ކޮވިޑް-19 އާއި ގުޅިގެން ގޭގައި ކަރަންޓީން ކުރެވިފައިވާ ތިބޭ ފަރާތްތައް ދޫކޮށްލާއިރު ނަގަންޖެހޭ ސާމްޕަލް ނެގުމަށް މީގެ ފަހުން ގެއަށް ނުދާނެކަމަށް ހާމަކޮށްފިއެވެ.
ރޭ އޮތް ހެލްތު އިމަރޖެންސީ އޮޕަރޭޝަންސް ސެންޓަރުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާނު ޑރ.ނަޒްލާ ރަފީޤު ވިދާޅުވީ މިއަދުން ފެށިގެން މާލޭގައި ގޭގައި ކަރަންޓީން ކުރެވިފައިވާ ފަރާތްތަކުގެ ރިލީޒް ސާމްޕަލް ނެގުމުގެ މަސައްކަތް ކުރަމުންދާނީ މާފަންނު މަދަރުސާގައި ކަމަށެވެ.
އެގޮތުން ސާމްޕަލް ނަގަން ދާން ޖެހުމުން އެޗްޕީއޭގެ ފަރާތުން މެސެޖެއް ނުވަތަ ފޯންކޯލެއް އަންނާނެކަމަށް ޑރ.ނަޒްލާ ވިދާޅުވިއެވެ. މިފަދައިން އަންނަ އިރުގައިވެސް އާންމު ދަތުރުފަތުރުގެ ނިޒާމެއް ބޭނުން ނުކުރުމަށާއި، މާސްކް އަޅައި ގައިދުރުކަން ތަންފީޒުކުރުމަށް ނަޒްލާ އިރުޝާދު ދެއްވިއެވެ.
ޑރ.ނަޒްލާ އިތުރަށް ވިދާޅުވި ގޮތުގައި މާލޭގައި ރިލީޒް ސާމްޕަލް ނެގުމަށް މާފަންނު މަދަރުސާއަށް ދާންޖެހޭ ގޮތަށް ހަމަޖެހުނު ކަމުގައިވިޔަސް، ބަލި ހާލަތާއި އުމުރު ހުރިގޮތުން އެތަނަށް ނާދެވޭ ފަރާތްތަކުގެ ސާމްޕަލްތައް ނެގުމަށް ރެޕިޑް ރެސްޕޮންސް ޓީމްތަކުން ގެތަކަށް ދާނެއެވެ.
އަދި ހުޅުމާލެއާއި ވިލިމާލޭގައިވެސް މިހާތަނަށް ސާމްޕަލް ނެގުމަށް ހަމަޖެހިފައިވަނީ އާރްއާރްޓީތަކުން ކަމަށް މައުލޫމާތު ދެއްވިއެވެ.
Advertisement
This content is created and paid for by advertisers and does not involve Voice Journalists
