ރަޝިޔާއަކީ ނުބައި ގައުމެކެވެ. މިނިވަން ގައުމެއްކަމުގައިވާ ޔުކްރެއިނަށް އެރުމުގައި ރަޝިޔާއަށް ދެއްކޭނެ އެއްވެސް އެކްސްކިއުޒެއް ނެތެވެ. ޔުކްރެއިނަށް އެރީ ނޭޓޯއިން ޔުކްރެއިން އެޖަމާއަތުގެ މެމްބަރުކަން ދީފާނެތީކަމަށް ދައްކާ ހުއްޖަތަކީ ރަޝިޔާއިން ފަތުރާ ޕްރޮޕެގެންޑާއެކެވެ. އެހެންނޫންތޯއެވެ. އަޅުގަނޑުމެންނަށް ދުނިޔޭގެ ޚާއްސަކޮށް ވެސްޓަން މީޑިއާއާއި ގަތަރުގެ އަލްޖަޒީރާފަދަ ދުނިޔޭގެ މެއިންސްޓްރީމް ހުރިހައި މީޑިއާއަކުންވެސް އިވެނީ މިގޮތަށެވެ. އެކަމަކު ވަރަށް އޮޑުގޮތަކަށް ފެންނަނީ މި ލޮޖިކް ހުޅަނގުގެ ގައުމެއްގެ އިމާގާތުގައި ޥާދަވެރި އެހެން ގައުމަކުން ކަންކުރާނަމަ ދެން ކަންކުރާގޮތެވެ. ޕެސިފިކްގެ ކުޑަކުޑަ ގައުމެއްކަމުގައިވާ ސޮލޮމަން އައލެންޑްސްއިން ޗައިނާއާއެކު ދެގައުމުގެ ދެމެދުގައި ސަލާމަތީ އެއްބަސްވުމެއްގައި ސޮއިކުރުމުން އޮސްޓްރޭލިއާއާއި އެމެރިކާއިން އެގައުމަށް ދޭ އިންޒާރުތަކަކީ މިކަމުގެ ލާމަސީލު މިސާލަކަށް ފުދެއެވެ. ސޮލޮމަން އައިލެންޑްސް އޮންނަނީ ޕަޕުއާނިއުގިނީއާއި މާދުރުނޫން ހިސާބެއްގައެވެ.

ޗައިނާއާއި ސޮލަމަން އައިލެންޑްސްއާއި ދެމެދު ވެފައިވާ އެއްބަސްވުމުގައި ސޮއިކުރިޔަ ނުދިނުމަށްޓަކައި އޮސްޓްރޭލިޔާއާއި އެމެރިކާގެ މަތީފެންވަރުގެ ވަފްދުތަކެއް އެގައުމަށް ގޮސް އެގައުމުގެ އެކިފަރާތްތަކާއި ބައްދަލުކޮށް ކަމުގެ ސީރިއަސްކަން ވިސްނައިދިނަސް ސޮލަމަންއައިލެންޑްސްއިންވަނީ މިދިޔަ ހަފްތާގައި އެއްބަސްވުމުގައި ސޮއިކޮށްފައެވެ. އެއްވެސް ހެއްކެއް ދެއްކުމެއް ނެތި އޮސްޓްރޭލިޔާގެ މީޑއާތަކުން އިންޒާރު ދެމުންދިޔައީ މިއީ ޗައިނާއިން ސޮލަމަންއައިލެންޑްގައި އަސްކަރީ މަރްކަޒެއް ހެދުމަށް ވެވިފައިވާ އެއްބަސްވުމެއްކަމަށާއި މިއީ އޮސްޓްރޭލިއާގެ ގައުމީ ސަލާމަތަށް އޮތް ވަރަށް ބޮޑު ނުރައްކަލެއްކަމަށެވެ. ބައެއް ނޫސްތަކުން ގޮވައިލީ ސޮލަމަންއައިލެންޑްގެ ސަރުކާރު ބަދަލުކުރުމަށެވެ.

މިކަން ހައިރާންވާވަރުގެ ކަމަކަށްވަނީ ހުޅަނގުގެ ގައުމުތަކުގެ ނަޒަރުގައި ރަޝިޔާގެ އަވަށްޓެރިއަކަށްވިޔަސް ޔުކްރެއިނަކީ މިނިވަންގައުމަކަށްވީތީ ޔުކްރެއިނަށް އެގައުމު އެކުވެރިވާންވީ ގައުމުތައް ކަނޑައެޅުމާއި ނޭޓޯއަށް ވަނުމާއި ނުވަނުމުގެ ހައްގު ލިބިގެންވެއެވެ. އެކަމަކު ޗައިނާއަކީ އެމެރިކާއާއި ޔޫރަޕްގެ ވާދަވެރި ގައުމަކަށްވާތީ ސޮލަމަންއައިލެންޑަށް މިލޮޖިކް އެޕްލައިއެއް ނުވެއެވެ. ސޮލަންމަންއައިލެންޑަށް އޮތް ހަމައެކަނިގޮތަކީ އެމެރިކާއާއި ވެސްޓަންއެލަޔަންސުން ބުނާގޮތެއް ހެދުމެވެ.

Advertisement

ސުވާލަކީ އެމެރިކާއާއި އޮސްޓްރޭލިއާއިން ދިން ޔަގީންކަމާއި އުފާފާގަތި ގައުމަކަށް ހަދައިދޭނެކަމަށް ވީ ވައުދުތަކާއި އެމެރިކާއާއި ހުޅަނގުގެ އެމްބަސީތައް ހުޅުވައި އެގައުމަށް އެހީފޯރުކޮށްދޭނެކަމަށް ދިން ޖާމިނުކަމާއެކުވެސް ސޮލަމަންއައިލެންޑުގެ ވެރިން އެމީހުންގެ ނިންމުން ބަދަލުނުކުރީ ކީއްވެގެންހެއްޔެވެ. ޕެސިފިކްގެ ކުދިކުދި ގައުމުތައް މިހާތަނަށް ކޮންޓްރޯލްކޮށްގެން އުޅުނީ އޮސްޓްރޭލިއިންނެވެ. ޔޫރަޕްގެ ދޮން މީހުން ޕެސިފިކްގެ މިކުދިކުދި ގައުމުތަކުގެ ކަޅުކުލައިގެ މީހުންނާމެދު ގެންގުޅޭ ރެސިމަންގެ ގޮތްގަޑާއި އަމަލުކުރާ ދަށްގޮތް ތަޖުރިބާކުރަމުންދާތާ ކިތަންމެ ޒަމާނެކެވެ. އެއިންގައުމަކަށް ކުރިއެރުމެއް ނުލިބެއެވެ. ތަނަވަސްކަމެއް ނުލިބެއެވެ. އެހެންވީމާ ޗައިނާއަކީ ކިތަންމެ ނުރައްކާތެރި ގައުމެއްކަމަށް ސިފަކުރިޔަސް އަދި ހުރިހާ ގޮތަކުން ތަރައްގީކޮށްދީ މަޝްރޫއުތައް ހިންގައިދޭނެކަމަށް ބުންޏަސް ސޮލަމަންއައިލެންޑްސްގެ މީހުން މިހާރު އެކަން ގަބޫލުކުރާކަށް ބޭނުމެއްނުވެއެވެ.