އިސްލާމީ ތާރީޚަށް ބަލާލައިފިނަމަ، އެނގިގެންދާ އެއްކަމީ، ރަމަޟާން މަހުގެ ޚާއްޞަ ކަމެވެ. އެމަހަކީ ހަމައެކަނި ކީރިތި ޤުރުއާން ބާއްވައިލެއްވި މައްސަރެއް ނޫނެވެ. އެހެނެއްކަމަކު، އިތުރު އެތަށް މުހިންމު ހާދިސާތަކެއް އިސްލާމީ ތާރީޚުގެ ބޮޅަށް ވަދެގެން ދިޔައީ މި ބަރަކާތްތެރި، ރަހުމަތާއި އަދި ފުއްސެވުމުގެ މައްސަރުގައެވެ. އޭގެތެރެއިން މުހިންމު 8 ކަމަކަށް އަލިއަޅުވާލެވޭތޯ ބަލާލާނަމެވެ.

1- ކީރިތި ޤުރުއާން ބާއްވައިލެއްވުން

ﷲ ސުބުޙާނަހޫވަތަޢާލާ ކީރިތި ޤުރުއާނުގެ ބަޤަރާ ސޫރަތުގެ 185 ވަނަ އާޔަތުގައިވެސް ވަޙީ ކުރައްވާފައިވާ ފަދައިން، ކީރިތި ޤުރުއާން ބާއްވާލެއްވިފައިވަނީ ރަމަޟާން މަހުގެ ރޭތަކުގެ ތެރެއިން ރެއެއްގައެވެ.

"رمضان މަހަކީ، އެމަހެއްގައި قرآن ބާވައިލެއްވި މަހެވެ. (އެ قرآن ބާވައިލެއްވީ) މީސްތަކުންނަށް ހުރި ތެދުމަގެއް ކަމުގައްޔާއި هداية އާއި حق އާއި باطل ވަކިކޮށްދެނިވި ހެކިތަކެއް ކަމުގައެވެ." ( ބަޤަރާ 185)

2- ބަދުރު ހަނގުރާމައިގެ ކާމިޔާބީ

އިސްލާމީ ތާރީޚު ގައި ހިނގައިދިޔަ ފުރަތަމަ ހަނގުރާމަ ހިނގާފައިވަނީވެސް ރަމަޟާން މަހެއްގައެވެ. ހިޖުރައިން ދެވަނައަށްވީ އަހަރުގެ ރަމަޟާން މަހުގެ 17 ވީ ދުވަހު ހިނގައިދިޔަ މި ހަނގުރާމައިގައި ކާފަރުންގެ ބިޔަ ލަޝްކަރެއްގެ މައްޗަށް މުސްލިމުންގެ މަދު މީސްކޮޅު ހޯދި ކާމިޔާބީއަކީ މުޅި އިސްލާމީ ތާރީޚުގައިވެސް ފާހަގަކޮށްލެވޭ މުހިންމު ކާމިޔާބީއެކެވެ.

3- މައްކާ ފަތަޙަ ކުރެއްވުން

ހިޖުރީގޮތުން 8 ވަނަ އަށްވީއަހަރުގެ ރަމަޟާންމަހުގެ 18 ވީ ދުވަހު، 10,000 މީހުންގެ މައްޗަށް އެކުލެވޭ ބޮޑު ލަޝްކަރަކާއިގެން، މައްކާ ފަތަޙަ ކުރެއްވުމަށް ކީރިތި ރަސޫލާ މުހައްމަދު ޞައްލަﷲ ޢަލައިހި ވަސައްލަމް މައްކާއަށް ވަދެވަޑައިގެންނެވިއެވެ. ސުލްޙަވެރިކަމާއިއެކު ހިނގައިދިޔަ މި ހާދިސާއަކީ ޖާހިލުކަމާއި، ބުދަށް އަޅުކަން ކުރުމުގެ އާދައިން މުޅި އަރަބިކަރަ ސަލާމަތް ކޮށް އިސްލާމީ މަތިވެރި ނޫރު މީސްތަކުންގެ ހިތުގައި ދިއްލައިލި ހާދިސާއެކެވެ.

4- ޚަދީޖާ ރަޟިޔަﷲ އަންހާ ސުވަރުގެވަޑައިގަތުން

ރަސޫލާ ޞައްލަﷲ ޢަލައިހި ވަސައްލަމްގެ އަނބިކަނބަލުން ޚަދީޖަތުގެފާނުގެ ދުނިޔެ ދޫކުރެއްވީވެސް ބަރަކާތްތެރި ރަމަޟާން މަހުގެތެރޭގައެވެ. ރަސޫލާ ޞައްލަﷲ ޢަލައިހި ވަސައްލަމް ރަސޫލު ކަމާއިގެން ފޮނުވުނުތާ 10 ވަނައަށް ވީ އަހަރުގައި ހިނގައި ދިޔަ މި ހާދިސާއާއި ގުޅިގެން ރަސޫލާ ޞައްލަﷲ ޢަލައިހި ވަސައްލަމް އަށް ވަރަށް ބޮޑު ހިތަދަތިކަމެއް ލިބިވަޑައިގެންނެވިއެވެ. އެ އަހަރަކީ "ހިތާމައިގެ އަހަރު"ގެ ގޮތުގައި ކަނޑައެޅުވުނު ބޮޑު އެއްސަބަބެއްކަމުގައި އެކަންވެގެންދިޔައެވެ.

5- ޢަލީ ބިން އަބީ ޠާލިބު ޝަހީދުކޮށްލެވުން

ޚަވާރިޖުންގެ ރަހުމުކުޑަ އަނިޔާގެ ޝިކާރައަކަށްވެ، އިސްލާމީ ޚިލާފަތުގެ ހަތަރުވަނަ ޚަލީފާ، އަދި ރަސޫލާ ޞައްލަﷲ ޢަލައިހި ވަސައްލަމް އާއި ދެބެންގެ ދެދަރި، އަލީ ބިން އަބީ ޠާލިބު ޝަހީދުވެގެން ދިޔައީވެސް ރަމަޟާން މަސްތެރޭގައެވެ. މި ހާދިސާ ހިނގާފައިވަނީ ހިޖުރީ ސަނަތުން 40 ވަނަ އަހަރުގެ ރަމަޟާން މަހުގެ 17 ވީ ދުވަހު ކޫފާގައެވެ.

6- ޠާއިފް ގެ ވަފުދު އިސްލާމްދީން ގަބޫލުކުރެއްވުން