އެއްޖިންސުން ގުޅުން ހިންގުމުގެ ނުބައި އާދަ ދިވެހި މުޖުތަމައު ތެރޭގައި އިންތިހާއަށް ގިނަވެ، އެފަދަ އެތައް މައްސަލަތަކެއް ނިމިދިޔަ ޖޫން މަހުގެ ފަހުކޮޅުން ފެށިގެން ފުލުފުލުން އަންނަނީ ފެންމަތިވަމުންނެވެ. އެ ފާހިޝް ނުބައި ޢަމަލު ހިންގާ ވީޑިއޯތައް މީސްމީޑިއާގެ އެކި މަންސަތަކުގައި ދައުރުވަމުން ގޮސްފައިވާއިރު އެފަރާތްތަކަކީ ކޮބައިކަން ނުހަނު ސާފުކޮށް އޮތީ އެނގޭށެވެ.

ބަނގްލަދޭޝްގެ ރައްޔިތެއް ކަމަށްވާ އެމްޑީ އަލަމްގިރި އާއި އެކު މަތީ ފަންތީގެ ބޭބޭފުޅުން އެއްޖިންސުން ގުޅުން ހިންގައި ބަދުއަޚްލާގީ ޢަމަލުތައް ހިންގާ ކަމަށް ތުހުމަތު ކުރެވޭ އެ ވީޑިއޯތަކާއި ފޮޓޯތައް ލީކުވެ ފުލުހުން އެމައްސަލަތައް ބަލަމުންދާ ކަން އާއްމުންނަށް ހާމަވެގެންދިޔުމުގެ ކުރިން މިދިޔަ މާރިޗު މަހުގައި "ވޮއިސް" ނޫހުން އެކަމާއި ގުޅޭގޮތުން ފުލުހުންނާ ސުވާލު ކުރުމުން ފުލުހުންވަނީ އެކަމަށް އިންކާރު ކޮށްފައެވެ.

އެހެންނަމަވެސް، އެ ވީޑިއޯތައް ލީކުވުމުގެ ކުރިންވެސް ފުލުހުން އެ މައްސަލަތައް ބަލަމުން އައި ކަމަށް ފަހުން ފުލުހުންވަނީ އެއްބަސްވެފައެވެ. ވުމާއެކު މި ބޭބޭފުޅުން އެއްޖިންސުން ގުޅުން ހިންގި ކަމަަށް ތުހުނަތުވާ މައްސަލައާއި، އެފަރާތްތަކަށް ބްލެކްމެއިލްކުރާ މައްސަލައަކީ މީގެ ހަތަރު މަސް ކުރިން ފުލުހުން ބަލަމުން އައި މައްސަލަ އެއްކަން ކަށަވަރުވެފައިވާއިރު، އެހާ ދުވަސްވަންދެންވެސް ހޯމް މިނިސްޓަރ އިމްރާންގެ ބެއްލެވުމުގެ ދަށުގައިވާ ފުލުހުންގެ މުއައްސަސާއިން ތިބީ އެމީހުން ހައްޔަރު ނުކޮށް މިނިވަންކަމާއި އެކު ދޫކޮށްލާފައެވެ.

އެހެންކަމުން އެމީހުން ހައްޔަރު ކުރުމަކީ އިމްރާންގެ ބާރުން، އިމްރާންގެ ރަނގަޅު ކަމުން ކުރި ކަމެއް ނަމަ، ރައްޔިތުންނަށް އެކަން އާއްމުވެ ރައްޔިތުންގެ ލޭކެކެންދެން މަޑުކުރީ ކީއްވެތޯ ސުވާލު އުފެދެއެވެ. އެފަރާތްތަކާއި ދެކޮޅަށް ފުލުހުންނަށް ހެކި ހޯދުނުކަމަށްމިވީ އާއްމު ރައްޔިތުންނަށްވެސް އެ ހެކި ފެނުމުންނެވެ.

އެއްޖިންސުން ގުޅުން ހިންގި މައްސަލައިގައި ކަންކަން މިފަދައިން ހިނގާފައިވާއިރު، އެ މައްސަލަ އާއި ވަރަށް ކައިރިން ފެންމަތިވި އެހެން މައްސަލަ އެއް ކަމަށްވާ ޔޯގާ ހަމަނުޖެހުމުގެ މައްސަލަ ފެންމަތިވުމާއި އެކު، އެދުވަހާއި ގުޅޭ ފޮޓޯއާއި ވީޑިއޯތަށް ހޯދައި, އެ ތަކެތީގެ އެހީގައި ފިސާރި ހަލުއިކަމާއިއެކު އެ މައްސަލައިގެ ތަހުގީގު ހިންގައި ފުލުފުލުން، ދީނީ ޢިލްމުވެރިންނާއި އެކަމަށް ތުހުމަތުވާ މީހުން ހައްޔަރު ކުރަންފަށާފައިވަނީ ވެސް މިހާތަނަށް ދީނަށް އެންމެ ބޮޑަށް ޚިދުމަތް ކުރި ޕާޓީ އެއް ކަމަށް ދައުވާ ކުރާ އަދާލަތުޕާޓީގެ ރައީސް އިމްރާން ހޯމް މިނިސްޓަރ ގެ މަގާމުގައި ހުންނަވަނިކޮށެވެ. އެހެންނަމަވެސް މި މައްސަލާގަައި އަދާލަތުޕާޓީ އާއި އިމްރާންގެ ރާގު މުޅިން ތަފާތެވެ.

އެ އެންމެ ބޭފުޅުންވެސް ވިދާޅުވަމުން އައީ މި މައްސަލަ އާއި ގުޅިގެން ހައްޔަރުކޮށްފައިވާ ޢިލްމުވެރިންނާއި އެހެނިހެން ފަރާތްތައް ހައްޔަރު ކުރުމަކީ ނުވަތަ ދޫކޮށްލުމަކީވެސް އިމްރާންގެ ބާރުގެ ދަށުގައި އޮތް ކަމެއް ނޫންކަމަށެވެ. އަދި އިލްމުވެރީންގެ ބަންދު އިތުރު ކުރަނީ ފަނޑިޔާރުން ކަމަށް ދައްކަން އެމީހުންވަނީ މަސައްކަތް ކޮށްފައެވެ.

ޚުދު ޢިމްރާންވެސްވަނީ އެކަމުގައި އޭނާގެ ބާރެއް ނެތް ކަމަށް ދޭހަވާފަދަ މޭރުމަކުން ޓުވީޓު ކުރައްވައި އެއްވެސް މީހަކަށް އަދި ޚާއްސަކޮށް ދީނީ ޢިލްމުވެރިއަކަށް އޭނާ އަނިޔާ ނުކުރާނެ ކަމަށް ވިދާޅުވެފައެވެ. އަދި އަނިޔާ ލިބޭ މީހުންގެ ދުޢާއިން ރައްކާތެރިވުމަށް ފުލުހުންނަށާ، މޯލްޑިވްސް ކަރެކްޝަނަލް ސަރވިސަސް ގެ އޮފިސަރުންނަށް އިލްތިމާސްކޮށްފައެވެ.

ވީއިރު ޢިމްރާންނަށް ޖަވާބުދާރީވާންޖެހޭ ފުލުހުން ބަލަމުންދާ އެއްމައްސަލާގައި ޢިމްރާންގެ ފުރިހަމަ ބާރާއި ކޮންޓްރޯލް އޮވެފައި އަނެއް މައްސަލާގައި އެބާރާއި ކޮންޓްރޯލް ނެތުމަކީ އެއްގޮތަކަށްވެސް ގަބޫލުކުރެވޭނެކަމެއް ނޫނެވެ.

މި ދެ ހާދިސާގެ ތަންކޮޅެއް ކުރިން، 2020 ވަނައަހަރުގެ ޖޫންމަހުގައި، ހަމަ މި ހޯމް މިނިސްޓަރގެ އެ މަގާމުގައި ހުންނަވަނިކޮށް ހިނގައި ދިޔަ އެހެން ހާދިސާއަކަށް ބަލާލާއިރު، "ރޯޔަލް ރޭޕް ކޭސް" ފާހަގަކޮށްލަން ޖެހެއެވެ.

މިއީ، ސަރުކާރުގެ މަތިފަޑީގެ ބޭފުޅުން ކަމަށް ތުހުމަތުކުރެވޭ ބަޔަކު ސަފާރީއެއްގެ ތެރޭގައި މަސްތުގެ ހާލުގައި ތިބެގެން ކެންޔާ އަންހެނަކު ރޭޕް ކުރި މައްސަލައެވެ.

މި މައްސަލަ އާއި ގުޅިގެން ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމެޓީގައި ވާހަކަދައްކަވަމުން ޑެޕިއުޓީ ކޮމިޝަނަރު އޮފް ޕޮލިސް އަބްދުލް މަންނާނު ޔޫސުފް ވިދާޅުވީ އެމައްސަލައިގައި ފުލުހުން ހައްޔަރުކުރީ ދެ މީހަކު ކަމަށާއި އެމީހުންގެ ކުޑަކަމުދާ ތަކެތި ނުނެގީ އެމީހުން ތިބީ މަސްތުވެގެން ކަމަށް ފުލުހުންނަށް ނުބެލެވޭތީ ކަމަށެވެ.

ސަފާރީގައި ހިނގި ޖިންސީ ގޯނާގެ މައްސަލާގައި ފުލުހުން ތަހުގީގު ހިންގި ގޮތާމެދު ބޮޑެތި ސުވާލުތަކެއް ކުރިމަތިވެފައިވީއިރު އެ މައްސަލާގައި ތުހުމަތު ކުރެވޭ ދެ ފިރިހެނަކު ހައްޔަރުކުރުމަށްފަހު ދޫކޮށްލުމުން ވެސް ފާޑުކިޔުން ފުލުހަށް އަމާޒުވި އެވެ.

އޭގެ ފަހުން، ސަފާރީގައި ހިނގީ ރޭޕެއް ނޫން ކަމަށް ހޯމް މިނިސްޓަރު އިމްރާން ވިދާޅުވުމުން، އެ މައްސަލަ އިތުރަށް ހޫނުވެ، އިމްރާންގެ އިތުބާރުނެތް ކަމުގެ މައްސަލައެއް އިދިކޮޅުން އިސްވެ ރައްޔިތުންގެ މަޖިލީހަށްވެސް ހުށަހެޅި އެވެ.

އެހެން ނަމަވެސް، މަޖިލިސް ކޮންޓްރޯލް ކުރާ އެމްޑީޕީގެ ތާއީދު ނުލިބި، އެ މައްސަލައިން އިމްރާން ވަނީ ސަލާމަތްވެފައި އެވެ.

އިތުބާރު ނެތް ކަމުގެ މައްސަލަ އިން ރެކެވުނަސް، ހޯމް މިނިސްޓަރު ޢިމްރާން އިހުމާލުން ނުވަތަ ގަސްތުގައި އަޅާނުލުމުގެ ސަބަބުން ބޮއްސުން ލައިގެން ގޮސްފައިވާ އެފަދަ އެތައް މައްސަލައެއް ހުރިއިރުވެސް، އެންމެ ކަމެއްގައި ރައްޔިތުން ރަތަށް އެރުމުން ފިޔަވަޅު އެޅުމަށްޓަކައި ކިޔަންވީ ސަނާ ހެއްޔެވެ؟