އިސްރާއީލް ކުޅުންތެރިއަކާ ޖާރޒީ ބަދަލުކުރުމުން ރޮނާލްޑޯ ހޫނުފެނަށް

11 Jun 2021 | 21:33

ޔޫރޯ ފެށުމުގެ ކުރިން އިސްރާއީލް އާއި ދެކޮޅަށް އެންމެފަހުގެ ޗެމްޕިއަން ޕޯޗުގަލް ކުޅުނު އެކުވެރިކަމުގެ މެޗަށްފަހު އިސްރާއީލް ކުޅުންތެރިއަކާ ޖާރޒީ ބަދަލުކުރުމުން ކްރިސްޓިއާނޯ ރޮނާލްޑޯއަށް ބޮޑެތި ފާޑުކިޔުންތަކެއް އަމާޒުވެއްޖެ އެވެ.

މި މެޗު ޕޯޗުގަލް ކާމިިޔާބުކޮށްފައިވަނީ 4-0 ގެ ނަތީޖާއަކުންނެވެ. މި މެޗުގައި ޕޯޗުގަލް ޖެހި ހަތަރު ލަނޑުގެ ތެރެއިން ރޮނާލްޑޯ ވެސް ލަނޑު ޖަހާފައިވެއެވެ.

މެޗަށްފަހު ގިނަބައެއްގެ ލޮލުގައި އަޅައިގަތީ އިސްރާއީލް ކުޅުންތެރިއަކު ރޮނާލްޑޯގެ ކިބައިން ޖާރޒީ ބަދަލުކޮށްދިނުމަށް އެދުމުން އެކަން ކުރުމުންނެވެ.

ރޮނާލްޑޯ ވަނީ 2013 ވަނަ އަހަރު އިސްރާއީލް އާއި ދެކޮޅަށް ކުޅުނު މެޗަށްފަހު އިސްރާއީލް ކުޅުންތެރިން ޖާރޒީ ބަދަލުކުރަން އެދުމުން އެކަން ނުކޮށްފައެވެ. އެއީ ފަލަސްޠީނު ރައްޔިތުންނާއެކު ރޮނާލްޑޯ ހުރިކަން ހާމަވެގެންދިޔަ ކަމެއްގެ ގޮތުގައި އޭރު ގިނަބަޔަކު ސިފަކުރިއެވެ.

ޚާއްޞަކޮށް ރޮނާލްޑޯއަށް ސަޕޯޓުކުރާ ގިނަ އަދަދެއްގެ ސަޕޯޓަރުންވެސް އޭނާ ދިފާޢުކޮށް މިވީހާ ދުވަހު ވާހަކަދެއްކީ އެއީ މުސްލިމުންގެ ޙައްޤުތަކަށް އިޙުތިރާމުކުރާ ކުޅުންތެރިއެއްގެ ގޮތުގައެވެ.

ފަލަސްޠީނާއި އިސްރާއިލްގެ މަޝްރަހު ހޫނުވި ދުވަސްވަރަކާއި ދިމާކޮށް ރޮނާލްޑޯގެ މި ޢަމަލުން އޭނައަށް ސަޕޯޓުކުރާ ގިނަ އަދަދެއްގެ މުސްލިމް ސަޕޯޓަރުން ވަނީ އެ ސަޕޯޓު އަނބުރާ ގެނައިކަން ހާމަކޮށްފައެވެ. އަދި ރޮނާލްޑޯގެ މި އަމަލު ކުށްވެރިކުރާ ކަމަށްވެސް އެ ސަޕޯޓަރުން ބުނެއެވެ.

Advertisement

ކޮމެންޓް

Advertisement