މަޖިލިސް އިންތިހާބުގައި 65 ނޫނީ އެއަށްވުރެ ގިނަ ގޮނޑި ނަގާނަން: ފައްޔާޒު

ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި 65 ގޮނޑި, ނުވަތަ އެއަށްވުރެވެސް ގިނަ ގޮނޑި އެމްޑީޕީން ނަގާނެ ކަމަށް އެޕާޓީގެ ޗެއާޕާސަން ފައްޔާޒް އިސްމާއީލް މިއަދު ވިދާޅުވެއްޖެ އެވެ.

މަޖިލިސް އިންތިހާބުގައި އެމްޑީޕީން ވާދަކުރައްވާ ކެންޑިޑޭޓުންގެ ފޯމު އިލެކްޝަންސް ކޮމިޝަނަށް ހުށަހެޅުއްވުމަށްފަހު މީޑިއާ ތަކަށް މައުލޫމާތު ދެއްވަމުން ފައްޔާޒް ވިދާޅުވީ ކުރިއަށް އޮތް މަޖިލީހާއި މެދު ވަރަށް އުންމީދު ބޮޑު ކަމަށެވެ. އެގޮތުން އުއްމީދަކީ މި ހިނގާ ރައްޔިތުންގެ މަޖިލީހަށް އިންތިޚާބުވި އެމްޑީޕީ މެންބަރުންގެ އަދަދު ކަމުގައިވާ 65 ނުވަތަ އެއަށްވުރެވެސް ގިނަ ގޮނޑި ކާމިޔާބު ވުން ކަމަށް އޭނާ ވިދާޅުވި އެވެ.

"ދެހާސް ނަވާރަ ވަނަ އަހަރުގެ ރައްޔިތުންގެ މަޖިލީހާ އެއްވަރު ނޫނީ އެއަށްވުރެ ރަނގަޅު އަދަދެއް ކާމިޔާބު ކުރަން މަސައްކަތް ކުރާނީ،"

ފައްޔާޒު އިސްމާއީލް

ފައްޔާޒު އިތުރަށް ވިދާޅުވީ މަޖިލިސް އިންތިޚާބު ކާމިޔާބުކޮށް ރައްޔިތުންގެ ހައްގުތައް ދިފާއުކުރުމަށް އެމްޑީޕީން މަސައްކަތްކުރާނެ ކަމަށާ ރާއްޖެ ހަލާކުގެ މަގަށް ދާން ދޫކޮށްލައިގެން މަޑުން ނުތިބޭނެ ކަމަށެވެ.

އަދި މަޖިލީހުގެ މެޖޯރިޓީ ސަރުކާރަށް ދީފިނަމަ ހިތުހުރި ގޮތެއް ހަދާނެކަން މިވީ ދުވަސްކޮޅުގެ ތެރޭ އެނގިގެން ގޮސްފައިވާ ކަމަށާ، އެ ސަބަބަށްޓަކައި ސަރުކާރު ކެންޑިޑޭޓުންނަށް ވޯޓު ދިނުމުގައި ރައްޔިތުން ވިސްނާލަންޖެހޭ ކަމަށް އޭނާ ވިދާޅުވި އެވެ.