ގާޒީ ސްކޫލުގެ ދަރިވަރަކަށް ޖިންސީ ގޯނާ ކުރި ކަމުގެ ތުހުމަތުގައި އެ ސްކޫލުގެ ޓީޗަރަކު ހަވަރަށް ދީފިއެވެ.
ހުޅުމާލެ ދެވަނަ ފިޔަވަހީގައި މިރޭ ގާޒީ ސްކޫލުގެ ޓީޗަރަކު ހަވަރަށް ދީފައިވަނީ އެ ސްކޫލުގެ ގްރޭޑު 7 ގައި ކިޔަވަމުން އަންނަ ފިރިހެން ދަރިވަރަކަށް އެއްޖިންސ ގުޅުން ހިންގާ މަންޒަރު ފެންނަ ވީޑިއޯ ތަކެއް ދައްކައި ޖިންސީގޯނާކުރި ކަމުގެ ތުހުމަތުގައި އެ ކުއްޖާގެ އާއިލާ އަދި އާންމުން ނިކުމެއެވެ.
އެ ކުއްޖާގެ އާއިލާއިން "ވޮއިސް" އަށް މައުލޫމާތު ދިން ގޮތުގައި އެ ޓީޗަރު އެ ކުއްޖާއަށް ޖިންސީ ގޯނާކޮށް ގަދަކަމުން އެއްޖިންސުން ގުޅުން ހިންގަން މަސައްކަތް ކޮށްފައިވަނީ ޓިއުޝަން ދޭން ކަމަށް ބުނެ ޓީޗަރުގެ ގެއަށް ކުއްޖާ ގެންގޮސް ގެންނެވެ. މީގެ އިތުރުން އެ ކުއްޖާއަށް ޓީޗަރުގެ ފޯނުން އެއްޖިންސުން ގުޅުން ހިންގާ މަންޒަރު ފެންނަ ވީޑިއޯ އާއި ފޮޓޯ ދެއްކި ކަމަށް ކުއްޖާ ބުނެފައިވާ ކަމަށް އާއިލާއިން ބުނެއެވެ.
މި ޓީޗަރަކީ އެ ކުއްޖާ ގްރޭޑް 4 އިން ފެށިގެން ދަންނަ ޓީޗަރެއް ކަމަށާއި އާއިލާގެ މީހުންވެސް ދަންނަ، ގާތް ގުޅުމެއް އޮތް ޓީޗަރެއް ކަމަށް އާއިލާއިން ވަނީ ބުނެފައެވެ. އަދި މި ހާދިސާ ހިނގާފައިވަނީ މީގެ ދެ ހަފްތާ ކުރިން ކަމަށާއި އެކަން ފުލުހުންނަށް ރިޕޯޓު ކުރިތާ ދެ ހަފްތާ ވީއިރުވެސް ފުލުހުން އެއްވެސް ފިޔަވަޅެއް އަޅާފައިނުވާ ކަމަށް އާއިލާއިން ވަނީ ބުނެފައެވެ.
މި މައްސަލައިގައި ފުލުހުން ބުނެފައިވަނީ ހުޅުމާލެ ދެވަނަ ފިޔަވަހީގައި މީހަކަށް ބަޔަކު އަނިޔާކުރާ ކަމުގެ ރިޕޯޓެއް ލިބުމާއި ގުޅިގެން ފުލުހުން އެތަނަށް ގޮސް އެކަން ހުއްޓުވާފައިވާ ކަމަށެވެ. އަދި އަނިޔާ ލިބުނު 29 އަހަރުގެ ދިވެހި ފިރިހެން މީހާ މިވަގުތު ހުރީ ފުލުހުންގެ ބެލުމުގެ ދަށުގައި ކަމަށްވެސް ފުލުހުން ވަނީ ބުނެފައެވެ. އަދި މި މައްސަލައިގައި ފުލުހުން ބަލަންޖެހޭ ކަންކަން ބަލަމުންދާ ކަމަށްވެސް އެ އިދާރާއިން ވަނީ ބުނެފައެވެ.
މަންޒަރުދުއް ފަރާތަކުން "ވޮއިސް" އަށް މައުލޫމާތު ދިން ގޮތުގައި އެ މީހާއަށް ހަމަލާދިން ދެ މީހަކުވެސް ފުލުހުން ހައްޔަރު ކުރުމަށްފަހު މިހާރު ވަނީ ދޫކޮށްލާފައެވެ.
Advertisement
This content is created and paid for by advertisers and does not involve Voice Journalists
