މުޅި މި ދިވެހިރާއްޖޭގެ އިގްތިސާދު ވެސް އެކަމެއްގެ މައްޗަށް ބަރޯސާ ވެފައިވާ، ޓޫރިޒަމް އިންޑަސްޓްރީ ހުއްޓުމަކަށް ގެނައުމަށްޓަކައި، ދިވެހިރާއްޖޭގެ އިއްޒަތާއި ކަރާމާތަށް ބެލުމެއްނެތި ދުނިޔޭގެ އެކި ކަންކޮޅުތަކުގައި ދިވެހިރާއްޖޭގެ އަގުވައްޓާލަން ވާހަކަ ދެއްކައި ދިވެހިރާއްޖޭ ބޮއިކޮޓް ކުރަން ގޮވައިލި އެމްޑީޕީ، މިއަދު އިންޑިއާ ގެ ގަދަރާއި ކަރާމާތަށް ގެއްލުންވާތީ އެގައުމުގެ ދިފާއުގައި މިވަނީ ނިކުމެފައެވެ.. 

ދިވެހިންގެ ބިމުގައި، ދިވެހިންނަށް "ގޮތް ނޭނގޭ" އެއްބަސްވުންތަކެއް އިންޑިއާއާއި އެކުވެ، އެގަމުގެ ހަތިޔާރު އެޅި ސިފައިން މި ބިންމަތީގައި ވަޒަންވެރިވުމުގެ ހުއްދަދިނުމުން، އެކަމުގެ ސަބަބުން މި ދިވެހިރާއްޖޭގެ ސަލާމާތާއި، ރައްކާތެރިކަމާއި، މިނިވަންކަމަށް ކުރިމަތިވެގެންދާނެ ގެއްލުމަކުން ދިވެހިރާއްޖެ ސަލާމަތް ކުރުމަށް، ދިވެހިރާއްޖޭގެ ދިފާއުގައި އިދިކޮޅު ކޯލިޝަނުން "އިންޑިއާ އައުޓް" ނަމުގައި ހަރަކާތެއް ހިންގަވަން ފަށާފައިވާތާ އެތައް ދުވަހެއް ވެއްޖެއެވެ.

އެ ކޯލިޝަންގެ މި ހަރަކާތުގެ މަގުސަދަކީ އެއްވެސް ހާލެއްގައި އިންޑިއާ އާއި ދެކޮޅުވުން ނޫން ކަމަށް ކެނޑިނޭޅި އެ ކޯލިޝަނުން އަންނަނީ ބުނަމުންނެވެ. މި ހަރަކާތުގެ އެތެރެއިންނާއި ބޭރުންވެސް އެ ކޯލިޝަނުން ގޮވާލަމުންދާ ގޮވެއްޔަކީ އިންޑިއާ ގެ ސިފައިން ބޭރުކޮށް، އެ ސިފައިންނާއި އެކު ވެފައިވާ " ގޮތް ނޭނގޭ" އެއްބަސްވުންތަކާއި ގުޅޭ މައުލޫމާތު ރައްޔިތުންނަށް ސާފުކޮށްދިނުމެވެ.

Advertisement

"ދިވެހި ރައްޔިތުންގެ ހައްގުތަކަށް ކިހާ ވަރެއްގެ ތަނަވަސް ކަމެއް ގެނެސްދޭ އެގްރީމަންޓްތަކެއް ކަމެއް ދިވެހި ރައްޔިތުންނަށް ނޭނގި މި ކަން އެނގެންވީ ޕިޗޯރީންނައްތަ؟ ދިވެހި ރައްޔިތުންނަށް އެކަން އެނގެން ޖެހެނީ, މީގެ ނުރައްކާ އެނގޭތީ ތެދުވެ މި ވާހަކަ މި ދައްކަނީ،"

އިންޑިއާ އައުޓްގެ ނަމުގައި ކުރިޔަށް ގެންދާ ހަރަކާތް ކުރިޔަށް ގެންދަނީ އިންޑިއާ އާއެކު މި ސަރުކާރުން ހަދާފައިވާ އެއްބަސްވުންތަކުގައި ފޮރުވިފައިވާ "ނުރައްކާތެރި ސިއްރުތައް" ހާމަކުރައްވަންކަން ފާހަގަކުރައްވައި ޅ. ނައިފަރުގައި ބޭއްވި "އިންޑިއާ އައުޓް" ހަރަކާތުގައި ވާހަކަދައްކަވަމުން ރައީސް ޔާމީން ވިދާޅުވެފައި ވެއެވެ.

"އިންޑިއާ ރައްޔިތުންގެ މައްސަލައެއް ނެތް. އިންޑިއާ އަސްކަރިއްޔާ އަށް ބުނަން އޮތީ އިންޑިއާ އައުޓް. އެއްވެސް ބިދޭސީ އަސްކަރީ ބާރަކަށް ޖާގައެއް ނެތް. މިއަދު ރާއްޖޭގެ ފަސްގަނޑުގައި [އިންޑިއާގެ] އަސްކަރިއްޔާގެ ސިފައިންނަށް މެހެމެންދާރީއެއް ނެތް،"

ރ. ދުވާފަރުގައި ބޭއްވި "އިންޑިއާ އައުޓް" ހަރަކާތުގައި ވާހަކަ ދައްކަވަމުން ޕީޕީއެމްގެ ރައީސް، ޔާމީން ވިދާޅުވިއެވެ.

ރައީސް ޔާމީން ގެ މި ވާހަކަފުޅުތަކުން އެކަނިވެސް "އިންޑިއާ އައުޓް" ހަރަކާތުގެ މަގުސަދު ވަރަށް ރަނގަޅަށް ސާފުވެގެންދެއެވެ. މިގޮތަށް އިދިކޮޅު އެތައް މެންބަރުންގެ ވާހަކަތައް ދެއްކިދާނެއެވެ. އެ ހުރިހާ ވާހަކައަކުންވެސް ހާމަވެގެންދަނީ، މިއީ އިންޑިއާގެ ގަދަރާއި ކަރާމަތަށް ކުޑައިމީސް ބަހެއް ބުނުމަށް ދިވެހިން ކުރަމުން އަންނަ ކަމެއް ނޫންކަމާއި، އެހެނެއްކަމަކު މިއީ ދިވެހިންގެ ކަރާމާތާއި، ދިވެހިންގެ މިނިވަންކަމުގެ ދިފާއުގައި ހިންގަމުންދާ ހަރަކާތެއްކަމެވެ.