އިންޑިއާގެ ފައިސާގެ އަގު ރެކޯޑް މިންވަރަކަށް ދަށަށް؛ އެމެރިކާ ޑޮލަރަކަށް 93 ރޫޕީސް

އިންޑިއާގެ ފައިސާގެ އަގު އެ ގައުމުގެ ތާރީޚުގައި ވެސް ނުވެއްޓޭހާ ދަށަށް ހިގައްޖެއެވެ.

އެގޮތުން ބައިނަލްއަޤުވާމީ ބާޒާރުގައި އެމެރިކާ ޑޮލަރަކަށް ޖެހޭ ރޭޓް ފުރަތަމަ ފަހަރަށް 93 ރޫޕީސް އަށް ވުރެ މައްޗަށް އަރައި، ބާޒާރުގެ ބައެއް ވަގުތުތަކުގައި 93.28 އަށް ވެސް ރޫޕީސްގެ އަގު ވަނީ ވެއްޓިފައެވެ.

މި ބަދަލު އަންނަން މެދުވެރިވި އެންމެ ބޮޑު ސަބަބަކީ މެދުއިރުމަތީގައި، ހާއްސަކޮށް އީރާނާއި އިޒްރޭލާ ދެމެދު އުފެދިފައިވާ ހަނގުރާމައިގެ ސަބަބުން ތެލުގެ ބާޒާރަށް އައި ލޮޅުމެވެ. ތެޔޮ އުފުލާ މައި މަގުތައް ބަންދުވެ، ސޫދު ތެލުގެ އަގު ފީފާއަކަށް 110 ޑޮލަރަށް ވުރެ މައްޗަށް އެރުމަކީ އިންޑިއާ ފަދަ ތެޔޮ އިމްޕޯޓްކުރާ ގައުމެއްގެ ފައިސާއަށް ކުރިމަތިވި ވަރަށް ބޮޑު ގޮންޖެހުމެކެވެ.

މީގެ އިތުރުން، އިންޑިއާގެ ބާޒާރުން ބޭރުގެ އިންވެސްޓަރުން ގިނަ އަދަދަކަށް ފައިސާ ބޭރުކުރަމުންދިއުމަކީ ވެސް ރޫޕީސް ބަލިކަށިވާން ދިމާވި ސަބަބެކެވެ. މި މަހުގެ މިހާތަނަށް އެކަނިވެސް 9.8 ބިލިއަން ޑޮލަރު އިންވެސްޓަރުން ވަނީ އިންޑިއާގެ ބާޒާރުން ނެރެފައެވެ. މިއީ 2024 ވަނަ އަހަރުގެ ފަހުން އިންވެސްޓަރުން މިހާ ގިނަ އަދަދަކަށް ފައިސާ ބޭރުކުރި ފުރަތަމަ ފަހަރެވެ.

އިޤްތިސާދީ މާހިރުން ލަފާކުރާ ގޮތުގައި، ތެލުގެ އަގު މިގޮތަށް ހުރެއްޖެނަމަ ކުރިއަށް އޮތް ތަނުގައި ރޫޕީސްގެ އަގު 95 އަށް ވެއްޓުމަކީ އެކަށީގެންވާ ކަމެކެވެ. އިންޑިއާގެ މަރުކަޒީ ބޭންކުން (އާރް.ބީ.އައި) ބޭރު ފައިސާގެ ރިޒާވުން ޑޮލަރު ވިއްކައިގެން ރޫޕީސްގެ އަގު ހިފެހެއްޓުމަށް މަސައްކަތް ކުރި ނަމަވެސް، ދުނިޔޭގެ މަސްރަހު އޮތްގޮތުން ފައިސާގެ އަގު ދަނީ ހިފެހެއްޓުމެއް ނެތި ވެއްޓެމުންނެވެ.

އިންޑިއާގެ ނޫސްތަކުން ބުނާ ގޮތުގައި މިހާރު ކުރިމަތިވެފައިވާ އިންފްލޭޝަނާއި ތެލުގެ އަގު އުފުލުމުގެ ސަބަބުން އިންޑިއާގެ އިޤްތިސާދަށް އޮތް ނުރައްކާ ވަނީ ބޮޑުވެފައެވެ.