ހެކިންނަށް ފުރައްސާރަ ނުކުރުމަށާއި، ޝަރީއަތުގެ މަޖިލީހުގައި ހީ ސަކަރާތް ނުޖެހުމަށް ދައުލަތުގެ ވަކީލުންނަށް ކްރިމިނަލް ކޯޓުގެ އިސް ޣާޒީ އަހުމަދު ޝަކީލު ނަސޭހަތްތެރިވެއްޖެއެވެ. 

މިފަދައިން ޣާޒީ ނަސޭހަތްތެރިވެފައިވަނީ ވ. އާރަށުގެ މުއާމަލާތާއި ގުޅުވާ ކުރީގެ ރައީސް ޔާމީންގެ މައްޗަށް އުފުލާފައިވާ ދައުވާތާއި ގުޅިގެން މިހާރު ކްރިމިނަލް ކޯޓުގައި ކުރިއަށްދާ އަޑުއެހުމުގައެވެ. 

މިއަދުގެ އަޑުއެހުމުގައި އޮތީ ރައީސް ޔާމީންގެ ފަރާތްޕުޅުން ހުށައަޅާ ހެކިންގެ ހެކިބަސް ނެގުމެވެ. އެގޮތުން މިއަދުގެ އަޑުއެހުމަށް ރައީސް ޔާމީންގެ ފަރާތްޕުޅުން ވަނީ ޑެޕިއުޓީ މޭޔަރު އަހުމަދު ނަރީޝް ހެއްކެއްގެ ގޮތުގައި ހުށައަޅުއްވާފައެވެ. 

ނަރީޝް ކޯޓަށް ދެއްވި ހެކިބަހުގައި ވަނީ ރައީސް ޔާމީންގެ އަތްޕުޅުން އެއް މިލިއަން ޑޮލަރަށްވާ ފައިސާ ޔޫސުފް ނައީމާއި ހަވާލުކޮށްފައިވާނެކަމަށެވެ. 

ނަރީޝްގެ ހެކިބަހާއި ގުޅިގެން، ދއުލަތުން ވަނީ ހެކީގެ ގޮތުގައި ނަރީޝް ހުށައެޅުއްވި ސަބަބުން ބޭރުން ވަރަށް ގިނަ ސުވާލުތައް ކުރެއްވުމަށް މަސައްކަތްކުރައްވާފައެވެ. އަދި ސުވާލުތައް ބައްޓަންކުރައްވާއިރު، ފުރައްސާރަކުރާ މޭރުމުން ސުވާލުތައް ބައްޓަންކުރައްވާފައެވެ. 

ދައުލަތުގެ ސުވާލުތައް ކުރަމުންދާ ގޮތާއި ގުޅިގެން ރައީސް ޔާމީންގެ ފަރާތްޕުޅުން ވަނީ ވަރަށް ގިނަ ފަހަރުމަތިން އިއުތިރާޒުކުރައްވާފައެވެ. އަދި ދައުލަތުން ހެއްކަށް ފުރައްސާރަކުރާ މޭރުުމުން ސުވާލުކުރަމުންދާކަން ފާހަގަކުރައްވާފައެވެ. 

އެފަހުން ގާޒީ ވަނީ އެފަދައިން ސުވާލުނުކުރުމަށް ތަކުރާރުކޮށް އަންގފައެވެ. 

އެހެން ނަމަވެސް އެފަހުންވެސް ހެއްކާއި ސުވާލުކުރައްވަމުން، ދައުލަތުން އެ އުސޫލުތަކާއި ޚިލާފަށް ވަނީ ގިނަ ސުވާލތަކެއް ކުރުމަށް މސައްކަތްކޮށްފައެވެ.

އެގޮތުން ދައުލަތުން ވަނީ އެއް މިނިއަން ޑޮލަރަށްވާ ދިވެހި ފައިސާ ގުުނުމަށް ކިހާ ވަގުތެއް ހޭދަކުރެއްވުންތޯ ނަރީޝްއާއި ސުވާލުކުރައްވާފައެވެ. އެ ސުވާލަށް ޖަވާބުދެއްވަމުން ނަރީޝް ވަނީ ސީދާ ކަނޑައެޅިގެން، ހޭދަވީ ވަގުތެއް ދަންނަވަން ނޭނގޭކަމަށް ވިދާޅުވެފައެވެ. އަދި ހަނދާން ނެތްކަމަށް ނަރީޝް ވިދާޅުވިއެވެ.

ނަރީޝް ދެއްވި ޖަވާބާއި ގުޅިގެން ދައުލަތުގެ ވަކީލުން ހީ މަލާމާތްކުރާ ގޮތަށް އަމަލުކޮށްފައިވާކަން ގާޒީގެ ސަމާލުކަމަށް އައުމާއެކު، ގާޒީ ވަނީ ދައުލަތުގެ ވަކީލުން ހުއްޓުވާފައެވެ. 

އަދި ކޯޓުގައި އެފަދައިން ހީ ސަކަރާތް ނުޖެހުމަށް ގާޒީ ވަނީ ނަސޭހަތްތެރިވެފައެވެ. 

މައްސަލަބައްލަވާ އިސް ގާޒީ ވިދާޅުވީ، ކުރިއަށް މިދަނީ ސީރިއަށް މައްސަލައެއްކަމަށާއި، ކޯޓަށް ހާޒިރުވާ ވަކީލުންނަކީ ވަކީލުން ކޯޓުގައި އަމަލުކުރައްވަން ޖެހިވަޑައިގަންނަވާ ގޮތް އެނގިލައްވާނެ ފަރާތްތަކެއްކަމަށް ގަބޫލުކުރައްވާކަމަށެވެ. 

އެހެންކަމުން ކޯޓުގައި ހީ ސަކަރާތްޖަހައި، އެއް ވަކީލަކު އަނެއް ވަކީލެއްގެ ގައިގައި ކޯޓުގެ ހިނގައި މައްސަލައިގެ ސީރިއެސްކަން ނަގައިލަން މަސައްކަތް ނުކުރުމަށްވެސް ގާޒީ ވަނީ ނަސޭހަތްތެރިވެފައެވެ. 

އަދި ކޯޓުގެ ހުރުމަތް ކެނޑޭގޮތަށް ތަކުރާރުކޮށް އަމަލުކުރަމުންދާނަމަ ގާނޫނުގެ ތެެރެއިން އަމަލުކުރައްވަން އޮންނަ ގޮތަށް ވަކީލުންނާއި މެދު ފިޔަވަޅު އަޅުއްވާނެކަމަށް ވިދާޅުވެ ގާޒީ ވަނީ ދައުލަތުގެ ވަކީލުންނަށް އިންޒާރުވެސް ދެއްވާފައެވެ.