އިންތިޚާބީ މަންދޫބުން ޖަވާބުދާރީ ކުރުވަން "ރިކޯލް ވޯޓު" އޮންނަންޖެހޭ: ފައްޔާޒު

ރާއްޖޭގެ ވެރިކަން ހިންގުމުގެ ނިޒާމަށް ގެންނަންޖެހޭ އެންމެ މުހިންމު އިސްލާހަކީ އިންތިޚާބުކުރެވޭ މަންދޫބުން ދައުރުގެ މެދުތެރެއިން ޖަވާބުދާރީކުރުވޭނެ "ރިކޯލް" ނިޒާމެއް ގާއިމުކުރުން ކަމަށް ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ.

ނޫސް މަޖައްލާއެއްގައި ލިޔުއްވި އާޓިކަލްއެއްގައި ފައްޔާޒު ވިދާޅުވީ، ގާނޫނުއަސާސީން އެންމެ ބޮޑަށް އުނިވާ އެއް ކަމަކީ އިންތިޚާބުކުރެވޭ މަންދޫބުން އެ މީހުންގެ ދައުރުގެ ތެރޭގައި ޖަވާބުދާރީ ކުރުވޭނެ ހަރުދަނާ ނިޒާމެއް ނެތުން ކަމަށެވެ. ސިޔާސީ މީހުންނަކީ ރައްޔިތުން ހަވާލުކުރާ މެންޑޭޓު ފުރިހަމަނުކުރެވި، ވައުދުތައް ފުއްދުމަށް ފެއިލްވާ ބައެއްކަން ފާހަގަކުރައްވައި، އޭނާ ވިދާޅުވީ މިފަދަ ނިޒާމެއްގެ ބޭނުންތެރިކަން ރާއްޖެއަށް މިހާރު އިންތިހާއަށް ބޮޑުވެފައިވާ ކަމަށެވެ.

"ރައްޔިތުންނަށް ގާނޫނީ ގޮތުން އެ ފުރުސަތު އޮތްނަމަ، މިހާރު ތިއްބެވި މަޖިލިސް މެންބަރުންނާއި ސަރުކާރުގެ އިސްވެރިންގެ ތެރެއިން ބޮޑު އަގުލަބިއްޔަތެއް މަގާމުން ވަކިކުރާނެކަމާމެދު އެއްވެސް ޝައްކެއް ނެތް،" ފައްޔާޒު ލިޔުއްވާފައިވެއެވެ.

މިއާއެކު "އެންޓި-ޑިފެކްޝަން" ގާނޫނަށް ފާޑުވިދާޅުވަމުން ފައްޔާޒު ވަނީ، އޭގެ ސަބަބުން ރައްޔިތުން އިންތިޚާބުކުރި މެންބަރުން ވަކިކުރުމުގެ ބާރު ރައްޔިތުންގެ އަތުން ބީވެ، ޕާޓީއަށް ލިބިގެންދާ ކަމަށާއި، މިއީ ބާރުތައް ވަކިވެފައި އޮތުމުގެ އަސާސް ފުނޑުފުނޑުކޮށްލި ބަދަލެއް ކަމަށް އޭނާ ވިދާޅުވިއެވެ.

ޕާޓީ ބަދަލުކުރުމުގެ މައްސަލައަށް އޮތް ހައްލަކީ މެންބަރުން ވަކިކުރުމުގެ ބަދަލުގައި، މެންބަރަކު ރައްޔިތުންގެ މެންޑޭޓަށް ހިޔާނާތްތެރިވެއްޖެކަން ނިންމުމުގެ ބާރު ސީދާ ރައްޔިތުންނަށް ދިނުން ކަމަށް ފައްޔާޒު ހުށަހެޅުއްވިއެވެ.

ރިކޯލް ވޯޓެއް ނެގުމަށް އޭނާ ހުށަހަޅުއްވާ އުސޫލަކީ:

1) ދާއިރާގެ ވޯޓުލާ އާބާދީގެ 40 އާއި 45 އިންސައްތަ މީހުން ސޮއިކޮށް ޕެޓިޝަނެއް ހުށަހެޅުން.

2) އިލެކްޝަންސް ކޮމިޝަނުން ސޮއިތަކުގެ ސައްހަކަން ކަށަވަރުކުރުން.

3) އެއަށްފަހު ރިފަރެންޑަމްއެއް ނަގައި ރައްޔިތުންގެ ބަސް ހޯދުން.

ނަމަވެސް، މިފަދަ ވޯޓެއް ނެގޭނެ ވަގުތުތަކަށް ހުދޫދުތަކެއް ކަނޑައަޅަންޖެހޭނެ ކަމަށް އޭނާ ވިދާޅުވިއެވެ. އެގޮތުން ދައުރުގެ ފުރަތަމަ ހަ މަސް އަދި ފަހު ހަ މަސް ދުވަހު ރިކޯލް ނުކުރެވޭ ގޮތް ހެދުމާއި، ދެ ރިކޯލް ވޯޓު ދެމެދު ވަކި މުއްދަތެއް އޮތުމަކީ ވެރިކަން ހިންގުމަށް ހުރަސް އެޅުނަ ނުދީ ހިފެހެއްޓޭނެ އުސޫލެއް ކަމަށް ފައްޔާޒު ފާހަގަކުރެއްވިއެވެ.