ޣައްޒާގެ ޤަތުލުއާއްމު ހުއްޓާލަންދެން ތުރުކީން އިސްރާއީލަށް މުދާ އެކްސްޕޯޓު ކުރުން ހުއްޓާލަނީ

ޣައްޒާގައި ޔަހޫދީން ހިންގަމުންދާ ޤަތުލުއާއްމު ހުއްޓާލަންދެން ތުރުކީން އިސްރާއީލަށް ވަކި ބާވަތްތަކެއްގެ މުދާ އެކްސްޕޯޓު ކުރުން ހުއްޓާލުމަށް ނިންމައިފިއެވެ.

ތުރުކީގެ ޓްރޭޑް މިނިސްޓްރީ ބުނީ އިސްރާއީލުން ކެނޑިނޭޅި ބައިނަލްއަގުވާމީ ގާނޫނާއި ޚިލާފަށް ޣައްޒާ އަށް ހަމަލާ ދެމުންދާ ކަމަށާއި، އދ އަށް ވެސް އިސްރާއީލުން ބޯ ނުލަބާ ކަމަށެވެ. މިހުރިހާ ކަމެއް އިސްރާއީލުން ތަންފީޒު ކުރާ ގޮތް ތުރުކީން ބަލަމުންދާނެ ކަމަށް ތަކުރާރުކޮށް ބުނެފައިވާނެ ކަމަށް ވެސް އެ މިނިސްޓްރީން ވަނީ ބުނެފައެވެ.

އިސްރާއީލުގެ ފަރާތުން އެދެވޭ ބަދަލެއް ނުފެނުމުގެ ސަބަބުން، ތުރުކީން ވަނީ އެގައުމުން އިސްރާއީލަށް ބޭރުކުރާ 54 ބާވަތެއްގެ މުދާ ބޭރު ކުރުން ހުއްޓާލާފައެވެ. އޭގެ ތެރޭގައި، އެލުމިނިއަން ނަރާއި، ސިމެންތި އާއި ކެމިކަލްތަކާއި ތަފާތު ބާވަތްތަކުގެ އިންޖީނާއި ޖެޓު ތަކަށް އަޅާ ތެޔޮ ވެސް ހިމެނެއެވެ.

މިކަމާއި ގުޅިގެން ތުރުކީގެ ޓްރޭޑް މިނިސްޓްރީން ނެރުނު ބަޔާޏެއްގައި ބުނީ، އިސްރާއީލުން ބައިނަލްއަގުވާމީ ގާނޫނަށް ބޯލަބައި، ޣައްޒާ އަށް އެހީ ވެއްދުމަށް މަގުފަހި ކޮށްދީ، ހަނގުރާމަ ވަގުތުން ހުއްޓާލަންދެން މި ފިޔަވަޅު ދަމަހައްޓާނެ ކަމަށެވެ.

މި ހަފްތާގެ ހޯމަ ދުވަހު ތުރުކީގެ ފޮރިން މިނިސްޓަރު ހަކާން ފިދާން ވަނީ ވައިގެ މަގުން ޣައްޒާއަށް އެހީ ފޯރުކޮށްދޭނެ ގޮތްތަކަށް އިސްރާއީލުން ދެކޮޅު ހެދުމާއި ގުޅިގެން އިސްރާއީލާއި މެދު ފިޔަވަޅު ތަކެއް އަޅާނެ ކަމަށް ބުނެފައެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ޔަހޫދީން ޣައްޒާއަށް ހަމަލާދޭން ފެށީއްސުރެ ވެސް ތުރުކީން އަންނަނީ މި ހަމަލާތައް ކުށްވެރިކޮށް، ބައިނަލްއަގުވާމީ ފެންވަރުގައި ވެސް ޣައްޒާ ދިފާއު ކުރަމުންނެވެ. މިގޮތުން، މި ހަމަލާތައް ދޭން ފެށި އިރު، ހުޅަނގުގެ ވެރިރަށްތަކުން އިސްރާއީލުގެ ހަނގުރާމައަށް ތާއީދުކުރި އިރުވެސް، ތުރުކީގެ ރައީސް އުރުދުޣާން އޭނާގެ ޕްލެޓްފޯމް ބޭނުން ކުރެއްވީ އެ ޖަމާއަތުގެ ނަސްލު ނައްތާލުމުގެ އަމަލުތައް ފަޅާއަރުވާލުމަށެވެ.

އޭގެ އިތުރުންވެސް މިދިޔަ އަހަރު ތުރުކީގެ ޕާލަމެންޓް މެމްބަރުންނާއި ސަރުކާރަށް ތާއީދުކުރާ ފަރާތްތަކުން، އިސްރާއީލަށް ތާއީދުކުރާ ކަމަށް ތުހުމަތު ކުރެވޭ ކުންފުނިތައް ވަނީ ބޮއިކޮޓް ވެސް ކޮށްފައެވެ.