ބޭރު ސައިޓްތަކުގެ ވިޔަފާރުތަކުން %30 ފީ ނެގުމަކީ އާއްމު ރައްޔިތުންނަށް އުފުލަން ޖެއްސި ބޮޑު ބުރައެއް: ފައްޔާޒު

ވަރަށް ގިނަ ދިވެހިން އޮންލައިން ވިޔަފާރިކުރަމުންދާ ބޭރު ބައެއް ސައިޓްތަކުގެ ވިޔަފާރުތަކުން %30 ފީ ނެގުމަކީ އާއްމު ރައްޔިތުންނަށް އުފުލަން ޖެއްސި ބޮޑު ބުރައެއް ކަމަށް އެމްޑީޕީގެ ޗެއާޕާސަން ފައްޔާޒު އިސްމާޢީލް ވިދާޅުވެއްޖެއެވެ.

ބީއެމްއެލްއިން މިއަދު ނެރުނު ނޫސް ބަޔާނެއްގައި ވަނީ، އިންޓަނެޓް މެދުވެރިކޮށް ގިނަ ދިވެހިން، ވިޔަފާރިކުރާ ބައެއް ސައިޓްތަކުން ފައިސާ ދައްކާއިރު 30 އިންސައްތައާ ހަމައަށް ފީއެއް ނަގާނެކަން އިއުލާން ކޮށްފައެވެ.

އެ ސައިޓްތަކުގެ ތެރޭގައި ހިމެނެނީ، ޓީމޫ، ޝީއިން، އަލިބާބާ، އަލި އެކްސްޕްރެސް، ލަޒާޑާ އަދި އީބޭ އެވެ. މި ފީ ނެގޭނީ ރުފިޔާ އެކައުންޓް ތަކުން ކުރާ ވިޔަފާރިތަކަށް އެކަންޏެވެ. ޑޮލަރު އެކައުންޓްތަކުން ނަމަ އެ ފީއެއް ނުނަގާނެއެވެ.

މިކަމާ ގުޅިގެން ކަންބޮޑުވުން ފާޅުކުރައްވައި އެކްސްގައި ކުރެއްވި ޕޯސްޓެއްގައި ފައްޔާޒު ވިދާަޅުވީ، ގިނަ ބަޔަކު ބޭނުންކުރާ އީ-ކޮމާރސް ޕްލެޓްފޯމްތަކުން ކުރާ ބޭރު ފައިސާގެ މުޢާމަލާތްތަކަށް ބީއެމްއެލްއިން ނަގާ 30 އިންސައްތަ ފީއަކީ މީގެ ކުރިން ނުރަސްމީ ގޮތެއްގައި އޮތް ޑޮލަރު-ރުފިޔާ ބާޒާރަށް ރަސްމީ ހައިސިއްޔަތެއް ދީ، މަތީ އެކްސްޗޭންޖް ރޭޓެއް ކަނޑައެޅުން ކަމަށެވެ.

އަދި ”އެކި އެކްސްޗޭންޖް ރޭޓު ހިމެނޭ ނިޒާމެއް“ ރަސްމީކުރާ ހިސާބަށް ގޮސްފައިވުމަކީ މިހާރުގެ ޕީއެންސީ ސަރުކާރުގެ ސީދާ ނާކާމިޔާބީ ކަމަށާ އެއީ ރާއްޖޭގެ އިޤްތިޞާދު ހަމަޖެހިފައިނުވާކަމާއި ރަނގަޅަށް ބެލެހެއްޓިފައިނުވާކަމުގެ ނިޝާނެއް ކަމަށްވެސް އޭނާ ވިދާޅުވިއެވެ.

މިއީ މި ސަރުކާރުގެ ނުރަނގަޅު އިޤްތިޞާދީ އަދި ބޭރު ފައިސާގެ ސިޔާސަތުތަކަށް އިތުރުވި ކަންބޮޑުވާންޖެހޭ ފިޔަވަޅެއް. އަދި އެ ސިޔާސަތުތަކުގެ ނާކާމިޔާބީގެ ބުރަ އުފުލަންޖެހޭނީ އާންމު ރައްޔިތުންނަށް

ފައްޔާާޒު އިސްމާޢީލް

މިއާއެކު ފައްޔާޒު ވަނީ، މި ބަދަލުގެ ސަބަބުން އިއާދަނުކުރެވޭ ގެއްލުމެއް ވުމުގެ ކުރިން، ޤާބިލު ފަންނީ މާހިރުންނާއި ވިޔަފާރި ދާއިރާގެ ފަރާތްތަކާ މަޝްވަރާކޮށް، އަވަހަށް މިކަން ރަނގަޅު މަގަށް އެޅުވުމަށް ގޮވާލައްވާފައެވެ.