ކޮމަންޑޫ އެއާޕޯޓް ވެސް 30 މަސްތެރޭ ހުޅުވޭނެ: ރައީސް

ގިނަވެގެން 30 މަސްދުވަހުގެ ތެރޭގައި ށ. ކޮމަންޑޫ އެއޕޯޓުގެ މަސައްކަތް ނިންމަވައި، އެއާޕޯޓު ހުޅުވޭނެކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިރޭ ދެއްވައިފި އެވެ.

ކޮމަންޑޫއަށް ވަޑައިގެން އެރަށުގެ ރައްޔިތުންނާ މިރޭ ބައްދަލުކުރައްވައި، ވާހަކަފުޅުދައްކަވަމުން ރައީސް ވިދާޅުވީ ކޮމަންޑޫގައި އެއާޕޯޓް ތަރައްގީ ކުރުމަށް ބޭނުންވާ ބިން ހިއްކުމަށްޓަކައި އަމަލީގޮތުން ކުރަންޖެހޭ މަސައްކަތްތައް މިއަދު ފެށިފައިވާ ކަމަށެވެ. އަދި ވިދާޅުވީ އެންމެ ލަސްވެގެން އަށް މަސްދުވަހުގެ ތެރޭގައި ބިންހިއްކުމުގެ މަސައްކަތް ނިމޭނެކަމަށެވެ.

އަދި ވިދާޅުވީ ގިނަވެގެން 30 މަސްދުވަހުގެ ތެރޭގައި ށ. ކޮމަންޑޫ އެއޕޯޓުގެ މަސައްކަތް ނިންމަވައި، އެއާޕޯޓު ހުޅުވޭނެކަމުގެ ޔަގީންކަން ދެއްވާ ކަމަށެވެ.

މި ފަހުން ފެށި ކޮންމެ އެއާޕޯޓެއް ވެސް ނިންމަވާނެ ކަމަށް ރައީސް ވިދާޅުވަނީ 30 މަސް ދުވަހުގެ ތެރޭގަ އެވެ. އެގޮތުން މިހާތަނަށް ހަތަރު އެއާޕޯޓެއް އެ ތާރީހުގައި ނިންމަވާނެ ކަމަށް ރައީސް ވިދާޅުވި އެވެ. އެއީ;

* ށ. ކޮމަންޑޫ އެއާޕޯޓް

* ށ. ބިލެތްފަހި އެއާޕޯޓް

* ފ. ނިލަންދޫ އެއާޕޯޓް

* އއ. މަތިވެރި އެއާޕޯޓް

އެއާޕޯޓް ތަރައްގީ ކުރުމުގެ މަޝްރޫއަކީ ށ. ކޮމަންޑޫއަށް އެންމެ މުހިންމު މަޝްރޫއުކަމުގައި ފާހަގަކުރައްވައި ވާހަކަފުޅުކުރިއަށްގެންދަވަމުން ރައީސުލްޖުމްހޫރިއްޔާ ވަނީ، ރަށުގެ ތަރައްގީއަށްޓަކައި އެހެނިހެން ދާއިރާތަކުން ކުރިއެރުން ހޯއްދަވައިދެއްވުމަށް އެމަނިކުފާނުގެ ސަރުކާރުން ކުރައްވަމުންގެންދަވާ ބައެއް މަސައްކަތްތަކަށް އަލިއަޅުއްވާލައްވާފަ އެވެ.

އެގޮތުން އެންމެ މުހިންމުކަމެއްގެ ގޮތުގައި، ރަށުގެ ބޯހިޔާވަހިކަމުގެ މައްސަލައަށް ހައްލު ހޯއްދަވައިދެއްވުމުގެ ގޮތުން، 2026 ވަނަ އަހަރު، ށ. ކޮމަންޑޫގައި 50 ހައުސިންގް ޔުނިޓް ތަރައްގީ ކޮށްދެއްވާނެ ކަމުގައި އެމަނިކުފާނު ފާހަގަކުރެއްވި އެވެ. އަދި، އަންނަ އަހަރުގެ ކުރީކޮޅު، މި މަޝްރޫއުގެ އަމަލީ މަސައްކަތް ފެށޭނެ ކަމުގެ ޔަގންކަންވެސް އެމަނިކުފާނު ވަނީ ދެއްވާފައެވެ.

އިތުރަށް އިއުލާނު ކުރެއްވި ކަންކަން

* ސްކޫލުގެ މަރާމާތުގެ މަސައްކަތް

* އިންޑޯ ސްޕޯޓްސް ކޮމްޕްލެކްސްއެއް ތަރައްގީކުރުން

* އަހަރު ނިމުމުގެ ކުރީން ޑައެލަސިސް ހިދުމަތް ފެށުން

މީގެ އިތުރުން ރައީސް ވަނީ ހުއްޓިފައިވާ ފެނާއި ނަރުދަމާގެ މަސައްކަތްތައް ނިންމަވައިދެއްވައި، އެނޫންވެސް އެކި ދާއިރާތަކުން ރަށަށް ބޭނުންވާ މުހިންމު ތަރައްގީ ހޯއްދަވައިދެއްވާނެކަމުގައި ރައީސުލްޖުމްހޫރިއްޔާ ވިދާޅުވި އެވެ. އަދި ކުރިމަތިވާ މައްސަލަތަކަށް ހައްލު ހޯއްދަވައިގެން، އެމަނިކުފާނު ވެވަޑައިގެންފައިވާ ވައުދުތައް ހަގީގަތަކަށް ހައްދަވައިދެއްވައި، ރައްޔިތުންނާ ހިސާބަށް އެކަންކަން ގެނެސްދެއްވޭނެކަމުގެ ޔަގީންކަން އެމަނިކުފާނު ވަނީ ތަކުރާރު ކޮށްދެއްވާފަ އެވެ.