއްޖެއެވެ.

މެދުއިރުމަތީގެ މަސްރަހު ގޯސްވެ، ހޯރްމޫޒް ކަނޑުއޮޅި ބަންދުވުމާއި އީރާނުގެ ތެޔޮ މަރުކަޒުތަކަށް ދެވުނު ހަމަލާތަކާ ގުޅިގެން ތެލުގެ ސަޕްލައިއަށް ދަނީ ބުރޫއަރަމުންނެވެ. އެގޮތުން، ބްރެންޓް ކްރޫޑް ފީފާއެއްގެ އަގު 103 ޑޮލަރަށް ވުރެ މައްޗަށް އަރާފައިވާއިރު، މިއީ ބައިނަލްއަޤުވާމީ ބާޒާރުގައި ތެލުގެ ސަޕްލައިއަށް ކުރިމަތިވި ވަރަށް ބޮޑު ގޮންޖެހުމެކެވެ.

މި ބަދަލަކީ ރާއްޖެ ފަދަ ތެލަށް ބަރޯސާވާ ގައުމަކަށް އިގްތިސާދީ ގޮތުން ބޮޑެތި އަސަރުތަކެއް ކުރާނެ ކަމެކެވެ. ރާއްޖޭގައި މިހާރުވެސް ތެލުގެ އަގު ބޮޑުވަމުންދާއިރު، އެސްޓީއޯ އިން ވިއްކާ ޕެޓްރޯލާއި ޑީސަލްގެ އަގު ވަނީ އުފުލިފައެވެ. އަތޮޅުތެރޭގެ ބައެއް ރަށްރަށުގައި ޕެޓްރޯލް ލީޓަރެއްގެ އަގު މިހާރު ވަނީ 29 ރުފިޔާއާ ގާތްކޮށްފައެވެ.

މީގެ ސަބަބުން ކަރަންޓު އުފެއްދުމަށާއި ދަތުރުފަތުރަށް ކުރާ ހޭދަ އިތުރުވެ، އާންމު މުދަލުގެ އަގުތައް އުފުލިގެންދާނެ ކަމަށް މަޝްރަހު ދިރާސާކުރާ ފަރާތްތައް ބުނެއެވެ.

ރައީސް ޑރ.މުހަޢްމަދު މުޢިއްޒު މެދުރިރުމަތީގެ ހާލަތާއި ގުޅިގެން އުފައްދަވާފައިވާ ވަޒީރުންގެ ހާއްސަ ކޮމިޓީ އިން ވަނީ މިދިޔަ ހަފްތާ ނޫސްވެރިންގެ ބައްދަލުވުމެއް ބާއްވައި ސަރުކާރުން ކުރަމުންދާ މަސައްކަތްތަކުގެ ރިޕޯޓް ހިއްސާ ކޮށްފައެވެ.

އެގޮތުން، ދިވެހިރާއްޖެއަށް އަންނަ އެއާލައިންތައް އިތުރުކޮށް މިހާރު އޮޕެރޭޓް ކުރަމުންދާ އެއާލައިންތަކުން ރާއްޖެއަށް ކުރާ ދަތުރުތައް އިތުރުކުރުމަށް މަޝްވަރާކުރަމުންދާކަމަށް ވަޒީރުންގެ ހާއްސަ ކޮމިޓީއިން ވިދާޅުވިއެވެ.

މެދުއިރުމަތީގެ ހަނގުރާމަ އާއި ގުޅިގެން ގިނަ ފަރާތްތަކުން ދަނީ ސޯޝަލް މީޑީއާގައި ކަންބޮޑުވުން ފާޅުކުރަމުންނެވެ.