ރާއްޖޭގެ ސިއްހީ އިދާރާތައް ލާމަރުކަޒީ އުސޫލުން ހިންގުމަށް ސަރުކާރުން ފައްޓަވާފައިވާ މަޝްރޫއުގެ ދަށުން ލ. ގަން ހޮސްޕިޓަލުގެ ބޯޑު އެކުލަވާލައި ވަކިން ހިންގަންފެށުމާއެކު މުޅިއަތޮޅުގެ ސިއްހީ ނިޒާމުގެ ހާލަތު ދަށަށް ދާންފަށާފައިވާކަމުގެ އަސަރުތައް ފެންނަންފަށައިފިއެވެ.

ލާމަރުކަޒީ އުސޫލުން އެ އަތޮޅުގެ ސިއްހީ ހިދުމަތްދޭ ތަންތަން ހިންގަންފެށުމާއި އެކު އަތޮޅުގެ ހުރިހާ ހެލްތު ސެންޓަރެއް ބަރޯސާވާންޖެހިފައިވަނީ ލ.ޖަން ރީޖަނަލް ހޮސްޕިޓަލަށެވެ. އެހެންނަމަވެސް ހެތްލު ސެންޓަރުތަކަށް ބޭނުންވާ ސާމާނު އެތަންތަނަށް ފޯރުކޮށްދިނުމުގައި އެ ހޮސްޕިޓަލަށްވެސް ވަނީ ދަތިކަމަކަށް ވެފައެވެ.

އެގޮތުން ލ. އިސްދޫ ހެލްތު ސެންޓަރު ގެ ލެބޯޓަރީގައި ކެމިކަލްސް ހުސްވިުމުގެ ސަބަބުން ހަދަންކެހޭ ބައެއް ޓެސްޓްތައް ނުހެދި ހުންނަތާ ވަރަށް ގިނަދުވަސްވެފައިވާކަން ފާހަކޮށްލެވެއެވެ.

Advertisement

އިސްދޫ ހެލްތު ސެންޓަރަށް ބަލާލާއިރު އެ ސެންޓަރަކީ އިސްދޫ، ކަލައިދޫ އަދި ދަނބިދޫ، މި ތިން ރަށަށް ހިދުމަތްދޭ ސިއްހީ މަރުކަޒެކެވެ. އެ ތިންރަށުގެ ރައްޔިތުން ކޮންމެ ދުވަހަކު ހަދަންޖެހޭ ތަފާތު ލެބް ޓެސްޓުތައް ހެދުމާއި އެހެނިހެން މެޑިކަލް ހިދުމަތްތައް ހޯދަނީ އިސްދޫ ހެލްތު ސެންޓަރުންނެވެ.

އެހެންނަމަވެސް ކޮލެސްޓްރޯލް ޓެސްޓުފަދަ މުހިއްމު ޓެސްޓުތައްވެސް އެ ހޮސްޕިޓަލުގައި ނުހެދޭތާ އެތައް ދުވަހެއް ވެއްޖެއެވެ. އެ ރަށްތަކުގައި ތިބި ތެލެސީމިއާ ލޭ އަޅާކުދިން ހަދަންޖެހޭ ލޭގެ ޓެސްޓް ތަކާއި، ކްރޮސްމެޗް ޓެސްޓުވެސް ވަނީ ކެމިކަލްސް ނުލިބުނުގެ ސަބަބުން ނުހެދި ހުއްޓިފައެވެ.

މިކަމާއި ގުޅިގެން "ވޮއިސް" އިން އިސްދޫ ހޮސްޕިޓަލަށް ގުލާލުމުން އެތަނުގެ ޒިންމާދާރުވެރިޔާ މުހައްމަދު ސާއިފު ވިދާޅުވެފައިވަނީ ކެމިކަލްސް ނެތުމުގެ ސަބަބުން މި ޓެސްޓް ތައް ނުބެދި ހުންނަތާ ވަރަށް ދުވަސް ވެއްޖެ ކަމަށާއި، އެފަރާތުން އެ ސެންޓަރަށް އެތަކެތި ހޯދުމަށް ގަން ރީޖަނަލް ހޮސްޕިޓަލް ގައި އެތައް ފަހަރަކު ރިކުއެސްޓު ކުރިކަމަށެވެ.