ރެއާލް މޮޅުވެ އެއްވަނައަށް، ބާސާއަށް ޕޮއިންޓެއް
ސްޕެނިޝް ލީގުގައި ރެއާލް މެޑްރިޑް އަދި ލެވަންޓޭ ވާދަކުރި މެޗް 2-0 ކުން ކާމިޔާބުކޮށް ރެއާލް މެޑްރިޑް ތާވަލުގެ އެއްވަނަ އަށް ޖެހިލައިފިއެވެ.
ރަށުން ބޭރުގައި ކުޅުނު މެޗުގައި ރެއާލްގެ ގޯލްތައް ކާމިޔާބު ކޮށްދިނީ ވިނީސިއަސް ޖޫނިއާ އަދި ކަރީމް ބެންޒީމާއެވެ. ބެންޒީމާގެ މި ގޯލަކީ އޭނާ ރެއާލްއަށް ކާމިޔާބު ކޮށްދިން 250 ވަނަ ގޯލެވެ.
ރެއާލް ޑޮމިނޭޓް ކުރި މި މެޗުގައި ފެނުނު ގޯލުތަކުގެ އިރުތުންވެސް އެޓީމް ވަނީ ނުރައްކާތެރި ހަމަލާތަކެއް އިދިކޮޅު ގޯލަށް ފޮނުވާލާފައެވެ. އެ ފުރުސަތުތަކުގެ ބޭނުން ނުހިފުނުއިރު ކެޕްޓަން ސާޖިއޯ ރާމޯސް ގޯލުތެރެއަށް ވައްދާލި ބޯޅައެއް ރެފްރީ ވަނީ ގޯލެއް ނޫންކަމަށްވެސް ނިންމާފައެވެ.
ރެފްރީ ނިންމީ ބޮލުން ގޯލުތެރެއަށް ބޯޅަ ވައްދާލަން އުޅުމުގެ ތެރޭގައި ރާމޯސް ފުއުލް ކޮށްފައިވާކަމަށެވެ.
ލީގުގައި ދެން ކުޅެވުނު މެޗުގައި ރެއާލްއާއި ވާދަވެރި ބާސެލޯނާ ކުޅުނު މެޗް ނިމުނީ 1-1 ކުން އެއްވަރުވެގެންނެވެ.
ނިމިދިޔަ ސީޒަނުގެ ޔޫރޯޕާ ލީގް ޗެންޕިއަން ސެވިއްޔާ އާއި ދެކޮޅަށް ބާސެލޯނާ ކުޅުނު މެޗުގައި ދާދި ހަމަހަމަ ކުޅުމެއް ފެނިގެންދިޔައިރު ސެވިއްޔާއިން ވަނީ 8 ވަނަ މިނެޓުގައި ޑި ޖޮންގް ޖެހި ގޯލާއެކު ލީޑް ނަގާފައެވެ. ނަމަވެސް އޭގެ ދެ މިނެޓް ފަހުން ޖޯޑީ އަލްބާ ދިން ބޯޅައަކުން ކޫޓީނިއޯ ވަނީ ބާސެލޯނާ އަށް ނަތީޖާ އެއްވަރު ކޮށްދީފައެވެ.
ތިން މެޗް ކުޅެ ދެޓީމަށްވެސް ހަތް ޕޮއިންޓް ލިބިފައިވާއިރު ބާސެލޯނާ 5 ވަނައިގަ އޮތީ ލަނޑުގެ ތަފާތުންނެވެ. ސެވިއްޔާ އޮތީ 6 ވަނައިގައެވެ.
Advertisement
This content is created and paid for by advertisers and does not involve Voice Journalists