ޗައިނާގެ އެންމެބޮޑު އިންޑަސްޓްރިއަލް ބޭންކް، އައިސީބީސީގެ ގޮތްޕެއް ރާއްޖޭގައި ހުޅުވަނީ

ޗައިނާގެ އެންމެބޮޑު، ބޭންކްތަކުގެ ތެރޭގައި ހިމެނޭ, އިންޑަސްޓްރިއަލް އެންޑް ކޮމާޝަލް ބޭންކް އޮފް ޗައިނާގެ ގޮތްޕެއް ރާއްޖޭގައި ހުޅުވުމަށް މަސައްކަތްކުރަމުންދާކަމަށް އިގްތިސާދީ ވުޒާރާއިން ހާމަކޮށްފިއެވެ.

މިކަމާއި ގުޅޭގޮތުން އިގްތިސާދީ ވަޒީރު މުހައްމަދު ސައީދު ވަނީ، ޗައިނާގެ އިންޑަސްޓްރިއަލް އެންޑް ކޮމާޝަލް ބޭންކް އޮފް ޗައިނާ (އައިސީބީސީ) ގެ ގޮތްޕެއް ރާއްޖޭގައި ހުޅުވުމަށް މަސައްކަތް ކުރަމުންދާކަން ވޮއިސްއަށް ކަށަވަރުކޮށްދެއްވާފައެވެ.

ވޮއިސްއާ ވާހަކަދައްކަވަމުން މިނިސްޓަރު ވިދާޅުވީ ޗައިނާ އާ ރާއްޖެއާ ދެމެދު ދެ ޤައުމުގެ ފައިސާއިން މުއާމަލާތްކުރުމަށް އެއްބަސްވުމެއް ޤާއިމްކުރުމަށް ތައްޔާރުވަމުންދާ މި ދަނޑިވަޅުގައި, ޗައިނާގެ އައިސީބީސީގެ ގޮތްޕެއް ހުޅުވުމަށް ކުރަންޖެހޭ މުއާމަލާތްތައް ކުރަމުންދާކަމަށެވެ.

އައިސީބީސީ އަކީ 1984 ވަނަ އަހަރު ވުޖޫދަށް އައި ބޭންކެކެވެ. ޗައިނާ ސަރުކާރުން ހިންގާ މި ބޭންކަކީ ޗައިނާގެ އެންމެބޮޑު ހަތަރު ބޭންކުގެ ތެރޭގައި ގުނާލެވޭ ބޭންކެކެވެ. އަދި ދުނިޔޭގެ ނިސްބަތުން ބެލިނަމަވެސް މި ބޭންކުގެ ހައިބަތު ވަރަށް ބޮޑެވެ. ހަރުމުދަލުގެ ގޮތުން ބަލާނަމަ މިއީ ދުނިޔޭގެ އެންމެބޮޑު ބޭންކެވެ. އައިސީބީސީގެ އާމްދަނީ 105 ބިލިއަން ޑޮލަރުގައި އުޅޭއިރު، މި ބޭންކްގެ ޖުމްލަ ރައުސުލްމާލު އެއް ޓްރިލިއަން ޑޮލަރަށްވުރެ އިތުރެވެ.

އައިސީބީސީގެ ގޮތްޕެއް ރާއްޖޭގައި ހުޅުވުމަށް މަސައްކަތްކުރަމުންދާކަމަށް އިޤްތިސާދީ ވުޒާރާއިން ހާމަކޮށްފައިވާއިރު، ޗައިނާގެ ޔުއާނުން ގަންނަ މުދަލަށް ދިވެހި ރުފިޔާއިން ފައިސާ ދެއްކުމާ ގުޅޭ އެއްބަސްވުމެއް ޤާއިމްކުރުމަށް ރާއްޖެ އާއި ޗައިނާ އާ ދެޤައުމުގެ ދެމެދުގައި އިއްޔެ ވަނީ އެއްބަސްވުމެއްގައި ސޮއިކޮށްފައެވެ. ދިވެހި ސަރުކާރާއި ޗައިނާގެ މަރުކަޒީ ބޭންކު ކަމަށްވާ ޕީޕަލްސް ބޭންކް، ޕީބީއޯސީއާ ދެމެދު ޤާއިމްކުރި އެއްބަސްވުމުގެ ދަށުން ދެޤައުމުން ކުރާ ވިޔަފާރީގެ މުއާމަލާތްތަކުގައި ދެ ޤައުމުގެ ފައިސާ ބޭނުންކުރުމަށް އޮނިގަނޑެއް އެކުލަވާލެވިގެންދާނެއެވެ.

އިކޮނޮމިކް މިނިސްޓްރީން ބުނީ މިއީ ދެ ޤައުމުގެ ދެމެދުގައި އިންވެސްޓްމަންޓްތައް އިތުރުކުރުމަށް އެޅިގެންދާނޭ މުހިއްމު ފިޔަވަޅެއް ކަމަށެވެ.

ރާއްޖެއާ ޗައިނާ އާ ދެޤައުމުގެ ދެމެދުގައި މިނިވަން އެއްބަސްވުމެއް ޤާއިމްކުރުމަށް ރައީސަް ޔާމިނުގެ ދުވަސްވަރު ވަނީ މަސައްކަތްކޮށްފައެވެ. ރައީސް ޔާމީނުގެ ވެރިކަން ނިމުނުއިރު، އެ އެއްބަސްވުމުގެ މާއްދާތައް އެކުލަވާލައި ދެފަރާތުގެ ދެމެދުގައި ސޮއިކުރަން އޮތީ ތައްޔާރުވެފައެވެ. ނަމަވެސް އޭގެފަހުން އައި ރައީސް ސޯލިހުގެ ސަރުކާރުން އެ އެއްބަސްވުމުގެ އެއްވެސް މަސައްކަތެއް ކުރިއަށް ގެންގޮސްފައެއް ނުވެއެވެ.

ވޮއިސްއަށް މައުލޫމާތު ލިބިފައިވާ ގޮތުގައި ޗައިނާ އާއި ރާއްޖެއާ ދެމެދު އެކުލަވާލި މިނިވަން ވިޔަފާރީގެ އެއްބަސްވުމުގައި ދެ ޤައުމުން ވަރަށް އަވަހަށް ސޮއިކުރުމަށް ދަނީ ތައްޔާރުވަމުންނެވެ.