ދިވެހިރާއްޖޭގައި ކޮވިޑް-19 ޖެހުނު މީހުންގެ ޖުމްލަ އަދަދު ބައިލައްކައަށްވުރެ މައްޗަށް!

ދިވެހިރާއްޖެއިން އިތުރު 2194 މީހަކު ކޮވިޑް-19އަށް ޕޮޒިޓިވްވެއްޖެއެވެ.

އެޗްޕީއޭއިން އާންމުކުރި ތަފާސް ހިސާބުތަކުން ދައްކާ ގޮތުގައި މިއަދުގެ އިރުއޮއްސި 6 ޖެހުމާއި ހަމައަށް މިބައްޔަށް 2194 މީހަކު ވަނީ އަލަށް ޕޮޒިޓިވް ވެފައެވެ. މީގެ ތެރޭގައި މާލޭ ސަރަޙައްދުން ޕޮޒިޓިވްވި 1698 މީހަކާއި، ރަށްރަށުން ޕޮޒިޓިވްވި 467 މީހަކާއި އަދި ރިސޯޓްތަކުން ޕޮޒިޓިވްވި 29 މީހަކު ހިމެނެއެވެ.

މީގެ ތެރެއިން 691 ކޭހަކީ ފާއިތުވެދިޔަ 24 ގަޑިއިރުގެ ތެރޭގައި ނެގުނު ސާމްޕަލްތަކުގެ ނަތީޖާއެވެ.

މިއަދާ ހަމައަށް މިބައްޔަށް ޕޮޒިޓިވްވި މީހުންގެ ޖުމްލަ ޢަދަދު 50،802 އަށް އަރާފައިވާއިރު، މި ބައްޔަށް 280 މީހަކަށް ފަރުވާދެމުން އަންނަނީ ހޮސްޕިޓަލުގައެވެ.

މިބަލިން ރަނގަޅުވި މީހުންގެ އަދަދު ވަނީ 30،403 އަށް އަރާފައެވެ.