ޔޫސުފު ނައީމުގެ އަތުން ޑޮލަރު ބައްލަވައިގަތުމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމު ދެއްވި ފައިސާ ގެންގޮސްދީފައިވާނެކަމަށް ވ. އާރަށު މައްސަލައިގައި މިއަދު ކުރިއަށް ދިޔަ އަޑުއެހުމުގައި ދިފާއުގެ ފަރާތުން ހެކިބަސް ދެއްވަމުން މާލޭ ސިޓީގެ ޑެޕިއުޓީ މޭޔަރު އަހުމަދު ނަރީޝް ވިދާޅުވެއްޖެއެވެ. 

އެމްއެމްޕީއާރުސީ މެދުވެރިކޮށް އާރަށް ކުއްޔަށް ދޫކުރި މުއާމަލާތާއި ގުޅިގެން ރައީސް ޔާމީންގެ މައްޗަށް ދެ ދައުވާއެއް ވަނީ އުފުލާފައެވެ. 

މިއަދު ކުރިމިނަލް ކޯޓުގައި ކުރިއަށް ގެންގިސްފައިވަނީ އެ މައްސަލައާއި ގުޅިގެން ދިފާއުގެ ފަރާތުން ހުށައަޅާ ހެކިންގެ ހެކިބަސް ނެގުމުގެ މަސައްކަތެވެ. އެގޮތުން ނަރީޝް ކޯޓަށް ހާޒިރުކޮށްގެން މިއަދު ވަނީ އޭނާގެ ހެކިބަސް ނަގާފައެވެ. 

Advertisement

ނަރީޝް ހެކިބަސް ދެއްވަމުން ވިދާޅުވީ 2015 ވަނަ އަހަރުގެ ސެޕްޓެމްބަރު މަހު ކުރީކޮޅު ރައީސް ޔާމީން ގުޅުއްވާ އެމަނިކުފާނު އޭރު ދިރިއުޅުއްވަމުން ގެންދެވި ގެކޮޅަށް އައުމަށާއި، ޔޫސުފު ނައީމު އަތްޕުޅުން އެއް މިލިއަން ޑޮލަރު ބައްލަވައިގެންކަމަށާއި، އަދި އެއަށްވާ ދިވެހި ރުފިޔާ (15،420،000 ރުފިޔާ) ޔޫސުފު ނައީމާއި ހަވާލުކޮށްދިނުމަށް އެދިލެއްވިކަމަށެވެ. 

އެއާއެކު ހަމަ އެދުވަހު ރައީސް ޔާމީން ދިރިއުޅުއްވާ ގެކޮޅަށް ވަޑައިގެން އެ ފައިސާ ގުނުމަށްފަހު، ޔޫސުފު ނައީމާއި ހަވާލުކުރެއްވިކަމަށް ނަރީޝް ވިދާޅުވިއެވެ. ފައިސާގެ ތަފްސީލާއި ގުޅޭގޮތުން ނަރީޝް ވިދާޅުވީ ފައިސާ ހުރީ 500 ރުފިޔާގެ ނޫޓުންކަމަށެވެ. 

ނަރީޝް ވިދާޅުވީ ފައިސާ ހަވާލުކުރުމުން، އެއާއި ހަވާލުވެ، ފައިސާ ދެއްކެވިކަމުގެ ލިޔުމެއްގައި ސޮއި ކޮށްފައިވާނެކަމަށެވެ. އެ މުއާމަލާތް ހިނގިއިރު އެތަނުގައި އޭނާގެ އިތުރުން ޢަބްދުﷲ ރަޝީދު ކިޔާ ބޭފުޅަކުވެސް ހުންނެވިކަމަށް ނަރީޝްގެ ހެކިބަހުގައި ވަނީ ވިދާޅުވެފައެވެ. 

މިއަދުގެ އަޑުއެހުމުގައި ދައުލަތުން ވަނީ މައުލޫއިން ބޭރު، އަދި ހެކި ހުށައެޅި މަގްސަދާއި ޚިލާފު ގިނަ ސުވާލުތަކެއް ކުރުމަށް މަސައްކަތްކޮށްފައެވެ. އޭގެ ތެރޭގައި، ރައީސް ޔާމީން ވިދާޅުވެގެން ޔޫސުފު ނައީމާއި، ފައިސާ ހަވާލުކުރި ދުވަހުގެ މޫސުމާއި ގުޅިގެންވެސް ދައުލަތުން ސުވާލުކޮށްފައިވެއެވެ. އަދި އެފައިސާ ގުނަން ހޭދަވި ވަގުތު ހަނދުމަފުޅު ނެތީ މާގިނައިން ފައިސާ ގުނުއްވާތީވެސް ދައުލަތުންގެ ވަކީލު ވަނީ ސުވާލުކުރައްވާފައެވެ. 

ދައުލަތުން މިފަދައިން ސުވާލުކުރަމުން ދިއުމާއި ގުޅިގެން ، ރައީސް ޔާމީންގެ ފަރާތްޕުޅުން ވަނީ ތަކުރާރުކޮށް އިއުތިރާޒު ނަންގަވާ އެކަން ގާޒީގެ ސަމާލުކަމަށް ގެންނަވާފައެވެ. އަދި ދައުލަތުން ސުވާލުތައް ބައްޓަންކުރަމުން ހެކިވެރިޔާ (އަހުމަދު ނަރީޝް) އަށް ފުރައްސާރަ އަމާޒުވާ ގޮތަށްކަމަށް ވިދާޅުވެ، އެހެން ސުވާލުތައް ކުރުން ހުއްޓުވުމަށްވެސް އެދިވަޑައިގެންފައިވެއެވެ. 

މައްސަލަ ބެއްލެވި ގާޒީވެސް އެ އިއުރިތާޒުތަކާއި ގުޅިގެން އެގޮތަށް އަމަލުނުކުރެއްވުމަށްވެސް އަންގާފައިވެއެވެ. އަދި މައްސަލައިގެ ސީރިއެސްކަން ގެއްލޭގޮތަށް ދައުލަތުގެ ވަކީލުން އަމަލުކުރައްވަމުން ގެންދިއުމާއި ގުޅިގެން ގާޒީ ވަނީ އެފަދައިން އެކަން ނުކުރުމަށް އަންގާ އިންޒާރުވެސް ދެއްވާފައެވެ.