އެއްވެސް ބޯޓަކުން ހޮރުމޯޒް ކަނޑުއޮޅި ހުރަސްނުކުރުމަށް އީރާނުގެ އިންޒާރެއް

އެއްވެސް އުޅަނދަކުން ހޮރުމޯޒް ކަނޑުއޮޅި ހުރަސް ނުކުރުމަށް އީރާނުގެ އަސްކަރިއްޔާއިން އިންޒާރުދީފިއެވެ.

އީރާނުގެ ބައެއް މީޑިއާތަކުން ބުނެފައިވަނީ، ހޮރުމޯޒް ކަނޑުއޮޅިން ދަތުރު ނުކުރުމަށް އެދި އީރާނުގެ އިސްލާމިކް ރެވެލިޔުޝަނަރީ ގާޑް ކޮޕުންގެ ފަރާތުން ބޯޓުތަކަށް އޯޑިއޯ މެސެޖެއް ފޮނުވާފައިވާަކަމަށެވެ. ވީއެޗްއެފް ރޭޑިއޯ ޓްރާންސްމިޝަން މެދުވެރިކޮށް ފޮނުވި މި މެސެޖްގައި އީރާނުގެ އަސްކަރިއްޔާއިން ވަނީ އެއްވެސް އުޅަނދަކުން ރޮރުމޯޒް ކަނޑުއޮޅި ހުރަސް ނުކުރުމަށް އިލްތިމާސްކޮށްފައެވެ.

އެމެރިކާ އަދި އިސްލާއީލުން އީރާނަށް ދިން ހަމަލާތައް ވަރަށް ސީރިއަސްކޮށް އީރާނުން ނަގާފައިވާއިރު، އީރާނުން ބުނެފައިވަނީ ރައްދުގައި ހަމަލާދިނުން ނޫންގޮތެއް ދެން ނެތްކަމަށެވެ. އެމެރިކާއިން އީރާނަށް އެންމެފަހުން ހަމަލާދިން ފަހަރުވެސް އޮރުމޯޒް ކަނޑުއޮޅި ބަންދުކުރަން އީރާނުން ނިންމިއެވެ. ނަމަވެސް ފަހުން އީރާނުގެ ނިންމުން ވަނީ ބަދަލުކޮށްފައެވެ.

ނަމަވެސް އީރާނުން ވަނީ މިފަހަރު މި މައްސަލަ ވަރަށް ސީރިއަސް މައްސަލައެއްގެ ގޮތުގައި ނަގާފައެވެ. އީރާނުގެ މި އިންޒާރާއެކު ވިލާތުގެ އިއްތިހާދުގެ (އީޔޫ) 'އޮޕަރޭޝަން އެސްޕައިޑްސް'އިން ވަނީ އެލާޓަށް އައިސްފައެވެ. އެސްޕައިޑްސް އަކީ ރަތްކަނޑާއި އެ ސަރަހައްދުގެ ކަނޑުގެ މަގުތަކުގައި ވިޔަފާރި އުޅަނދުފަހަރުގެ ރައްކާތެރިކަން ކަށަވަރުކުރުމަށް ޔޫރަޕްގެ ޤައުމުތަކުގެ އަސްކަރިއްޔާއިން ހަދާފައި އޮންނަ އަސްކަރީ ޖަމާއަތެކެވެ.

ހޮރުމޯޒް ކަނޑުއޮޅި ބަންދުކުރުމަކީ އެމެރިކާގެ އިތުރުން ޔޫރަޕާއި، އެނޫންވެސް ބާރުތަކުން އަބަދުވެސް ވަރަށް ސީރިއަސްކޮށް ނަގާ ކަމެކެވެ. މީގެކުރިން އީރާން އާއި އެމެރިކާގެ ގުޅުން ގޯސްވާ ކޮންމެފަހަރަކު، އީރާނުން އެ ކަނޑުއޮޅި ބަންދުކުރާނޭކަމުގެ އިންޒާރު ދެއެވެ.

ދުނިޔޭގެ ބާޒާރަށް ބޭރުކުރާ ތެލުގެ 40 އިންސައްތަ ބޭރުކުރަނީ ހޮރުމޯޒް ކަނޑުއޮޅިންނެވެ. އެ ކަނޑުއޮޅި ބަންދުކޮށްފިނަމަ، ގަލްފްގެ ގައުމުތަކުން ތެއޮ ބޭރުކުރުމަށް ގިނަ ވަގުތުތަކެއްނަގައި އެކަމަށް ކުރަންޖެހޭ ހޭދަ ވަރަށް ބޮޑުވެގެންދެއެވެ. އެހެންކަމުން ހޮރުމޯޒް ކަނޑުއޮޅި ބަންދުކޮށްފިނަމަ ދުނިޔޭގެ ބާޒާރުގައި ތެލުގެ އަގު އިންތިހާއަށް މައްޗަށްގޮސް ގައުމުތަކުގެ އިގްތިސާދު އިނދަޖެހުމުގެ ބިރު އެބައޮތްކަމަށް މާހިރުން އަބަދުވެސް ފާހަގަކުރެއެވެ.