2023 ވަނަ އަހަރު އެކަނިވެސް ދައުލަތަށް ލިބެންޖެހޭ ފައިސާގެ ތެރެއިން 4 ބިލިއަނަށްވުރެ ގިނަ ރުފިޔާ ނުލިބޭނޭކަމަށް ކަނޑައަޅައި ދޫކޮށްލިކަމަށް ދައުލަތުގެ ޓެކްސް އިދާރާގެ އެ އަހަރުގެ އޮޑިޓް ރިޕޯޓުގައި ބުނެފިއެވެ.

އޮޑިތަރ ޖެނެރަލްގެ އޮފީހުން ނެރެފައިވާ މޯލްޑިވްސް އިންލަންޑް ރެވެނިއު އޮތޯރިޓީ (މީރާ)ގެ 2023 ވަނަ އަހަރުގެ އޮޑިޓް ރިޕޯޓްގައި ބުނެފައިވަނީ، އެއަހަރު ނިމުނުއިރު މީރާ މެދުވެރިކޮށް ޓެކުހާއި ޖޫރިމަނާގެ ފައިސާގެ ގޮތުގައި 13.2 ބިލިއަން ރުފިޔާ ލިބެންޖެހޭ ކަމަށެވެ. މީގެ ތެރޭގައި ޓެކުހާއި އޭގެ ޖޫރިމަނާގެ ގޮތުގައި 6.55 ބިލިއަން ރުފިޔާ ހިމެނޭއިރު، ޖޫރިމަނާގެ ގޮތުގައި 6.67 ބިލިއަން ރުފިޔާ ހިމެނެއެވެ.

އޮޑިޓް ރިޕޯޓަށް ބަލާއިރު ޓެކްސްނޫން އާމްދަނީގެ ގޮތުގައި އެންމެބޮޑު އަދަދެއް ލިބެންޖެހެނީ ރިސޯޓްތަކުގެ ކުއްޔާއި ޖޫރިމަނާއިންނެވެ. ރިސޯޓްތަކުގެ ކުއްޔާއި އެ ނުދެއްކުމުން ޖޫރިމަނާގެ ގޮތުގައި ދައުލަތަށް 5.9 ބިލިއަން ރުފިޔާ ލިބެންޖެހެއެވެ. 

އޮޑިޓް ރިޕޯޓްގައިވާގޮތުން ފަތުރުވެރިކަމުގެ ބޭނުމަށް ކުއްޔަށް ދޫކޮށްފައި ހުރި ރަށްރަށާއި ފަޅުފަޅާއި ބިންތަކުން 265.4 މިލިއަން ޑޮލަރު ނުވަތަ 4 ބިލިއަނަށްވުރެ ގިނަ ރުފިޔާ އަނބުރައި ނުލިބޭނޭކަމަށް ބަލައި ޓޫރިޒަމް މިނިސްޓްރީން ވަނީ 2023 ވަނަ އަހަރުގެ އޮގަސްޓްމަހުގެ 13 ވަނަ ދުވަހު މީރާއަށް އެކަން އަންގާފައެވެ. މައުލޫމާތު ލިބިފައިވާ ގޮތުގައި މިއީ ދައުލަތުގެ ބައިތުލްމާލަށް އާމްދަނީގެ ގޮތުގައި ލިބެންއޮތް އަދަދެއް މިހާ ބޮޑުއަދަދަކުން އެއްފަހަރަކާ މައާފްކޮށްދިން ފުރަތަމަ ފަހަރެވެ.