ނަތަންޔާހޫ ޣައްޒާ ޕްލޭން ބޭރުކޮށްލުމުންވެސް ގުޅުން ރަނގަޅު ކަމަށް ޓްރަމްޕް ބުނެފި

އިސްތިއުމާރީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އެމެރިކާއިން ހުށަހެޅި ޣައްޒާ ޕްލޭން ޤަބޫލުނުކުރި ނަމަވެސް ދެ ފަރާތުގެ ގުޅުން "ވަރަށް ރަނގަޅު" ކަމަށް ރައީސް ޑޮނަލްޑް ޓްރަމްޕް ބުނެފިއެވެ.

އިއްޔެ ބޭއްވު ނޫސްވެރިންގެ ބައްދަލުވުމުގައި ނޫސްވެރިއެއް ކުރި ސުވާލަކަށް ޖަވާބު ދެމުން ޓްރަމްޕް ބުނީ "ގުޅުން ވަރަށް ރަނގަޅު" ކަމަށެވެ.

ޣައްޒާ ޕްލޭނަކީ އޮކްޓޫބަރު މަހު އިޢުލާނުކުރި ހަމަލާ ބަދަލުކުރުން ހުއްޓައިލުމުގެ އެއްބަސްވުމުގެ ދަށުން ގެނައި އެންމެ ފަހުގެ ފިޔަވަޅެވެ. އެ އެއްބަސްވުމާ އެކު އިސްރާއީލުގެ ޢަސްކަރީ ޙަރަކާތްތައް މަދުވި ނަމަވެސް ޣައްޒާގައި ޤަތުލްޢާއްމު މުޅީން ހުއްޓިފައެއް ނުވެއެވެ.

ހަމާސް ހަތިޔާރު ބެހެއްޓުމާ އެކު އިސްރާއީލުގެ ސިފައިން ފޭބުން ހިމެނޭ މި ޕްލޭނަކީ ނަތަންޔާހޫގެ ކަނާތު ފިޔައިގެ ސަޕޯޓަރުންގެ މެދުގައި ނުތަނަވަސްކަން އޮތް ޕްލޭނެކެވެ. ކެބިނެޓުގައި ހިމެނޭ ހައްދުފަހަނައެޅި ކަނާތު ފިޔައިގެ މެންބަރުން ވެސް އެ ޕްލޭން ނިމުމަކަށް ގެނައުމަށް ނަތަންޔާހޫއަށް ބާރުއެޅީ ކަމަށް ރިޕޯޓުތައް ބުނެއެވެ.

ޓްރަމްޕާއި ނަތަންޔާހޫ ފެބްރުއަރީ ފަހުކޮޅު އީރާނާ ދެކޮޅު ހަނގުރާމައެއް ފެށި ނަމަވެސް އެ ހަނގުރާމައިގެ ސަބަބުން ޓްރަމްޕްގެ މަޤުބޫލުކަން ދަށަށް ގޮސް ތެލުގެ އަގު މައްޗަށް ދިޔުމުން ހަމަލާ ބަދަލުކުރުން ހުއްޓައިލުމަށާއި ދާއިމީ ޙައްލަކަށް މަސައްކަތް އޭނާ ފެށިއެވެ. އެ ހިސާބުން ދެ ލީޑަރުންގެ މެދުގައި ޚިޔާލު ތަފާތުވީއެވެ. ނަތަންޔާހޫ ދާދި ފަހަކާ ޖެހެންދެން ޓްރަމްޕާ އޮތް ގާތް ގުޅުން ކެމްޕެއިނުގެ ބާރެއްގެ ގޮތުގައި ދެއްކިއެވެ. ޓްރަމްޕް ވެސް ވަނީ އެމެރިކާގެ އެމްބަސީ ޤުދުސަށް ބަދަލުކުރުން ފަދަ ބޮޑެތި ފިޔަވަޅުތައް އިސްރާއީލުގެ ދިފާއުގައި އަޅައިފައެވެ.

އިސްރާއީލުގެ އެންމެ ގިނަ ދުވަސްވީ ބޮޑުވަޒީރު ނަތަންޔާހޫ އޮކްޓޫބަރު 27 ގައި ބާއްވާ އިންތިޚާބާ ކުރިމަތިލާ އިރު ބައެއް ޕޯލްތަކުގައި ވާދަވެރިންނާ އެއް ހަމައެއްގައި ނުވަތަ ފަހަތުގައި އޮތް ކަމަށް ދައްކައެވެ. 2023 ވަނަ އަހަރު ޣައްޒާގައި އިސްރާއީލުން ބޮޑު ޤަތުލްޢާއްމު ފެށުފަހުން އިސްރާއީލުގައި ބާއްވާ ފުރަތަމަ އިންތިޚާބަށް މި އިންތިޚާބު ވާނެއެވެ.

ޤަތުލްޢާއްމު ހުއްޓައިލުމުގެ އެއްބަސްވުމަށް ފަހުވެސް ޣައްޒާގައި ”ޢަސްކަރީ ޙަރަކާތްތަކު“ ނަމުގައި ހިންގަމުންދާ ޤަތުލްޢާއްމުގައި 1,250 އަށް ވުރެ ގިނަ ފަލަސްޠީނު ރައްޔިތުން ޝަހީދުކޮށްލައިފައިވާ ކަމަށް ޣައްޒާގެ ޞިއްޙީ ވުޒާރާއިން ބުނެއެވެ.