އެމެރިކާގެ ކުރީގެ ރައީސް ޑޮނާލްޑް ޓްރަމްޕުގެ ދިރިއުޅުއްވަމުން ގެންދަވާ ފްލޮރިޑާގެ ޕާމް ބޯޗުގެ މާރް-އަ-ލާގޯގައި ހުންނަ ރިސޯޓުން 700 ސަފްހާގެ ސިއްރު ލިޔުންތަކެއް ހޯދާފައިވާކަމަށް އެ ގައުމުގެ ގައުމީ އަރުޝީ(ނެޝަނަލް އާކައިވްސް އެންޑް ރެކޯޑްސް އެޑްމިނިސްޓްރޭޝަނުން) ހާމަކޮށްފިއެވެ.
އެ އިދާރާއިން ބުނީ އެ ލިޔުންތައް ހޯދައިފައިވަނީ އެމެރިކާގެ އެފްބީއައިގެ އެޖެންޓުން މި މަހުގެ 8 ވަނަ ދުވަހު ފްލޮރިޑާގެ ޕާމް ބީޗްގައި ހުންނަ، ޓްރަމްޕުގެ ރިސޯޓް ކަމަށްވާ މާރްއާލޯގޯ ރެސޯޓަށް ވަދެ ހިންގި އޮޕަރޭޝަންގައެވެ.
އެފް.ބީ.އައި.އިން ވަނީ ވައިޓް ހައުސްގެ ލިޔެކިޔުންތައް ހުރި 20 ފޮށިގަނޑު ހޯދާފައެވެ. އޭގެ ތެރޭގައި އެމެރިކާގެ ޤައުމީ ސަލާމަތާ ގުޅުންހުރި މަޢުލޫމާތުގެ މައްޗަށް އެކުލެވޭ ސިއްރު ލިޔެކިޔުންތައް ހިމެނެއެވެ.
އެ ޤައުމުގެ ޤައުމީ އަރުޝީފުން ޖަނަވަރީ މަހު ވެސް ވަނީ ޓްރަމްޕް ވަގަށް ގެންދަވާފައިވާ ގިނަ އަދަދެއްގެ ލިޔެކިޔުންތައް ހޯދާފައެވެ.
އެމެރިކާގެ ނެޝަނަލް އާކައިވްސް އެންޑް ރެކޯޑްސް އެޑްމިނިސްޓްރޭޝަނުން ތުހުމަތުކުރާގޮތުގައި 2021 ވަނައަހަރުގެ ޖަނަވަރީ މަހުގެ 20 ވަނަ ދުވަހު ރިއާސީ ދައުރު ފުރިހަމަ ކުރައްވައި ޓްރަމްޕް ވައިޓްހައުސްއިން ނުކުމެ ވަޑައިގަތުމުގެ ކުރިން އޭނާ ވަނީ ވައިޓް ހައުސްއިން ގިނަ އަދަދެއްގެ ރަސްމީ ހައްސާސް ލިޔުންތައް ވަގަށް ގެންދަވާފައެވެ.
އެހެން ނަމަވެސް ޓްރަމްޕު ވަނީ އެ ތުހުމަތުތައް ދޮގުކުރައްވާފައެވެ. އަދި އޭނާ ދިރިއުޅުއްވާ ގެއިން ފެނުނު ލިޔުންތަކަކީ އެފްބީއައި އޭޖެންޓުން ދުރާލާ ރާވައިގެން ބެހެއްޓި ލިޔުންތަކެއްކަމަށް ޓްރަމްޕް ގެންދަވަނީ ވިދާޅުވަމުންނެވެ.
Advertisement
This content is created and paid for by advertisers and does not involve Voice Journalists
