މެސީގެ މޮޅު ކުޅުމާއެކު ވެނަޒުއޭލާ އަތުން އާޖެންޓީނާއަށް ފަސޭހަ މޮޅެއް

ވޯލްޑްކަޕް ކޮލިފައިންގް ދެކޮނު އެމެރިކާ ސަރަހައްދުގައި ރޭ އަމިއްލަ ދަނޑުގައި ވެނަޒުއޭލާއި ދެކޮޅަށް ކުޅުނު މެޗު ފަސޭހަކަމާއެކު 3-0 ގެ ނަތީޖާއަކުން އާޖެންޓީނާ އިން ކާމިޔާބުކޮށްފިއެވެ.

މިނަތީޖާއެކު ކޮލިފައިންގައި ކުޅުނު 17 މެޗުން އާޖެންޓީނާއަށް 38 ޕޮއިންޓް ލިބިފައިވާއިރު މިސަރަހައްދުގެ އެއްވަނަ ޓީމުގެ ގޮތުގައި އެޓީމުން ވަނީ ވޯލްޑްކަޕްގެ ޖާގައެއް ކަށަވަރުކޮށްފައެވެ. އަދި މިމެޗުން ބަލިވި ވެނަޒުއޭލާއަށް 17 މެޗުން ލިބުނު 18 ޕޮއިންޓާއެކު އެޓީމު މިވަގުތު އޮތީ ތާވަލުގެ ހަތްވަނައިގައެވެ.

ކޮލިފައިންގައި އާޖެންޓީނާ އެންމެ ފަހުން ކުޅުނު މެޗުގައި ކޮލަމްބިއާ ވާދަކޮށް 1-1 ގެ ނަތީޖާއަކުން ދެޓީމު އެއްވަރުވެފައިވާއިރު، ކޮލިފައިންގައި ވެނަޒުއޭލާ އެންމެ ފަހުން ކުޅުނު މެޗުގައި އުރުގުއޭ އަތުން 2-0 ގެ ނަތީޖާއަކުން އެޓީމު ވަނީ ބަލިވެފައެވެ. އަދި މިދެޓީމު އެންމެ ފަހުން ކުޅުނު މެޗު ނިމިފައިވަނީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މުޅި މެޗުގައި ވެސް މޮޅަށް ކުޅެ އާޖެންޓީނާ އިން މެޗު ޑޮމިނޭޓްކުރިއިރު، އެޓީމު މެޗުގެ ލީޑުހޯދި ލަނޑު ފުރަތަމަ ހާފުގެ 39 ވަނަ މިނެޓުގައި ކާމިޔާބުކޮށްދިނީ ކެޕްޓަން ލިއޮނަލް މެސީ އެވެ. އަދި އެޓީމުން ލީޑު ފުޅާކުރި ލަނޑު ދެވަނަ ހާފުގެ 76 ވަނަ މިނެޓުގައި ލައުޓާރޯ މާޓިނޭޒް ކާމިޔާބުކުރިއިރު، އޭގެ ހަތަރު މިނެޓުފަހުން އެޓީމުގެ ތިންވަނަ ލަނޑު ކާމިޔާބޮށްދިނީ ވެސް މެސީ އެވެ.

މިމެޗުގައި ކާމިޔާބުކުރި ދެލަނޑާއެކު ޤައުމީ ޓީމަށް ކުޅުނު 194 މެޗުގައި މެސީ ކާމިޔާބުކުރި ލަނޑުގެ އަދަދު ވަނީ 114 އަށް އަރާފައެވެ. އަދި މިމެޗަކީ އަމިއްލަ ސަޕޯޓަރުންގެ ކުރިމަތީ މެސީ ކުޅުނު ފަހު މެޗެވެ.