މާދަމާ ހުޅުމާލޭ ސިންތެޓިކް ޓްރެކުގައި ފެށޭ ހޮޓެލް އޭޝިއާ 2026 އެގްޒިބިޝަނުގައި ބައިވެރިވާނެކަން އެސްޓީއޯއިން ބުނެފިއެވެ.

މި ފަހަރުގެ އެގްޒިބިޝަނުގައި އެސްޓީއޯގެ ސްޓޯލް ޚާއްޞަކޮށްފައި ވަނީ ޖެނެރަލް ޓްރޭޑިންގ ޕީޕަލްސް ޗޮއިސް އަދި އެނާޖީ ދާއިރާއަށެވެ. ސްޓޯލްގައި ޕީޕަލްސް ޗޮއިސް ސުޕާމާކެޓުން ލިބެން ހުންނަ ބައެއް ޕްރޮޑަކްޓުތައް ބޭނުންކޮށްގެން ވަގުތުން ލުއި ކާނާ ތައްޔާރުކުރާ ސްޓޭޝަނެއް ބެހެއްޓުމަށް ވަނީ ނިންމައިފައެވެ.

ތިން ދުވަހުގެ މި ހަރަކާތުގައި ކޮފީސްޓޭޓްގެ ބައެއް ބުއިންތައް ހިލޭ ލިބޭނެ ކަމަށް އެސްޓީއޯއިން ބުނެއެވެ. 

އެސްޓީއޯއިން ބުނި ގޮތުގައި އެގްޒިބިޝަނުގެ ދެ ވަނަ ދުވަހު އެސްޓީއޯއިން މުޅިން އާ ބްރޭންޑެއް ތަޢާރަފުކުރުމަށް ވެސް ވަނީ ރާވައިފައެވެ. އެ ބްރޭންޑުގެ ޕްރޮޑަކްޓް ބޭނުންކޮށްގެން ތައްޔާރުކުރާ އައިސްކްރީމާއި ފޮނި ކާތަކެތި ރަހަ ބެލުމުގެ ފުރުޞަތު ސްޓޯލަށް ޒިޔާރަތްކުރާ ފަރާތްތަކަށް ލިބޭނެއެވެ. އޭގެ އިތުރުން އެސްޓީއޯއިން ރާއްޖެއަށް ގެންނަ އެކި ޕްރޮޑަކްޓުތަކާ ގުޅޭ މަޢުލޫމާތު ވެސް ސްޓޯލުން ފޯރުކޮށްދޭނެއެވެ.

އެސްޓީއޯއިން އިތުރަށް ބުނީ އެނާޖީ ދާއިރާއިން މި އެގްޒިބިޝަނުގައި އެސްޓީއޯއިން އިސްކަންދެނީ ރިޒޯޓު ކަސްޓަމަރުންނަށް ކަމަށާ ތެޔޮ އުފުލައިދިނުމުގައި ފޯރުކޮށްދޭ ޚިދުމަތްތަކުގެ ތަފްޞީލު ދީ ރިޒޯޓު މާކެޓުގެ ކަސްޓަމަރުންގެ ޑިމާންޑުތައް ހުރި ނެތް ގޮތް ދެނެގަތުމަކީ މި ބައިގެ މަޤުޞަދު ކަމަށެވެ.

ޕްރޮމޯޝަނަލް ހަރަކާތެއްގެ ގޮތުގައި "ރެޖިސްޓަރ އެންޑް ވިން" ނަމުގައި ކުރިއަށްގެންދާ ހަރަކާތުގައި ސްޓޯލުގައި ރަޖިސްޓަރީ ކުރާ ފަރާތްތަކުގެ ތެރެއިން ކޮންމެ ދުވަހަކު ވެސް ނަސީބުވެރިއެއް ހޮވައި އިނާމު ދޭނެ ކަމަށް އެކުންފުނިން ބުނެއެވެ. ހަމައެހެންމެ ޕީޕަލްސް ޗޮއިސް ޕޭޖް ފޮލޯ ކުރާ ފަރާތްތަކުގެ ތެރެއިން ގުރުއަތުން ހޮވޭ ނަސީބުވެރި ފަރާތަކަށް ޑިޝްވޮޝަރެއް ލިބޭ "ފޮލޯ އެންޑް ވިން" ހަރަކާތެއް ވެސް ކުރިއަށްދާނެ ކަމަށް ބުންޏެވެ.

ހޮޓެލް އޭޝިއާ 2026 ކުރިއަށްދާނީ މާދަމާއިން ފެށިގެން މި މަހުގެ 30 ވަނަ ދުވަހާ ހަމައަށެވެ.